ގައުމުގައި މާލީ ދަތިކަން އިންތިހާއަށް ހުއްޓާ އަނެއްކާވެސް ސިޔާސީ މަގާމަކަށް ބޭފުޅަކު އައްޔަންކޮށްފިއެވެ.

މާލީ ތާށިކަން އިންތިހާއަށް ބޮޑުވެ ސަރުކާރުގެ ހަރަދުތައް ކުޑަކުރުން ނޫން ގޮތެއް ނެތް ކަމަށް ބައިނަލްއަގުވާމީ މާލީ އިދާރާތަކުން ބުނެ ކަންބޮޑުވުން ފާޅުކުރަމުންދާ ދަނޑިވަޅެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޭފުޅަކު އައްޔަންކުރައްވާފައިވަނީ އެޑިއުކޭޝަން މިނިސްޓަރީގެ ސީނިއާރ ޕޮލިޓިކަލް ޑިރެކްޓަރެއްގެ މަގާމަށެވެ.

އެގޮތުން ސިޔާސީ މަގާމުތައް މަދުކޮށް ބޭކާރު ކަރަދުތައް ހުއްޓާލުމަށް މާލީ އިދާރާތަކުން ލަފާދީފައިވަނިކޮށް، އެޑިއުކޭޝަނަށް ސީނިއާރ ޕޮލިޓިކަލް ޑިރެކްޓަރެއްގެ ގޮތުގައި އައްޔަނު ކުރީ ހަބީބު މުހައްމަދުއެވެ. އެޑިއުކޭޝަނުގެ ސީނިއާރ ޕޮލިޓިކަލް ޑިރެކްޓަރުގެ މަގާމަށް ހަބީބު އައްޔަނު ކޮށްފައިވާކަން ތޭރަ އޮންލައިންަށް ވަނި ކަށަވަރުވެފައެވެ.

އެޑިއުކޭޝަން މިނިސްޓަރީގެ ސީނިއާ ޕޮލިޓިކަލް ޑިރެކްޓަރެއްގެ މަގާމަށް ހަބީބު އައްޔަނު ކުރިކަން އޭނާ ވަނީ ސޯޝަލް މީޑިއާގައި އިއުލާނު ވެސް ކޮށްފައެވެ.

އެޑިއުކޭޝަނުގެ ސިޔާސީ މަގާމަކަށް ހަބީބު އައްޔަނު ކުރިއިރު، މިދިޔަ މެއި 1 އާ ހަމައަށް އެ މިނިސްޓަރީގައި 32 ސިޔާސީ މުވައްޒަފުން ތިބިކަމަށް މި ނޫހަށް މައުލޫމާތު ދީފައިވެއެވެ.

އެ ހުރިހާ ސިޔާސީ މުވައްޒަފުންގެ މުސާރައަށް ކޮންމެ މަހަކަށް އެއް މިލިއަނަށްވުރެ ގިނަ ރުފިޔާ ހަރަދު ކުރެ އެވެ. އަހަރެއްގެ މައްޗަށް ބަލާނަމަ، އެ މުވައްޒަފުންނަށް މުސާރަ ދިނުމަށް 12.2 މިލިއަން ރުފިޔާ ހަރަދު ކުރެ އެވެ. ފަސް އަހަރަށް ހިސާބުކުރާ ނަމަ އެއީ 61.2 މިލިއަން ރުފިޔާ އެވެ.

އިތުރު ޕޮލިޓިކަލް ޑިރެކްޓަރަކާއެކު އަނެއްކާވެސް ސިޔާސީ މަގާމުތައް އިތުރުވެގެން ދާއިރު، މިއީ 700 ވުރެ ގިނަ ސިޔާސީ މަގާމުތައް ނުއުއްފައްދާނެކަމުގެ ވައުދާއެކު އައި ސަރުކާރެއްކަން ފާހަގަކޮށްލެވެއެވެ. ނަމަވެސް މިހާރވެސް ސިޔާސީ މަގާޟުތައް 2000 އަށް ވުރެ މައްޗަށް އަރާފައިވާކަން ހާމަވެއެވެ.

ގައުމުގެ މާލީ ހާލަތު ދަށްވެ ބޮޑު ކާރިސާއެއްގެ ތެރެއަށް ގައުމު ވެއްޓިފައި އޮތް ނަމަވެސް ސަރުކާރުގެ ޚަރަދުތައް ކުޑަނުކުރާތީ ރައްޔިތުން ގެންދަނީ ސަރުކާރަށް ނުރުހުން ފާލުކުރަމުންނެވެ. ސަރުކާރުން ބުނަމުން ދަނި ޚަރދު ކުޑަކުރަން ރައްޔިތުން ގަރުދިޔަ އާ ބަތް ކާން ޖެހޭ ކަމަށެވެ.