ރައްޔިތުންގެ މަޖިލިސް ކުރިމަތީގައި އާދިއްތަ ދުވަހު ސަރުކާރުގެ އިސްވެރިންތަކެއް ނުކުމެ އަޑުގަދަކޮށް މުޒާހަރާ ކުރުމާއި ގުޅިގެން ، ވަކި ބަޔަށް ގްރީން ޒޯންގައި މުޒާހަރާ ކުރެވޭތޯ އައްސަވާ، ކާނަލް ރިޓަޔާޑް އަހުމަދު ފަޔާޒް (ޕާޕާ) ސުވާލު އަމާޒުކުރައްވައިފިއެވެ.

މިފަދައިން ފަޔާޒް ވިދާޅުވެފައި ވަނީ ވަޒީރުންތަކަކަށް ރުހުން ނުދީގެން ކަމަށް ބުނެ ސަރުކާރުގެ އިސްވެރިން މަޖިލިސް ކުރިމަތީގައި މުޒާހަރާ ކުރުމާއި ގުޅިގެން އެކްސް ހޭންޑަލްގައި ކުރި ޕޯސްޓެއްގައެވެ.

އެގޮތުން އެޕޯސްޓުގައި ވަނީ، ޖަސްޓިސް ފޯ އިކުއަލިޓީ ކޮބައިތޯ ސުވާލު އުފައްދަވާފައެވެ.

އިތުރަށް އެޕޯސްޓުގައި ވަނީ، 3 ބާރު ވަކިވެފައިވާ ނިޒާމެކޭ ކިޔާ އަޑުއިވުން ނަމަވެސް، ފެންނަނީ ޤާނޫނު ހަދާ މަޖިލީހުގެ މައްޗަށް ސަރުކާރު އަރައިގަންނަތަން ކަމަށެވެ.

ސަރުކާރަށް އޮންނާނީ މަޖިލީހުން ވަޒީރަކަށް ރުހުން ނުދީފިނަމަ އައު ވަޒީރަކު އައްޔަން ކުރުން ނޫންތޯ ސުވާލު އުފައްދައި، އެ ޕޯސްޓުގައި ފަޔާޒް ވަނީ ސަރުކާރަށް ފާޑުވިދާޅުވެފައެވެ.

ރުހުން ނުދީގެން އަޑު އުފުލާފައިވާއިރު، މިއަދު ކުރިޔަށް ގެންދިޔަ މަޖިލީހުގައި ވަނީ 3 ވަޒީރަކަށް ރުހުން ނުދެން ނިންމައިފައެވެ.