ނުވަ މަސް ދިހަކޮށް މައިމިހާވެސް ދަރިފުޅު ވިހާއިރު މި ޒަމާނުގައި ގިނަ ފަހަރުގައި ދަރިފުޅުގެ ސިއްހީ ހާލަތު ވަރަށް ދުޅަހެޔޮއެވެ. ނަމަވެސް ބައެއް ފަހަރު ސްކޭން ޑޮކްޓަރަށްވެސް ނުފެންނަ ކަންކަން ހުރުމުން ދަރިފުޅުގެ ބަލި ހާލަތު ދެނަ ނުގަނެވި ދަރިފުޅު ދުނިޔެއަށް އުފަންވެއެވެ. އެހާ ހިސާބުން ދަރިފުޅު ދޫކޮށްލެވެން ނެތި އެ ދަރިފުޅުގެ ހާލަތަށް ހަމްދަރުދީވުން ނޫން ގޮތެއް ނެތި، މަންމައާ ބައްޕައަށް މަޖްބޫރުވަނީ ދަރިފުޅު ގޮވައިގެން ވީ ހާލެއްގައި ވާންށެވެ.

އާދެ! ދިވެހިންގެ އަދުގެ ވެރިކަން ވެސް މިއޮތީ އެފަދަ ހާލެއްގައެވެ. ރައްޔިތުންގެ މެޖޯރިޓީއާ އެކު ގެނައި ވެރިކަމުގައި ވީ މަދު ދުވަސްކޮޅުގައި ހެދި ގިނަ ގޯސްތަކުގެ ސަބަބުން ރައްޔިތުން ސަރުކާރު މަތިން ފޫހިވެ އުއްމީދު ގެއްލުނު ނަމަވެސް އުފެދިފައި އޮތް ގާނޫނީ ވެރިކަމެއް ވައްޓާލުމަކީ ކުށަކަށްވުމުން މިއަދު ދިވެހިންނަށްވެސް މިވަނީ މި ވެރިކަމާ އެކު ކުރިއަށް އޮތް 4 އަހަރު އަހަރާ 2 މަސް ވެސް ހޭދަ ކުރަން ޖެހިފައެވެ.

ސަރުކާރަށް ނުވަ މަސްވެ ގަރުބަ ގަނެ ވިހެއިއިރު ސަރުކާރުގެ މަސް ފަހި ނުވުމުން ހާލަތު އޮތީ ނިކަން ދެރަވަރުކޮށެވެ. ފޫޅު ކަރަށް އޮޅި ނޭވާލާން ދަތިވުމުގެ ނަތީޖާއަކަށް ވެގެން ގޮސްފައިވަނީ އޮކްސިޖަން އެއްވަރެއްގައި ހިފެހެއްޓުމަށް ސަރުކާރުގެ މަގާމުތަކުގައި ތިބި މީހުން މަސައްކަތްކުރަން ޖެހުމެވެ.

އާދޭ! ސަރުކާރުގައި ބޮޑު މުސާރައިގައި ތިބި ހުރިހާ ބޭފުޅުނަށް ޖެހެނީ ރައީސް މުހައްމަދު މުއިއްޒުގެ ސަރުކާރު ދިފާއުކޮށް ވާހަކަ ދައްކަންށެވެ. އެއީ ކިތަންމެ ބޮޑު ދޮގެއް ހެދި ނަމަވެސް މެއެވެ.

އެގޮތުން ބަލާއިރު ސަރުކާރަށް ނުވަމަހާ 19 ދުވަސްވީއިރު ވެރިންގެ ކިބައިން ފެންނަނީ ދޮގާ މަކަރާ އޮޅުވާލުމެވެ. ރައީސް އަބްދުﷲ ޔާމީންގެ ނަންފުޅާ ހުސްގޮނޑި އަދި ފޮޓޯވެސް ދައްކައިންގެން ވެރިކަމަށް އައިސް މިހާރު ސަރުކާރުން ގެންދަނީ ބޮޑެތި މުޖުރިމުންގެ ގޮތުގައި ރާއްޖޭގެ ޝަރުއީ ނިޒާމުން ކަނޑައަޅަފައި ތިބި މީހުން މެދުވެރިކޮށް ރައީސް ޔާމީންގެ ތަރައްގީއަކީ މި ސަރުކާރުގެ ވެރިންގެ ޕްރޮޖެޓުތަކެއްގެ ގޮތުގައި ނަންކުރުމަށް މަސައްކަތްކުރުވަމުންނެވެ.

ދިވެހިރާއްޖޭގެ ތަރައްގީގެ އޮއިވަރު ބަދަލުކޮށްލި ތާރީޚީ ބުރިޖަކީ ރައީސް މުއިއްޒުގެ މަޝްރޫއެއްކަމަށް ދެއްކުމަށް ނިދާ މެޝިންގައި އޮތް މުޖުރިމަކު ހޭލައްވައިގެން މިސަރުކާރުން މަސައްކަތްކުރަމުންދާއިރު ސަރުކާރަށް ނުވަ މަހުގެ ތެރޭގައި ރައްޔިތުންގެ ހައްގުގައި ކޮށްދެވުނީ ކޮން ކަމެއްތޯ މިއީ މިއަދު ސުވާލު އުފައްދަން ޖެހޭ ކަމެކެވެ. އެންމެ ފުރަތަމަ އައިސް މެޑަލް ޖަހަން، ނަން ބަދަލުކޮށް ވެސް ފެށީ ރައީސް ޔާމީންގެ ޕްރޮޖެކުޓެކެވެ. ފުށިދިއްގަރު ފަޅުން ރަސްމާލެއަށް ނަން ބަދަލުކޮށް ކަނދިކަމަނާގެ މަސް ތެލުލާން ފެށިއެވެ. އެކަން ވެސް ތެޔޮ އެތި ހޫނުވެ ދުން އެރިއިރުވެސް ގުޑާ ނުލައެވެ.

ދެން އޮތީ ކުރީ ސަރުކާރުން ދިން ގޯތިތަކާ ފްލެޓުތަކުގެ ވާހަކައެވެ. އެކަންކަން ކުރުމުގައިވެސް ނުކުޅެދުމުން ދެން ފެށީ ދޮގުހަދަންށެވެ. އެ ދޮފުތައް ފަޅާއަރަން ފެށުމުން ދެން ފެށީ ވަޒީރުންނާ މަޖިލިސް މެމްބަރުން މެދުވެރިކޮށް ދޮގުތަކުން ނެއްޓެން ދޮގު ހައްދަން ފެށި މަންޒަރެވެ. ދޮގުތައް ވަރުގަދަ ކުރުމަށް ވަކަރަށް ޖަހުވާތަނެވެ.

ބީއެމްއެލްގެ ބަޣާވާތޭ ކިޔާ އެ ބޭންކުގެ އަގު ސަރުކާރުގެ ތެރެއިން ވައްޓާލިއިރު އޭގެ ފަހަތުގައިވެސް އޮތީ ހުސް ދޮގާ މަކަރެވެ.

ލޭނުގެ މަސްވެރިކަން ކުރުމުގެ މައްސަލަ ބޮޑުވެ ރައްޔިތުން ރަތަށް އަރާފައި ތިއްބާ ދެން އިވުނީ ލޭނެއް ކަނޑުއޮޅި ގިރާކޮށް ގޮސްގެން ގެއްލިގެން އުޅޭ ވާހަކައެވެ. ގޮސް މާފަންނުކޮށްގައި އެ ލޭނު ކޮޅަށް ޖެހިފައި ހުރި ވާހަކއެއްވެސް އަޑުއިވެއެވެ. އެކަމަށްވެސް ދޮގެވެ. ހުސް ދޮގެވެ. ދޮގުން ނެއްޓެންވެސް ދޮގެވެ.

ސިއްރު ކުރާނެ އެއްވެސް ކަމެއް ނޯންނާނެ ކަމަށް ވިދާޅުވި ނަމަވެސް އަދިވެސް ކުރީ ސަރުކާރުން އިންޑިއާއާ އެކުވި އެއްބަސްވުންތައް ހުރީ ހާމަނުކޮށެވެ. ވެރިކަން ލިބުމުން ކުރިން ބުނި ހުރިހާ އެއްޗެއް އެކަމުގައި ކެންސަލްވެ ކުރީ ސަރުކާރުން ކީ ލަވަ މި ސަރުކާރުންވެސް އައު ގޮތަކަށް ކިޔަން ފެށިއެވެ.

އިންޑިއާ ސިފައިން ބާލާނެ ކަމަށްވީ ވައުދު އެމީހުންގެ ޔުނިފޯމު ބާލާ ގަންޖުފަރާހަށް ބަދަލުކޮށް އޮޅުވާލާ އެ ދޮގުވެސް ވަކަރަށް ޖެހިއެވެ.

ސަހްޔޫނީންގެ ޕާސްޕޯޓުގެ މައްސަލައިގައިވެސް ގެންދަވަނީ ނުހަނު ރީތި ސްކްރިޕްޓަކަށް ޑްރާމާ ކުޅުއްވަމުންނެވެ. ނަމަވެސް ވިދާޅުވަނީ ދެމި ތިބީ ފަލަސްތީނާ އެކު ކަމަށެވެ.

އެހެންކަމުން އިޚުލާސްތެރިވެރި ހާމަކަން ބޮޑު ސަރުކާރެއްގެ ވައުދާއެކު އައިސް ރައީސް މުއިއްޒު ގެންދަވަނީ، ދޮގުތައް ވަކަރަށް ޖެހުމުގައާ ކަނދި ކަމަނާގެ މަސްތެލުލުމުގައި މެކުހަށް ޖަހަމުންނެވެ. ކުރާނެކަމެއް ނެތްތާ އެވެ. ދައްކަވަން ހުރި ތަނެއް ދައްކުވާފައި މެނުވީ ނުގެންދަވާނެ ވިއްޔާއެވެ.