މި ފަހަކަށް އައިސް އެންމެ ބާރަށް އިވޭ އެއް އަޑަކީ ރައީސުލްޖުމްހޫރިއްޔާ ފައިސާއާ އާރާ ބާރު ބޭނުންކޮށްގެން ކަންކަން ހާސިލްކުރަން މަސައްކަތްކުރަމުންދާ ވާހަކައެވެ.

އޭގެ ތެރޭގައި އެމަނިކުފާނު ނުރުހޭ ގޮތަށް ވާހަކައާ މައުލޫމާތު ފަތުރާ މީހުންނާ މެދު ފިޔަވަޅު އެޅުމަކީ ވެސް މިހާރު ރައީސް މުއިއްޒު ކުރައްވަން ގަސްދުކުރައްވާ މަސައްކަތް ފަށާފައިވާ ކަމެކެވެ.

ރައީސް މުއިއްޒު ވެރިކަމަށް އައުމަށް ފަހު މަޖިލިސް އިންތިހާބުގެ ތެރޭގައި ދައުލަތުގެ ފައިސާ ނަހަމަ ގޮތުގައި ބޭނުންކޮށްގެން ގޮނޑިތައް ގަތުމާ އަދި މީގެ އިތުރުން މެމްބަރުން ސަރުކާރުގައި ދެމެހެއްޓުމަށް ފައިސާ ބެހުން ވެސް މިއީ ރައީސް މުއިއްޒަށް ކުރާ ތހުމަތުތަކެވެ.

އެގޮތުން ރައީސުލްޖުމްހޫރިއްޔާގެ ރަސްމީ ގެކޮޅު، މުލިއާގެއިން މަޖިލިސްގައި ތިއްބަވާ ޕިއެންސީ މެމްބަރުންނަށް ފައިސާ ބަހާކަމުގެ ތުހުމަތު ކުރެވެން ފެށުމުގެ އެންމެ ފުން މިނަށް ފީނާ، އޮންލައިން ނޫހަކުން ގެނެސްދިން މައުލޫމާތާ އެކު ދައުލަތް ކޮށި އަރާ އެ ނޫހަށް ފިޔަވަޅު އެޅުވުމުގެ މަސައްކަތް ވަނީ ފަށާފައެވެ.

އެގޮތުން "އަދަދު" ނޫހަށް ފިޔަވަޅު އެޅުމަށް ކަމާ ގުޅޭ އިދާރާތކުގައި ސަރުކާރުން އެދިފައިވާއިރު، އެކަމުގައި ސަރުކާރުން އެހާ ވަރަށް ތެޅޭ ތެޅޭ ތެޅުމުގެ ފަހަތުގައި ސިއްރެއްވާނެކަމަށް ގިނަ ބަޔަކު ބުނެއެވެ.

"އަދަދު" ނޫހުން ރިޕޯޓުކޮށްފައިވާ ގޮތުގައި މަޖިލީހުގައި ތިއްބަވާ ޕީއެންސީގެ ކޮންމެ މެމްބަރަކަށް ކޮންމެ މަހަކުވެސް ބައި ލައްކަ ރުފިޔާ ރައީސްގެ ފަރާތުން ހަދިޔާ ކުރައްވައެވެ. އެ ފައިސާ ހަވާލުކުރަނީ ސީދާ މުލިއާގެއަށް މެމްމަރުން ހާޒިރުކޮށްގެން ކަމަށްވެސް ވެއެވެ.

މި ވާހަކަތައް ފެންމަތިވެ ރައްޔިތުންނަށް ހަގާގަތް ހާމަވާން ފެށުމުން ސަރުކާރުގެ ސޯޓު ބޭލި ރައްޔިތުން ރަތަށް އަރަން ފެށި ފެށުމާ އެކު ސަރުކާރަށް ޑިފެންސަށް ކުޅެން މަޖްބޫރުވުމުން ނޫހަކާ މެދު ފިޔަވަޅު އަޅަން ނިންމީއެވެ.

މިއީ ނަމަވެސް މިނިވަން ނޫސްވެރިކަމާ އެކު ރިޕޯޓުކުރުމުގެ ފުރުސަތު ފާޓު ފުޅާކޮށް ދޭނެކަމުގެ ވައުދާއެކު އައި ސަރުކާރެއްކަން ފާހަގަކޮށްލެވެއެވެ. ހާމަކަން ބޮޑު ފޮރުވުމެއް ނެތް ސަރުކާރަކަށް ވާނެ ކަމަށް އިންތިހާބުގެ ކުރިން ރައީސް މުއިއްޒު ވިދާޅުވި ނަމަވެސް އަމަލުފުޅުން ފެންނަނީ ދިމާ އިދިކީލަ މަންޒަރެވެ.

ރައީސް މުއިއްޒު ކުރިން ވިދާޅުވި ހުރިހާ ވާހަކއެއް ކުރިން ބުނި އެތި ކެންސަލް ކުރާ އުސޫލުން ކެންސަލްކުރަމުން ނުވަތަ އެކަމުގެ އަސްލު އޮޅުވާލަމުން ގެންދާ މަންޒަރެވެ.

ކަންކަން މިމަގުން ހިނގަމުން ދާއިރު، ރައީސް މުއިއްޒު މިހާރު ކުރަން އެ ނިންމެވީ ނުހަނު ހަޑި އަދި ޑިމޮކްރެސީއާ ބިރައްޓެހިކަމެއްގެ ގޮތުގައި ގިނަ ބަޔަކު ސިފަކުރެއެވެ.

ޑިމޮކްރެސީގެ ހަތަރު ވަނަ ބާރާ މެދު ފިޔަވަޅު އެޅުމަށް ނިންމި ނިންމުމުން ރައީސް މުއިއްޒުގެ ފެންވަރު ހާމަވާ ކަަމަށް ވެސް ގިނަ ބަޔަކު ހާމަކުރެއެވެ.

އެގޮތުން ރައީސް މުއިއްޒު އެވަރަށް ބޮޑަށް އެކަމާ ކަންބޮޑުވެ ހާސްވެގެން އެ އުޅުއްވަނީ އެކަން އެގޮތަށް ހިނގާތީކަމަށް ބެލުމުގެ ފުރުސަތު ތަނަވަސްވެގެން ދެއެވެ.

ސަރުކާރުން އެކަމާ އަޑުގަދަކޮށް، މިދިޔަ ފަސް އަހަރު އޮޑި ބަންނަން ތިބި މީހުން ނެރެގެން ޑިފެންސަށް ކުޅުވަން ފެށުމުން ހަނދާނަށް އަންނަނީ ދިވެހި ހަރު ބަހެކެވެ. ތެޅުނ ތެޅުނުހެން ދާނީ ހުޅުނބު ކޮޅެވެ. އަދަދު ނޫހުން އެފަދައިން ރިޕޯޓުކުރުމުން އޭގައި ހަގީގަތެއް އޮތްކަން ސަރުކާރުން ގަބޫލުކުރާކަން ހާމަވެއެވެ.

މިނިވަން ނޫސްވެރިކަމަށް ރައީސް މުއިއްޒުގެ ސަރުކާރުން ޖާގަ ދެނީ މި އުސޫލުން ކަމުގައި ވަނީ ނަމަ މިފަދަ މިނިވަން ނޫސްވެރިކަމެއް ޔަގީނުންވެސް އެއްވެސް ނޫސްވެރިއަކު ބޭނުން ނުވާނެކަން ޔަގީނެވެ.

ގައުމީ ސަލާމަތައް ނުރައްކާވާ ކަންކަމުގައިޔާއި ނޫނީ ނަފްރަތު އޭގައި ހިމެނޭ ވާހަކަ ދައްކާ ޓެރަރިޒަމް އަށް މަގުފަހިވާ ކަންކަން ނޫހަކުން ޝާއިއުކުރާ ޚަބަރެއްގައި ހުރެގެން ނޫނީ މިނިވަން މުޖްތަމައެއްގައި ފިޔަވަޅު އަޅާ ހިސާބަށް ދިއުމަކީ ލަދުވެތިކަމެކެވެ.

ނޫހެއްގައި ވާހަކައެއް ލިޔުމުން، އެ ލިޔާ ވާހަކައިގައި އެއްވެސް ކަހަލަ އޮއްޓަރެއް، އެއްވެސް ކަހަލަ މަސްދަރެއް، ނެތް ކަމަށް ވަންޏާ އެހާ ބޮޑަށް ތުރުތުރު އަޅާފައި އެވާހަކައަށް ރިއެކްޓް ކުރާނެ ސަބަބެއް ޔަގީނުން ވެސް ނޯންނާނެއެވެ. ދައުލަތް ކޮށި އަރައިގެން މިއުޅެނީ އެ ވާހަކައިގައި ކޮންމެވެސް ވަރެއްގެ ހަގީގަތެއް އޮތީމާތާއެވެ.