ފަލަސްތީނާ އެކު ތިބިކަމަށް ބުނާ ސަރުކާރުން, ފަލަސްތީނުގެ ހައްގުގައި އިހުތިޖާޖުކުރާ ކަނބަލުންގެ ތެރޭގައި ހިމެނޭ ޑރ. އިޔާޒުގެ އަންހެނުން ހައްޔަރުކޮށްފިއެވެ.

ތޭރަ އޮންލައިނަށް މައުލޫމާތު ލިބިފައިވާ ގޮތުގައި ޑރ. އިޔާޒުގެ އަންހެނުން ޝާދިޔާ ހައްޔަރުކޮށްފައިވަނީ "ޝީ" ބިލްޑިން ކައިރީ ހުއްޓާ ކޯޓު އަމުރެއްގެ ދަށުންނެވެ.

މައުލޫމާތު ލިބިފައިވާ ގޮތުގައި ޝާދިޔާ ހައްޔަރުކޮށްފައިވަނީ، ފަލަސްތީނުގެ ހައްގުގައި މި ފަހަކަށް އައިސް އެކި އެކި އެމްބަސީތައް ކައިރީ އަޑު އުފުލާ އިހުތިޖާޖުކުރަމުން ދާ އަންހެނުންގެ ތެރޭގައި ޝާދިޔާވެސް ހިމެނިފައިވަނިކޮށެވެ. އަދި އޭނާ ހައްޔަރުކުރީވެސް އެކަމުގެ ސަބަބުން ކަމަށް މައުލޫމާތު ލިބިފައިވެއެވެ.

ޝާދިޔާގެ އިތުރުން ފަލަސްތީނުގެ ހައްގުގައި އަޑު އުފުލާ އިސް ފަރާތެއް ކަމަށްވާ ޑރ. ޝަޒުރާ ވެސް ވަނީ ހައްޔަރުކޮށްފައެވެ.

ދިވެހިން ދަނީ ހުއްޓުމެއް ނެތި ރާއްޖޭގައި ގާއިމުވެފައިވާ ބޭރުގެ އެމްބަސީތައް ކައިރީގައި އެއްވެ މުޒާހަރާ ކުރަމުންކަން ފާހަގަކުރެވެއެވެ. މިގޮތުން މި ހަފްތާ ތެރޭގައި އެމެރިކަން އެމްބަސީ ކުރިމަތީގައި ކުރި މުޒާހަރާވެސް ފުލުހުން ވަނީ ހުއްޓުވާފައެވެ. އަދި ޔޫއޭއީ އެމްބަސީ ދޮށުގައި އިހުތިޖާޖު ކުރި ބަޔަކުވެސް ވަނީ ހައްޔަރުކޮށްފައެވެ.