ރައްޔިތުންގެ ބޭންކް (ބޭންކް އޮފް މޯލްޑިވްސް) އިން ސަރުކާރު ވައްޓާލަން އުޅުނު ކަމަށް ބުނާ މައްސަލައިގައި ބީއެމްއެލްގެ ރަސްމީ ބަޔާނެއް ފުލުހުން ނަގައިފި އެވެ.

ބަގާވާތުގެ ތަހުގީގަށް ބަޔާނެއް ދޭން އެންގުމުން ބީއެމްއެލްގެ ފަރާތުން އެ ބަޔާން މިހާރު ފުލުހުންނަށް ފޮނުވާފައިވާފައެވެ.

ނަމަވެސް އެ މައްސަލައިގައި ބޭންކުގެ އެއްވެސް މުވައްޒަފަކަށް ޖިނާއީ ތުހުމަތު އަދި ނުކުރާކަމަށް ވަނީ މައުލޫމާތު ލިބިފައެވެ.

ފުލުހުން ބުނީ ބީއެމްއެލް އިން ދިވެހި ރުފިޔާ އެކައުންޓުތަކަށް ދެމުން އައި ޑޮލަރު ސަޕޯޓު ކަނޑާލި ވަގުތު އިގްތިސާދީ ހާލަތު ކިޔައިދޭން އެމްޑީޕީން ނޫސްވެރިންގެ ބައްދަލުވުމެއް ބޭއްވީ އިއްތިފާގުން ނޫން ކަމަށެވެ.

އެއީ ސަރުކާރު ވައްޓާލަން ހިންގި ރޭވުމުގެ ބައެއް ކަމަށް ފުލުހުން ބުނެ އެވެ. އެ ޕްރެސްގެ ފަހުން ސޯޝަލް މީޑިއާގެ ބޮޓު އެކައުންޓުތަކެއް ބޭނުންކޮށްގެން މަގު މައްޗަށް މީހުން ނެރެން މަސައްކަތްކޮށްފައިވާ ކަމަށް ވެސް ފުލުހުން ބުނެ އެވެ.

ޑޮލަރު ސަޕޯޓު ކަނޑާލި ދުވަހު ބީއެމްއެލްގެ ސީއީއޯ ކާލް ސްޓްމަކް ވަނީ ރައީސް އޮފީހަށް ވަޑައިގެންފަ އެވެ. އަދި ފަހުން ބޭންކުގެ ރެގިއުލޭޓަރު މޯލްޑިވްސް މަނިޓަރީ އޮތޯރިޓީން އަންގައިގެން ބޭންކުގެ ނިންމުން ވަނީ ހަމަ އެ ދުވަހު އަނބުރާ ގެންގޮސްފަ އެވެ.

ބަގާވާތުގެ ތަހުގީގު ކުރަމުން އަންނަތާ ހަފުތާއަކަށްވުރެ ގިނަ ދުވަސް ފާއިތުވެފައިވާއިރު މިހާތަނަށް އެ މައްސަލައިގައި މީހަކު ހައްޔަރުކޮށްފައެއް ނުވެ އެވެ. އަދި ކުށުގެ ތުހުމަތުގައި މީހަކާ ސުވާލެއް ވެސް ނުކުރެ އެވެ. އެ މައްސަލައާ ގުޅިގެން އެއްވެސް މީހެއްގެ ޕާސްޕޯޓު ހިފަހައްޓާފައެއް ވެސް ނުވެ އެވެ.

ޕީއެންސީން ބޭއްވި ޖަލްސާއެއްގައި ރައީސް މުއިއްޒު ވިދާޅުވީ ބަގާވާތެއް ކުރަން އުޅުނު ކަން ބުއްދި ހުރި ކޮންމެ މީހަކަށް ވެސް ސާފުވާނެ ކަމަށެވެ.