ރައްޔިތުންގެ މަޖިލިސް ޗުއްޓީގެ ކުރިން ރައީސް ޑރ މުހައްމަދު މުއިއްޒު ދޭ 50،000ރ ނުލިބޭނެކަމަށް މަޖިލީހުގެ ރައީސް އަދި ޕީއެންސީގެ ޗެއާރ ޕާސަން އަބްދުއްރަހީމް އަބްދުﷲ (އަދުރޭ) އެންގުމުން ޕީއެންސީ މެމްބަރުން ރުޅިގަދަވެއްޖެ އެވެ.

ނަން ހާމަނުކުރުމަށް ޝަރުތުކޮށް "ތޭރަ އޮންލައިން" އަށް މައުލޫމާތު ދެއްވި ޕީއެންސީގެ މަޖިލިސް މެމްބަރަކު ވިދާޅުވީ ކޮންމެ މަހަކު ދެމުން އައި 50،000ރ ކުރިޔަށް އޮތް ދެ މަހުގައި ދެވެން ނެތްކަމަށް ރައީސް މުއިއްޒު، މަޖިލިސް ރައީސް އަދުރޭ ލައްވާ ބައްދަލުވުމެއް ކުރިޔަށްގެންގޮސް މެމްބަރުންނަށް އެންގިކަމަށެވެ.

އެ މެމްބަރު މައުލޫމާތު ދިންގޮތުގައި، އަދުރޭ އިސްވެ ހުންނަވާ ދާދިފަހުން މެމްބަރުންނާއެކު ކުރިޔަށްގެންދެވި އެ ބައްދަލުވުމުގައި 50،000ރ ދެން ދެވޭނީ މަޖިލިސް ޗުއްޓީ ނިމި ޖަލްސާތައް ފެށި ސަރުކާރު ދިފާއުކުރުމުގައި މަސައްކަތް ކުރައްވާ މެމްބަރުންނަށް އެކަނިންނެވެ.

އެވަގުތު މެމްބަރުންތައް އަޑުގަދަކޮށް އަބަދުވެސް ސަރުކާރު ދިފާއުކުރާކަމަށް ބުނުމުން އަދުރޭ ވިދާޅުވީ މިހާރަށްވުރެ ބޮޑަށް ސަރުކާރު ދިފާއުކުރުމަށް ކަމަށް ވެސް އެ މެމްބަރު ވިދާޅުވިއެވެ.

"ބައެއް މެމްބަރުން ވަރަށް ހިތްހަމަނުޖެހިފައި ހުރީ، ދެން އެހެންތާވާނީ ވެސް. ފުރަތަމަ ބުނީ އެއް ލައްކަ ރުފިޔާ ދޭނަމޭ، ދެން ދޭން ފެށީ 50،000ރ. ދެން އަނެއްކާ މިހާރު އެވެސް ދެވެން ނެތޯ. މިއީ ދެން އަބްދުއްރަހީމް ވިދާޅުވިގޮތް." މެމްބަރު ވިދާޅުވިއެވެ.

މި މަސްތަކުގައި 50،000ރ ނުދޭން ނިންމެވީ ކީއްވެގެންތޯ ބައެއް މެމްބަރުން އެހުމުން، އަދުރޭ ވިދާޅުވީ މިވަގުތު އެހާވަރަށް ފައިސާ ނެތުމުގެ ސަބަބުން ހުރިހާ މެމްބަރުންނަށް އެހާބޮޑު އަދަދެެއް ދެވެން ނެތުމުން ރައީސް މުއިއްޒު އެގޮތް ނިންމެވީކަމަށެވެ. އެހެންނަމަވެސް މާލީ ހާލަތު ރަނގަޅުވުމުން ކުރިން ވީވައުދާ އެއްގޮތް މަތިން މެމްބަރުންނަށް ކޮންމެ މަހަކު އެއް ލައްކަ ރުފިޔާ ރައީސް މުއިއްޒު ދެއްވާނެކަމަށް ވިދާޅުވެ އަދުރޭ ވަނީ މެމްބަރުންނަށް އެ ޔަގީންކަން އަރުވާފައެވެ.

ރައްޔިތުންގެ މަޖިލީހުގައި ސަރުކާރު ތަމްސީލް ކުރާ ޖުމްލަ 75 މެމްބަރުން ތިބޭއިރު އެ މެމްބަރުންނަށް ބައި ލައްކަ ރުފިޔާ ދޭން މަހެއްގެ މައްޗަށް 3.75 މިލިއަން ރުފިޔާ ހޭދަވާނެ އެވެ.އެ ފައިސާއާ ނުލައި ވެސް ކޮންމެ މަޖިލިސް މެމްބަރަކަށް 82،500 ރުފިޔާ ލިބިގެންދެޔެއެވެ.

ރައީސް މުއިއްޒުގެ ފަރާތްޕުޅުން ކޮންމެ ސަރުކާރުގެ މެމްބަރަކަށް 50،000ރ ދޭވާހަކަ ސަރުކާރުން ވަނީ ދޮގުކޮށްފައެވެ. އެހެންނަމަވެސް މިވާހަކަ ސަރުކާރުގެ ދެތިން މަޖިލިސް މެމްބަރުންވަނީ މި ނޫހަށް ކަށަވަރުކޮށްދެއްވާފައެވެ.