ރައީސް އަބްދުﷲ ޔާމީން އަބްދުލްގައްޔޫމްގެ ޒައާމަތަކީ ރާއްޖެ ތަރައްގީގެ ރޮނގުގައި އިންގިލާބީ ބަދަލުތަކެއް ގެނެސްދިން އަހަރުތަކެކެވެ. އެ އަހަރުތަކަކީ ރާއްޖޭގެ ތާރީޚުގައި ރަން އަކުރުން ފެވި، ތަރައްގީގެ އެ މަޝްރޫއުތަކުގެ ފައިދާ މިހާރު ވެސް ގައުމަށް ލިބި ލިބި ހުރި މަޝްރޫއުތަކެކެވެ. މިއަދު އަނެއްކާވެސް މި ފާހަގަކުރަނީ އެފަދަ ދެވަނައެއް ނުވާ މަޝްރޫއެއްގެ ހަ ވަނަ އަހަރީ ދުވަހެވެ.

ސިނަމާލެ ބްރިޖަކީ ތަރައްގީގެ ގޮތުން ރާއްޖޭގެ ތާރީޚު ބަދަލުކޮށްލި މަޝްރޫއެކެވެ. ބްރިޖު ނޭޅޭނެ ކަމަށް ބުނި ކިތަންމެ ބަޔެއްގެ ބަސް ހުއްޓުވާލި މަޝްރޫއެކެވެ. ރައީސް ޔާމީންގެ ފަސް އަހަރުގެ ޒައާމަތުގައި ތަރައްގީ ކޮށްދެން ބުނި ސިނަ މާލެ ބްރިޖު، އެމަނިކުފާނުގެ ވައުދުފުޅާ އެއްގޮތަށް، ތަރައްގީކޮށް، ރަސްމީކޮށް ހުޅުވީ 2018 ވަނަ އަހަރުގެ އޯގަސްޓު މަހުގެ 30 ވަނަ ދުވަހުއެވެ. އޯގަސްޓު 30 ވަނަ ދުވަހުގެރޭ ހަވާގެ ރީތި ވިދުންތަކާއި ކުލަތަކާއެކު ބްރިޖު ހުޅުވުން ވެގެން ދިޔައީ މުޅި ގައުމު ހިނިތުންކޮށްލުވި ކަމަކަށެވެ. ރައްޔިތުންގެ މޫނުތައް އުފަލުން ފޮޅިގެން ދިޔަ ކަމަކަށެވެ. ސާފުވެގެން ދިޔައީ ސިނަމާލެ ބްރިޖަކީ ދެ ރަށެއް ގުޅުވައިދޭ މަޝްރޫއެއް އެކަނި ނޫން ކަމެވެ. އޭގެ ބަދަލުގައި، އެއީ ދިވެހީންނަށް ތަރައްގީގެ ކިތަންމެ ހަރުފަތެއް ގިރާކޮށް، ކުރިއަށްދެވޭނެ ކަމުގެ އުއްމީދުތަކެއް ގެނުވި މަޝްރޫއެކެވެ. ތަރައްގީގެ އާ ބެންޗު މާކެއް ރައީސް ޔާމީނު ޖެއްސެވި ދުވަހެކެވެ.

ސިނަމާލެ ބްރިޖުގެ ބޮޑު މަޝްރޫއު ނިމި، އޭގެ ބޭނުން ދިވެހިން ހިފަމުން އަންނަތާ މިއަދަށް ހަ އަހަރު ފުރޭއިރު، އެދުވަހުން ފެށިގެން މިއަދާ ހިސާބަށް، އެ ބްރިޖުގެ ފައިދާ އާއި މަންފާ ނުކުރާ ދިވެއްސެއް ނެތެވެ. އާއްމު ދިރިއުޅުމަށް ބެލި ނަމަވެސް، އެންމެ ބްރިޖަކުން ކިތަންމެ އާއިލާއަކަށް ލުއި ފަސޭހަކަން ގެނުވިއެވެ. ރާއްޖެ ފަދަ ތަރައްގީ ވަމުން އަންނަ ކުޑަ ގައުމަކަށް ބަލާއިރު، ތަރައްގީ މެކުހަށް ޖަހައި، 21 ވަނަ ގަރުނުގެ ޒަމާނާ އެއްގޮތް ތަރައްގީ ހޯދުމުގައި ދިވެހީނަށް ފައި ހަމަކުރަން ލިބުނު ފުރުސަތަކަށް ވެސް ވެގެން ދިޔައީ ހަމަ އެ ސިނަމާލެ ބްރިޖެވެ.

އެންމެ ފުރަތަމަ ބްރިޖުގެ މަސައްކަތް ފެށިއިރު، އެކަމާ ދެކޮޅުވެ، ބްރިޖު ނޭޅޭނެ ކަމަށް ބުނެ ކިތަންމެ ބަޔަކު ވާހަކަދެއްކިއެވެ. ބްރިޖު އެޅިއްޖަނަމަ، ބްރިޖުގެ އެއްކޮޅުން އަނެއްކޮޅަށް އެކޮޅުކޮޅުން ހިނގާނެ ކަމަށް ބުނާ ހިސާބަށް، ސިނަމާލެ ބްރިޖު ނޭޅޭނެ ކަމަށް ޔަގީން ކުރި މީހުންގެ ބަސް މަގު ދިޔައެވެ. ރައީސް ޔާމީންގެ ފަސް އަހަރުގެ ޒައާމަތު ނިމުމުގެ ކުރިން، އެމަނިކުފާނުގެ އެ ވައުދު ފުއްދާ ބްރިޖުގެ ހުވަފެނުގައި ފުރިހަމައަށް ކުލަ ޖައްސައިދިނެވެ. ބްރިޖުގެ ހުވަފެން ހަގީގަތަކަށް ހަދައިދެއްވާ، ރައީސް ޔާމީން އަބަދުވެސް ރައްޔިތުންނަށް ދަސްކޮށްދެއްވީ، ބޮޑެތި އުއްމީދުތައް ކޮށް، ތަރައްގީގެ ބޮޑެތި ހުވަފެންތައް ދެކުމަށެވެ. އެއީ ރައީސް ޔާމީން ގައުމަށް ގެނެސްދިނީ އެފަދަ ބޮޑެތި އަދި މުހިއްމު ތައްރައްގީތަކަށް ވުމުންނެވެ.

ސިނަމާލެ ބްރިޖަކީ ޗައިނާ އާއި ރާއްޖޭގެ ޚާރިޖީ ގުޅުމާއި އެކުވެރިކަމުގެ ވެސް ރަމްޒެކެވެ. ހަމައެއާއެކު، ހިންގުންތެރި ކަމާއި ހިކުމަތްތެރިކަމާއެކު، ގައުމު ކުރިއަށް ގެންގޮސްދޭނެ ގާބިލު ވެރިއެއްގެ ފަރާތުން ގައުމަށް ގެނުވާނެ ތަރައްގީގެ ވެސް ލާމަސީލު އަދި ފުރިހަމަ މިސާލެކެވެ. ސިނަމާލެ ބްރިޖަކީ ދިވެހީންނަށް ތަރައްގީ ދަސްކޮށްދެއްވި ވެރި މީހާގެ ޒައާމަތުގައި ގައުމަށް ލިބުނު އިންގިލާބީ ކުރިއެރުމެކެވެ. މިއަދު ބްރިޖުގެ މަންފާ ހޯދަމުންދާތާ 6 އަހަރު ގުނަމުންދާއިރު، ތަރައްގީގެ އެ ދިގު ފާލަން އަޅާ، ތަރައްގީއާއި ދިވެހިން ގުޅުވާލަދިން މޭސްތިރިޔާ މަތިން ހަނދާން ނައްތާލެވޭކަށް ނެތެވެ.

ވެރިކަމުގެ ހަމަ އެންމެ ފަސް އަހަރުގައި ބްރިޖު އަޅާ ތަރައްގީގެ އެތައް މެގަރ މަޝްރޫއުތަކެއް ދިވެހީންނަށް ތިލަކޮށްދެއްވި ލީޑަރުގެ މަތިން މިއަދު ދިވެހީން ހަނދާން އާކުރެއެވެ. އެއީ އެމަނިކުފާނުގެ ވެރިކަން ބަދަލުކުރުމާއެކު ދިވެހިންގެ ތަރައްގީ ހުއްޓި ގައުމު ފަހަތަށް ސޮއްސާލާފައިވާތީއެވެ. މުޅި ގައުމުން މިއަދު ފެންނަމުންދަނީ ރައީސް ޔާމިނުގެ ޒައާމަތަކަށް އެދޭ މަންޒަރެވެ. މީގެ 6 އަހަރު ކުރިން މި ދުވަސް ދިވެހި ތާރީޚުގެ ތެރެއަށް ދިޔައީ، ފަނޑުވުމެއް ނެތް ގޮތުގައި ރަން އަކުރުން ލިޔެވިގެންނެވެ. ވީ ވައުދު ރަނުންރަނަށް ފުއްދާ ދިނުމަކީ މިއީއެވެ.

މިއީ ރާއްޖޭ ތަރައްގީގެ މަގުގައި އެޅި އެންމެ ބޮޑު އެއް ފިޔަވަޅެވެ. ހިންޏަށް ހަކުރު އޮޅުވާނުލެވޭނެ ފަދައިން މި މަޝްރޫއަކީ ރައީސް ޔާމީންގެ ތަރައްގީކަން ދިވެހި ރައްޔިތުންނަށް އޮޅުވާނުލެވޭވެއެވެ. ކުލަ ބަދަލުކޮށް ހަގީގަތް އޮޅުވާލަން ބަޔަކު މަސައްކަތްކުރި ނަމަވެސްއެވެ.

ފެހި ފަހި ފިޔާތޮށި ކުލަޔަކުން އާފާގު ޒީނަތްކޮށްފިއޭ

ކެހި ފުސް ވިލާތައް އުދަރެހުން މުސްތަޤުބަލެއް ދައްކައިފިއޭ

އޮޅުދޫ ކަރައިގެ ހުޅަނގު ފަރާތުން ފެންނަ ކުދި ރަށްތައް

ގުޅުވާ ދަގަނޑު ފާލަންތަކުން ތަހުޒީބުން އައު ކޮށްފިއޭ

ޔުނިވާސިޓިއާ ކޮލެޖުތައް މާލޭގެ އަގުމާތް ބިންގަނޑުން

އުނިކަން މި ޖަހުލީ ފިލުވުމަށް ތައުމީރުތައްކުރެވިއްޖެއޭ