މިހާރުގެ ކޮމިޝަނަރ އޮފް ޕޮލިސް އަލީ ޝުޖާއު މަގާމަށް. ރައީސް ޑރ. މުހައްމަދު މުއިއްޒު އައްޔަންކުރެއްވީ ގާނޫނާ ޚިލާފަށްކަން ހާމަވެއްޖެއެވެ.

ސީޕީގެ މަގާމަށް ޝުޖާއު، ރައީސް މުއިއްޒު އައްޔަންކުރައްވާފައިވަނީ، 2023 ޑިސެމްބަރު 24 ވަނަ ދުވަހުއެވެ. ޝުޖާއު އެމަގާމަށް އައްޔަންކުރެއްވީ ޕޮލިސް ކޮމިޝަނަރުކަމަށް ކުރިމަތިލާން ބޭނުންވާ މީހުންނަށް އެ ކަމުގެ ފުރުސަތު ހޯމް މިނިސްޓްރީން ހުޅުވާލިތާ 10 ދުވަސް ފަހުންނެވެ. އާ ޕޮލިސް ކޮމިޝަނަރުގެ މަގާމަށް އެސިސްޓެންޓް ކޮމިޝަަނަރު އަލީ ޝުޖާއު އައްޔަން ކުރަން ފެންނަ ކަމަށް ޕޮލިސް ބޯޑުން ހޯމް މިނިސްޓަރު އަލީ އިހުސާނަށް ލަފާދީފައިވަނީ ވެސް ޑިސެމްބަރު 2023، 24 ވަނަ ދުވަހުއެވެ.

ޕޮލިސް ކޮމިޝަނަރ ކަމަށް ކުރިމަތިލާން ކުރި އިއުލާނާއެކު އޭރުގެ އެސިސްޓެންޓް ކޮމިޝަނަރު އިސްމާއިލް ނަވީން ވެސް އެ މަގާމަށް ކުރިމަތިލެއްވިއެވެ. ނަމަވެސް ބޯޑުން ނަވީންގެ ނަން ބާރުކޮށްލީ ޝަރުތު ހަމަނުވާ ކަމަށް ބުނެއެވެ.

ފުލުުހުންގެ ހިދުމަތުގެ ގާނޫނު ބުނާގޮތުން ޕޮލިސް ކޮމިޝަނަރު ކަމަށް ނަގަން ޖެހެނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ. އަދި އެ ބޭފުޅަކީ ފުލުހުންގެ ޚިދުމަތުގައި 18 އަހަރު ޚިދުމަތް ކުރައްވާފައިވާ ބޭފުޅަކަށް ވާން ޖެހޭނެއެވެ. ކުރިން އެގާނޫނުގައި އޮންނަނީ 20 އަހަރުގެ މުއްދަތެކެވެ. ނަމަވެސް ފަހުންވަނީ ގާނޫނަށް ބަދަލު ގެނެސްފައެވެ. ގާނޫނަށް ފަހުން ބަދަލު ގެނައީ ސީދާ ޝުޛާއުއަށް ފެހި ކޯޠޓެއްގެ ގޮތުގައި ކަން މުއުތަބަރުކޮށް ތޭރަ އޮންލައިނަށް ވަނި އެނގިފައެވެ. ނަމަވެސް ޕޮލިސް ބޯޑުން އުސޫލަށް ބަދަލު ގެނައިރު ޝުޖާއު ފުލުހުންގެ ހިދުމަތުގައި 18 އަހަރު ހޭދަ ނުވާކަން ބޯޑު މެމްބަރުންނަށް ނޭނގިއޮތީ ކަމަށްވެސް ވަނީ މައުލޫމާތު ލިބިފައެވެ.

ނަމަވެސް ގާނޫނަށް ގެނެސްފައި އޮތް ބަދަލާއެކުވެސް އަލީ ޝުޖާއުއަށް މަގާމު ހަވާލުކުރެއްވިއިރުވެސް އޭނާގެ ޝަރުތު ހަމަނުވާކަން ތޭރަ އޮންލައިނަށް ވަނީ ހާމަވެފައެވެ. އެގޮތުން ފުލުހުންގެ ސައިޓިގައި އަލީ ޝުޖާއު އާ ގޮތުން ހާމަކޮށްފައިވާ މައުލޫމާތަށް ބަލާއިރު ޝުޖާއު ފުލުހުންގެ ހިދުމަތާ ގުޅިވަޑައިގެންފައިވަނީ 2006 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހުއެވެ.

މި މައުލޫމާތަށް ބަލާއިރު ޝުޖާއު އާ ކޮމިޝަނަރުކަމުގެ މަގާމު ރައީސް މުއިއްޒު ހަވާލުކުރެއްވިއިރު އޭނާ ފުލުހުންގެ ހިދުމަތުގައި ހިދުމަތްކުރައްވާތާ ވެފައިވަނީ 17 އަހަރާ 3 މަހާ 13 ދުވަހުއެވެ. އެހެންކަމުން ފުލުހުންގެ ގާނޫނަށް ފަހުން ގެނެސްފައި އޮތް އިސްލާހުގައި ބުނާ ގޮތުން ނަމަ ޝުޖާއު މަގާމަށް ޝަރުތު ހަމަނުވެއެވެ. އޭނާ ހިދުމަތްކުރަންޖެހޭ މުއްދަތުގައި، އިތުރު 8 މަހާ 17 ދުވަސް ބާކީ އޮތެވެ.

އެހެންކަމުން ފުލުހުންގެ މުއައްސަސާއިން އާންމުކޮށްފައިވާ މައުލޫމަތަށް ބަލާއިރު އަލީ ޝުޖާއު ކޮމިޝަނަރުކަމުގެ މަގާމުގައި ހުންނެވީ އަދި އެ މަގާމަށް ރައީސް މުއިއްޒު އޭނާ އައްޔަންކުރެއްވީ ވެސް ގާނޫނާ ހިލާފަށްކަން ހާމަވެއެވެ.

އެހެންކަމުން ފުލުހުންގެ އެންމެ އިސްވެރިޔާއަކީ ގިނަ މަސްއޫލިއްޔަތުތަކެއް ހަވާލުވެފައި ހުންނަ ބޭފުޅަކަށް ވާއިރު، އަދި ފުލުހުންގެ ގިން ލިޔެކިޔުންތަކާ އަދި މުވައްޒަފުންގެ ޕްރޮމޯޝަން ފަދަ އަދި ތަހުގީގުތައް ފަދަ މުހިއްމު ލިޔެކިޔުންތަކުގައި ސޮއި ކުރާނެ ބޭފުޅަކަށް ވާއިރު ގާނޫނީ ގޮތުން ސުވާލު އުފެދޭ ގޮތަށް ހުރި ބޭފުޅަކު މަގާމުގައި ހުރެ ފަހުން އޭގެ ސަބަބުން ލިބިދާނެ ގެއްލުމަކަށް ޒިންމާވާނީ ކޮން ފަރާތަކުންތޯ މިއީ ސުފާލު އުފެދޭ ކަމެކެވެ.