ބޭންކް އޮފް މޯލްޑިވްސް (ބީއެމްއެލް)އަށް އޮޅިގެން އުމުރުން ދުވަސްވީ މީހުންނަށް ގިނައިން ފައިސާ ޖަމާ ކުރަން ފަށައިފިއެވެ.
އުމުރުން 65 އަހަރުން މަތީގެ މީހުންނަށް އިނާޔަތުގެ ގޮތުގައި ކޮންމެ މަހަކުވެސް ޖަމާވާ 5،000ރ.ގެ ބަދަލުގައި އެ މީހުންގެ އެކައުންޓްތައް މިއަދު 15،000ރ. ދަނީ ޖަމާވަމުންނެވެ.
މައުލޫމާތު ހޯދިފައިވާ ގޮތުގައި ބައެއް މީހުންނަށް 10،000ރ. ވެސް ބައެއް މީހުންނަށް ޖަމާވެފައި ވެއެވެ. މި މީހުންނަށްވެސް ޖަމާވެފައި ވަނީ ދެ ފަހަރެއްގެ މަތިން 10،000ރ. އެވެ.
މިކަމާއި ގުޅިގެން ބީއެމްއެލް އިން އަދި ވަކި އެއްޗެއް ހާމަކޮށްފައެއް ނުވެއެވެ.
މީގެ ކުރިން އޮގަސްޓް 1 ވަނަ ދުވަހުވެސް ބީއެމްއެލްގެ ބައެއް އެކައުންޓަކަށް އޮޅިގެން ގިނަ އަދަދެއްގެ ފައިސާ ފޮނުވުނުވު މައްސަލައެއް ފެންމަތިވިއެވެ.
ބީއެމްއެލް އިން އެއިރު ބުނީ ޕޭމަންޓް ޕްރޮސެސް ކުރުމުގައި ދިމާވި "ހިއުމަން އެރާ"އެއްގެ ސަބަބުން ބައެއް އެކައުންޓްތައް އޮޅިގެން ފައިސާ ޖަމާ ކުރެވުނު ކަމަށެވެ.
އަދި އެ އެކައުންޓްތައް ދެނެގަނެ، އެ ފަައިސާ އަނބުރާ ހޯދާފައިވާ ކަަަމަށްވެސް ބީއެމްއެލް އިން ބުނެފައި ވެއެވެ.
އެ ބޭންކް އިން ބުނީ މި މައްސަލަ ދިމާވެފައި ވަނީ ޕޭރޯލް ޕްރޮސެސިންއަށް ބޭނުންކުރާ ބަލްކް ޕޭމަންޓަށް ދާދި ފަހުން ގެނައި ބަދަލާއި ގުޅިގެން ކަަމަށެވެ. އަދި މިކަމުގެ ސަބަބުން މާލީ ގޮތުން އެއްވެސް ގެއްލުމެއް ލިބިފައިނުވާކަމަށްވެސް އެ ބޭންކް އިން ބުނެފައި ވެއެވެ.
