މާލޭގެ އީދު މިސްކިތުން އަނެއްކާ ވެސް ވައްކަންކޮށްފިއެވެ.

މީގެ ކުރިން ވެސް އެތައް ފަހަރެއްގެ މަތިން ވައްކަން ކޮށްފައިވާ އީދު މިސްކިތުން ރޭގެ ވަގުތެއްގައި ވައްކަން ކުރީ މަރާމާތަށް މިސްކިތް ބަންދުކޮށްފައިވަނިކޮށެވެ.

މާލޭ ސިޓީ ކައުންސިލުން ބުނީ، މިސްކިތް ބަންދު ކޮށްފައިވަނިކޮށް ވައްކަން ކޮށްފައިވަނީ ރޭ އިރުއޮއްސި 06:00 އާއި 10:00 އާ ދޭތެރޭގައި ކަމަށެވެ.

މި ފަހަރު ވަގަށް ނެގި ތަކެތީގެ ތެރޭގައި 13 ބޮތްކާއި އަށް ފަންކާގެ ނަރުތައް ހިމެނޭ ކަމަށް ސިޓީ ކައުންސިލުން ބުންޏެވެ. ސިޓީ ކައުންސިލުން ވަނީ މި މައްސަލަ ޕޮލިހަށް ހުށަހަޅައިފައެވެ.

ފުލުހުން ބުނި ގޮތުގައި އެ މައްސަލަ ރޭގެ ވަގުތެއްގައި ރިޕޯޓުކޮށްފައިވާ ކަމަށާއި މި މައްސަލައާ ގުޅިގެން މިހާތަނަށް މީހަކު ހައްޔަރުކޮށްފައިނުވާ ކަމަށެވެ. މައްސަލަ ފުލުހުން ގެންދަނީ ތަހުގީގު ކުރަމުން ކަމަށް ބުނެފައިވެއެވެ.

މީގެ ކުރިން ވެސް ތަކުރާރުކޮށް އެތައް ފަހަރެއްގެ މަތިން އީދު މިސްކިތުން ވައްކަން ކުރި މައްސަލަ ސިޓީ ކައުންސިލުން ވަނީ ފުލުހުންނަށް ހުށަހަޅައިފައެވެ. މިދިޔަ ޖޫން މަހުގެ ތެރޭގައި ވެސް އެ މިސްކިތުން 10 ފަންކާ ވަގަށް ނަގާފައިވެއެވެ.