2013 ވަނަ އަހަރުގެ ރިޔާސީ އިންތިޚާބު ކާމިޔާބު ކުރައްވާ މަގާމުގެ ހުވާ ކުރެއްވުމާއި އެކު ރައީސް ޔާމީން އަބްދުއްގައްޔޫމް މަސައްކަތް ކުރެއްވީ އިޖުތިމާއީ ގޮތުންނާއި އިގްތިސާދީ ގޮތުން ރައްޔިތުންނަށް ހެޔޮ ވެރިކަމެއް ކޮށްދިނުމަށް ކަމަށް ޕީއެންއެފްގެ އިސް ސަފުގައި މަސައްކަތް ކުރައްވާ މެންބަރު އަހްމަދު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ޕީއެންއެފްގެ ސިލްސިލާ ޖަލްސާގައި ރޭ ވާހަކަ ދައްކަވަމުން ވަހީދު ވިދާޅުވީ ހެޔޮ ވެރިކަމެއް ކުރުމަށް ނިޔަތްވެސް ހެޔޮވާން ޖެހޭނެ ކަމުގައެވެ.
މިފަދަ ވެރިކަމެއް އެންމެ ފަހުން ރައްޔިތުންނަށް ފެނިފައިވަނީ ރައީސް ޔާމީނުގެ ޒައާމަތުގައި ކަމަށް ވަހީދު ފާހަގަކުރެއްވިއެވެ.
އެމަނިކުފާނުގެ ވެރިކަމުގެ ކްރެޑިޓް މިހާރުގެ މަޖިލިސް ރައީސް ނަންގަވަން އުޅުނަސް އަބްދުއްރަހީމް އަކީ “ލޮސްޓް ކޭސް” އެއް ކަމަށް ޖަލްސާގެ ޑިސްކަޝަންގައި ވަނީ ސިފަކޮށްފައެވެ.
މިގޮތުން ރައީސް ޔާމީން ވެރިކަމާއި ހަވާލުވިއިރު އެއާޕޯޓް ޖީއެމްއާރަށް ވިއްކާލާފައިވާ ކަމަށާއި، ފެން ކުންފުނި އަދި ދިރަާގުގެ ހިއްސާވެސް އޮތީ ވިއްކާލާފައިކަމަށް ވަހީދު ވިދާޅުވިއެވެ.
މި ހާލަތުން ގައުމު ސަލާމަތްކޮށްދެއްވީ ރައީސް ޔާމީން ކަމަށާއި ދެންވެސް މިހާރު ގައުމު ވެއްޓިފައިމިވާ އަނދަވަޅުން ގައުމު ސަލާމަތް ކުރެވޭނީ އެމަނިކުފާނުގެ ހިލްމުން ކަމަށާއި އަބްދުއްރަހީމް އަށް ނޫން ކަމަށް ވަހީދު ފާހަގަކުރެއްވިއެވެ.
