މަސްވެރިންގެ ފާޑުކިޔުންތައް އަމާޒުވުމާއެކު، ރާއްޖޭގައި ލޭނު މަސްވެރިކަމުގެ ހުއްދަ ނުދޭން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެފަހުން ނިންމަވައިފިއެވެ.
ރައީސް އޮފީހުން މިއަދު ބުނީ ރާއްޖޭގައި ލޭނު މަސްވެރިކަމުގެ ހުއްދަ ދޭން ވަޒީރުންގެ މަޖީލީހުން ނިއްމި ނިއްމުމަށް އަމަލު ނުކުރަން ރައީސް މުއިއްޒު ނިއްމަވާފައިވާ ކަަމަށެވެ.
އެމަނިކުފާނު އެގޮތަށް ނިއްމެވީ ބޮޑު ކަންނެލި މަސްވެރީންގެ ޔޫނިއަންގެ ފަރާތުން ހުށަހެޅި ކަންތައްތަކަށް ރިއާރަތްކޮށް ކަމަށް ރައީސް އޮފީހުން ވަނީ ބުނެފައެވެ.،
ޚާއްޞަ އުސޫލެއްގެ ދަށުން ލޯބޮޑު ކަންނެއްޔާއި ރީނދޫއުރަހަ ކަންނެލީގެ މަސްވެރިކަމަށް ލޭނު އަޅަން ހުއްދަދޭން ވަޒީރުންގެ މަޖިލީހުން ނިންމެވިއެވެ.
އެނިއްމުމާ އެއްގޮތަށް އަންނަ ފެބުރުއަރީ މަހުގެ ތެރޭގަައި ލޭނު އަޅަން ހުއްދަ ދޭނެ ކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުމުން ތިމާވެއްޓާ ބެހޭ ވަރަށް ގިނަ ޖަމިއްޔާތަކުން ކަންބޮޑުވުން ފާޅުކޮށް އެ ނިއްމުން އަނބުރާ ގެންދަން ވަނީ ސަރުކާރަށް ގޮވާލާފައެވެ.
އެހެންކަމުން ފާޑުކިޔުންތައް އަމާޒުވެ މަސްވެރިންގެ ކަންބޮޑުވުންތައް އޮހެން ފެށުމުން ސަރުކާރުން މިވަނީ ގޮތްހުސްވެ ލޭނު މަސްވެރިކަމަށް ހުއްދަ ނުދޭން ނިންމާފައެވެ.
