18 ވަނަ ރައްޔިތުންގެ މަޖިލީހުގެ ނައިބު ރައީސްކަން އިދިކޮޅު އެމްޑީޕީގެ މޫސާ މަނިކަށް ދެއްވީ ރީތި މިސާލު ދެއްކެވުމަށް ކަމަށް ރައީސް ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވީ ފްރޮންޓް އޮފީހުގައި ހޯމަ ދުވަހު އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ 18 ވަނަ މަޖިލީހުގެ ނައިބު ރައީސްކަމަށް ކުރިމަތިލި މިހާރުގެ މަޖިލިސް ރައީސް އަބްދުއްރަހީމް އަށް މަޖިލީހުގެ ނައިބު ރައީސްކަން ނުދެއްވީ އިދިކޮޅު އެމްޑީޕީއަށް ދިނުމަށްޓަކައި ކަމަށެވެ.

އެގޮތައް އެމަނިކުފާނު ނިންމެވީ ޑިމޮކްރަސީގައި ރީތި މިސާލެއް ދެއްކެވުމަށް ކަމަށާއި އެ މިސާލެއް 19 ވަނަ މަޖިލީހުގެ އެމްޑީޕީއަށް ސުޕަރ މެޖޯރިޓީ އޮތް އިރުވެސް ނުދެއްކުނުކަމަށް ވިދާޅުވި އެވެ.

އަދި މިހާރު ކުރިޔަށްދާ 20 ވަނަ މަޖިލީހުގައި ސުޕަރ ސުޕަރ މެޖޯރިޓީއެއް އޮންނަ އިރުވެސް އެ މިސާލެއް ނުފެންނަ ކަމަށް ވިދާޅުވެ ރައީސް ޔާމީން ވަނީ ވަރަށް ބޮޑަށް ފާޑު ވިދާޅުވެފަ އެވެ.

ދާދިފަހުން ޕީއެންސީ ހަރުގޭގައި އޮތް ޖަގަހަ ޖަލްސާގައި އަދުރޭ ވަނީ އަދުރޭއަށް މަޖިލިސް ނައިބު ރައީސްކަން ނުދެއްވީ ރައީސް ޔާމީންކަމަށް ތުހުމަތުކުރައްވާފައެވެ.

އެވާހަކަޔަށް ރައްދު ދެއްވަމުން ރައީސް ޔާމީން ވިދާޅުވީ އަދުރޭ އަކީ އިންތިޚާބްތަކަށް ބިރުގަންނަ މީހެއް ކަމަށެވެ.