މާލީ ދަތިތައް ކުރިމަތިވެފައިވާތީ، މުޅި ދައުލަތުގެ ހަރަދުތައް ކުޑަކުރުމުގެ މަސައްކަތް ސަރުކާރުން ފަށާފައި ވަނިކޮށް ފ. އަތޮޅު ކައުންސިލްގެ ހަރަދުގައި އެ އިދާރާގެ 20 މުވައްޒަފަކު ސްރީލަންކާއަށް ފޮނުވަން ހަމަޖެއްސުމާ ގުޅިގެން އަމިއްލަ ފަރާތަކުން އެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އަށް ހުށަހަޅައިފިއެވެ.

މައުލޫމާތު ލިބިިފައިވާ ގޮތުގައި، މައްސަލަ އޭސީސީއަށް ހުށަހަޅާފައިވަނީ އަމިއްލަ ފަރާތަކުންނެވެ. ނަމަވެސް އޭސީސީން މިކަމުގައި އަދި ވަކި އެއްޗެއް ބުނެފައެއް ނުވެއެވެ.

މައުލޫމާތު ލިބިފައިވާ ގޮތުގައި، ފ. އަތޮޅު ކައުންސިލްގެ 20 މުވައްޒަފުން ލަންކާއަށް ފޮނުވަނީ ކައުންސިލްގެ ބަޖެޓުން 150،000 ރުފިޔާއަށް ވުރެ ބޮޑު ހަރަދެއް ކޮށްގެންނެވެ.



ފ. އަތޮޅު ކައުންސިލްގެ ބައެއް މުވައްޒަފުންނާ ހަވާލާދީ ބައެއް ނުސްތަލުގައި ރިޕޯޓުކޮށްފައިވާ ގޮތުގައި، އެ ކައުންސިލްގައި ތިއްބަވާ 35 މުވައްޒަފުންގެ ތެރެއިން 20 މުވައްޒަފަކު ލަންކާއަށް ދަނީ ތަޖުރިބާ ހޯދުމަށާއި ޗުއްޓީ ހޭދަކޮށްލުމަށެވެ.