ބޭންކް އޮފް މޯލްޑިވްސް އިން އިދިކޮޅު ފަރާތްތަކާ ގުޅިގެން އިއްޔެ ކުރަން އުޅުނީ ބަގާވާތެއްކަމަށް ރައީސް މުއިއްޒު ސިފަކުރައްވައިފިއެވެ.
ރުފިޔާ އެކައުންޓަށް ދޫކޮށްފައިވާ ކާޑުތަކުން ޑޮލަރުގެ ލިމިޓް ކުޑަކުރުމާއި އެކު ރައްޔިތުންގެ ނުރުހުމާއި ޝަކުވާތައް އަމާޒުވާން ފެށުމުން ކުރިން ބުނި އެތި ކެންސަލް ކަމަށް ބުނެ ސަރުކާރުން ވަނީ ބީއެމްއެލް އަށާއި އިދިކޮޅު ފަރާތްތަކުންގެ ބޮލަށް އެ މައްސަލަ ޖަހާފައެވެ.
ޕީއެންސީ ހަރުގެ ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ،ރުފިޔާ އެކައުންޓަށް ދޫކޮށްފައިވާ ކާޑުތަކުން ޑޮލަރުގެ މުއާމަލާތް ކަނޑާނުލުމަށް އެމަނިކުފާނު ބީއެމްއެލަށް އަންގާފައިވާނޭކަމަށެވެ.
މިފަދަ އިލްޒާމެއް ރައީސް، ބީއެމްއެލަށް ކުރައްވާފައިވާއިރު، ބީއެމްއެލްގެ ސީއީއޯ ރައީސް އޮފީހަށް ހާޒިރުކޮށް ބިރު ދައްކާފައިކަމަށް އަޑު ފެތުރިފައިވެއެވެ. ނަމަވެސް ބޭންކިން ނިޒާމުގެ ތެރެއަށް ރައީސްއަކަށް އަތް ނުބޭނެކަމަށް ގާނޫނު ދަންނަ ފަރާތްތަކުން ގެންދަނީ ބުނަމުންނެވެ.
ޑޮލަރުގެ ރޭޓް ހިފަހައްޓާނެ ކަމަށް ވައުދުވެ، އަދި ރާއްޖޭގެ އިޤްތިސާދީ ހާލަތު ރަނގަޅު ކުރާނެ ކަމަށް ބުނެ އައި ސަރުކާރަށް ރަނގަޅަށް ގައުމު ހިންގަން ނޭގިގެން އުޅޭ މަންޒަރު ދަނީ ވަރަށް ރީތިކޮށް ހާމަވަމުންނެވެ.
