ރާއްޖޭގެ މައި އެއާޕޯޓް "ވެލާނާ އިންޓަނޭޝަނަލް އެއާޕޯޓް" ހިންގާ މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް)ގެ މުވައްޒަފުންނަށް އަހަަރީ ބޯނަސް އަދިވެސް ނުދޭކަން ހާމަވެއްޖެ އެވެ.

މިދިޔަ އަހަރުގެ އަހަރީ ބޯނަހުގެ ގޮތުގައި ކުންފުނީގެ މުވައްޒަފުންނަށް ދޭން ކަނޑައަޅާފައިވަނީ ކިހާވަރެއް ކަމެއް ވެސް އަދި އެ ކުންފުނިން ހާމަކޮށްފައިނުވެ އެވެ.

އަހަރީ ބޯނަހުގެ ގޮތުގައި މުވައްޒަފުންނަށް ދޭ ވަރު އާންމުކޮށް އިއުލާނު ކުރަނީ ކުންފުނީގެ ބޯޑުން ނެރޭ ސާކިޔުލާއަކުންނެވެ.

މިދިޔަ އަހަރު އެމްއޭސީއެލްގެ މުވައްޒަފުންނަށް އޮގަސްޓް މަސް ތެރޭ ބޯނަސްގެ ގޮތުގައި 25،000ރ ޖަމާކޮށްދީފައިވެއެވެ.

އޮގަސްޓް މަސް ނިމިފައިވާއިރު އަދިވެސް އެމްއޭސީއެލްގެ މުވައްޒަފުންނަށް ބޯނަސް ޖަމާކޮށްދީފައިނުވެއެވެ. ބޯނަސް ޖަމާނުކޮށް މާ ލަސް ވަނީ ކީއްވެތޯ ބަލަން "ތޭރަ އޮންލައިން" ގެ ފަރާތުން އެ ކުންފުނީގެ މީޑިޔާ އޮފިޝަލާ ސުވާލު ކުރުމުން އެއްވެސް ޖަވާބެއް ދެއްވާފައިނުވެއެވެ.

މީގެ ކުރިން ހަ މަސް ދުވަހު ނުވަތަ އެއަށްވުރެ ގިނަ ދުވަހު މަސައްކަތް ކޮށްފައިވާ މުވައްޒަފުންނާއި ވަޒީފާއިން ވަކިވި ނަމަވެސް ބޯނަސްގެ ފައިސާ މަސައްކަތް ކުރި ދުވަސްތަކަށް ބަލާފައި ޖަމާކޮށްދެއެވެ.

އެހެންނަމަވެސް މިއަހަރު ވަޒީފާއިން ވަކިވެފައި ތިބި ފަރާތްތަކަށް ބޯނަސް ނުދޭން ނިންމާފައިވާ ވާހަކަތަކެއްގެ އަޑުވަނީ އަރާފައެވެ.

ރާއްޖޭގެ އިގްތިޞާދީ ހާލަތު ދަށްވެފައިވާ ކަމަށް ބުނެ ޚަރަދު ކުޑަކުރުމުގެ ސިޔާސަތެއް ސަރުކާރުން ވަނީ ނަމެއްގައި ފަށާފައެވެ.