ރައްޔިތުންގެ މަޖިލިހުގެ ރައީސް މުހައްމަދު އަސްލަމާއި މަޖިލިހުގެ ނައިބު ރައީސް އަހްމަދު ސަލީމްގެ އިތުބާރު ނެތް ކަމުގެ މައްސަލަ މަޖިލިހަށް ހުށަހަޅައިފިއެވެ.

ރައްޔިތުންގެ މަޖިލީހުގެ ރައީސް، މުހައްމަދު އަސްލަމާއި ނައިބު ރައީސް އަހުމަދު ސަލީމްގެ އިތުބާރު ނެތްކަމުގެ މައްސަލަ ހުށަހެޅީ 23 މެމްބަރުންގެ ސޮޔާއެކު ސަރުކާރު ހިންގާ ޕީޕީއެމް/ޕީއެންސީ ކޯލިޝަނުންނެވެ.

ޕީޕީއެމާއި ޕީއެންސީގެ 18 މެންބަރުންގެ އިތުރުން ދަނގެތީ ދާއިރާގެ މެންބަރު މުހައްމަދު ނާޒިމް އާއި ތިމަރަފުށީ ދާއިރާގެ މެންބަރު އަބްދުﷲ ރިޔާޒާއި މީދޫ ދާއިރާގެ މެންބަރު އަހްމަދު ސިޔާމް އާއި ކުޑަހުވަދޫ ދާއިރާގެ މެންބަރު އަހްމަދު އާމިރާއި ނޮޅިވަރަމް ދާއިރާގެ މެންބަރު މުހައްމަދު ނަޝީދު ވަނީ ސޮއި ކުރައްވާފައެވެ.

ރައްޔިތުންގެމަޖިލީހުގެ ރައީސް އަދި ހިތަދޫ އުތުރު ދާއިރާގެ މެންބަރުގެ އިތުބާރުނެތްކަމުގެ މައްސަލަ ހުށަހަޅާފައިވަނީ, ރައްޔިތުންގެ މަޖިލީހުގެ ޤަވާއިދާއި ޤާނޫނު އަސާސީގެ 70 އަދި 75 ވަނަ މާއްދާއާއި ޚިލާފުވެފައިވާކަމަށްވާތީ ކަމުގައި މަޖިލީހަށް ހުށަހެޅި ޤަރާރުގައިވެއެވެ.

މަޖިލީހުގެ ނާއިބުރައީސް އަހުމަދު ސަލީމުގެ އިތުބާރުނެތްކަމުގެ މައްސަލަ ހުށަހަޅާފައިވަނީ, އަހުމަދު ސަލީމު މަޖިލީހުގެ ނާއިބުރައީސްގެ މަޤާމުގައި ހުންނަވާ ވަކި ޕާޓީއެއްގެ މަސްލަހަތު ހިމާޔަތްކުރެއްވުމަށް މަސައްކަތްކުރެއްވުމާއި ޤާނޫނު އަސާސީން މަތިކޮށްފައިވާ ޒިންމާތަކާއި ޚިލާފުވުމާއި އަދި މަޖިލީޙުގެ ޤަވާއިދުގެ އިތުރުން ޤާނޫނު އަސާސީގެ 75 ވަނަ މާއްދާއާއި ޚިލާފުވެފައިވާކަމަށް މަޖިލީހަށް ހުށަހެޅި ޤަރާރުގައިވެއެވެ.

މަޖިލީހުގެ ރައީސާއި ނައިބުގެ އިތުބާރު ނެތްކަމުގެ މައްސަލަ ވައްދާފައި މިވަނީ ސަރުކާރުގެ ކެބިނެޓްގެ ބައެއް ވަޒީރުންނަށް ރުހުން ނުދޭން އިދިކޮޅު އެމްޑީޕީން ނިންމާފައިވަނިކޮށެވެ.