ދިވެހިރާއްޖެއަށް ވެސް މިވަނީ ޑިމޮކްރެސީ ނިޒާމުގެ އޮއެވަރު އައިސްފައެވެ. 2008 ވަނަ އަހަރުގައި ޑިމޮކްރެސީގެ އުސޫލުތަކުގެ މައްޗަށް ބިނާވެފައިވާ އާ ޤާނޫނު އަސާސީއަށް އަމަލު ކުރެވެން ފެށުމުން ރާއްޖެވެސް މިވަނީ ޑިމޮކްރެސީ އަކަށް ވެފައެވެ. ޑިމޮކްރެސީ ނިޒާމުގެ ދިފާއުގައި ވަކާލާތުކުރާއިރު، އަދި ޑިމޮކްރެސީގައި އަޅުގަނޑުމެންނަށް ލިބިފައިވާ ހައްޤުތަކާއި ޒިންމާތައް ފުރިހަމަޔަށް އަދާ ކުރަން ބޭނުން ނަމަ ޑިމޮކްރެސީއަކީ ކޮބައިކަން އަޅުގަނޑުމެން އޮޅުން ފިލުވަން އެބަޖެހެއެވެ. ޑިމޮކްރެސީއަކީ ސަރުކާރެއް އެކުލެވުމާއި ގައުމެއް ހިންގަން ބޭނުން ކުރެވިދާނެ ނިޒާމެކެވެ.

މި ނިޒާމަކީ ރައްޔިތުން ބާރުވެރި ކުރުވާ، ރައްޔިތުންނަށް ގައުމު ހިންގުމުގެ މަރުހަލާތަކުގައި ބައިވެރިވުމުގެ ފުރުސަތުދޭ ނިޒާމެކެވެ. އެގޮތުން މަޢުނަވީ ގޮތެއްގައި ރައްޔިތުން ބައިވެރިވުން، ވޯޓު ލުމުގެ ހައްޤު ހަމަހަމަ ގޮތެއްގައި އެންމެނަށް ލިބިފައިވުން، މަސްރަހުގެ ހިނގާ ބިގާ އޮޅުން ފިލުން، ސިޔާސީ އެޖެންޑާގައި ރައްޔިތުންގެ ނުފޫޒު އޮތުން އަދި މަރުހަލާތަކުގައި ރައްޔިތުން ބައިވެރި ކުރުން މި ޝަރުތުތައް ހަމަވާކަމުގައި ވަންޏާ ސަރުކާރުގައި ތިބެން ވާނީ އިންތިޚާބަކުން ރައްޔިތުންގެ ރުހުން ހޯދައިގެން ތިބޭ ބައެކެވެ.

ޑިމޮކްރެސީގެ ޝަރުތެއް ކަމައް ފާހަގަ ކޮށްފައިވާ މަސްރަހުގެ ހިނގާ ބޮގާ އޮޅުން ފިލުވުން ފުރިހަމަ ވާނީ ކޮންމެ ރައްޔިތަކު ވެސް މައުލޫމާތު ހޯދައިގެންނެވެ. އަދި ސިޔާސީ ކަންކަމާ ދޭތެރޭ ފިކުރު ހިންގައިގެނެވެ. ޑިމޮކްރެސީއެއްގައި ބައިވެރިވުމަކީ ހަމައެކަނި ހައްޤެއް ނޫނެވެ. އެއީ ވަރަށް ބޮޑު ޒިންމާއެއްވެސް މެއެވެ.

ކަން މިހެން ހުރިއިރު މި ޒިންމާ އަދާކުރަން ރައްޔިތުންނާ އަދި އެކު ބާރުތަކުން ކުރަމުން ގެންދާ މަސައްކަތަށް ހުރަސް އެޅުމަކީ ޑިމޮކްރެސީއަށް ހުރަސް އެޅުން ނޫން ކަމަށް ނުލެބެލެވޭނެއެވެ.

އެގޮތުން ބަލާއިރު މިހާރު ގާނޫނު ގޮތުން އުފެދިފައި އޮތް ސަރުކާރަކީ ރާއްޖެ ކުރަމުން ދާ ޑިމޮކްރެސީގެ ޅަފަތުގެ ދަތުރުގައި އެ ޑިމޮކްރެސީ އެހެން ލެވެލްއަކަށް ގެންގޮސްދޭނެ ކަމުގެ ވައުދާ ހުވަފެން ވެސް ދައްކައިގެން އައި ސަރުކާރެކެވެ.

އެގޮތުން ރައްޔިތުންގެ ޚިޔާލުފާޅުކުރުމުގެ މިނިވަންކަމާ ޑިމޮކްރެސީގެ ހަތަރު ވަނަ ބާބުކަމުގައި ވާ ނޫސްވެރިކަމުގެ މިނިވަންކަން ވެސް އިމެއް ނެތް މިންވަރަށް ފާޓު ފުޅާކޮށް ދޭނެ ކަމުގެ ޔަގީންކަން އޭރު އަދުގެ ރައީސުލްޖުމްހުރިއްޔާ އެރުވިއެވެ.

ނަމަވެސް ކަން ހިނގަމުން ދަނި އެމަގުންތޯ ނޫންތޯ މިއަދު ބަލާލަން މަޖްބޫރުވެއްޖެއެވެ.

އެގޮތުން މީގެ ކުރިން ރައްޔިތުން ރައީސް މީހާގެ ފޮޓޯ ނެގުމަކީ މަނާކަމެއްގެ ގޮތުގައި އޮތްކަމެއް އެނގިފައި ނެތްއިރު، ރިޔާސީ އިންތިހާބުގެ ތެރޭގައިވެސް އަދި ވެރިކަމަށް ރައީސް މުއިއްޒު ހޮވިވަޑައިގެންވެސް ސެކިއުރިޓީ ކޮމްޕްރޮމައިޒްވާ ގޮތަށް ކިތަންމެ ފޮޓޯތަކެއް ދައުރުވި ނަމަވެސް އޭރު އެއީ ރައީސުލްޖުމްހޫރިއްޔާއަށް ވެސް އަދި ސެކިއުރިޓީއަށްވެސް ހުރި ނުރައްކަލަކަށް ނުވިއެވެ. އެހެނީ އޭރު އެ ދައުރުކުރުވި ފޮޓޯ ތަކަކީ އެއީ ޕީއާރު ސްޓަންޓު ޖައްސަން ނުވަތަ ރައްޔިތުންގެ ސަމާލުކަން ހޯދުވަން ދައުރުކުރުވި ފޮޓޯތަކަކަށް ވުމެވެ. ތަޖުރިބާކާރުން ބުނަނީ، ފޮޓޯ ނެގި މީހާގެ މައްޗަށް ޖިނާއީ ތުހުމަތުތަކެއް ކުރުމަކީ ސީދާ ބިރުދައްކަން ސަރުކާރުން ކުރި އަމަލެއް ކަމަށެވެ. ޑިމޮކްރެސީ ބުނާ ގޮތުން ނަމަ އެފަދަ ހަރުކަށި އަމަލުތަކުން ފެންނަނީ ވެރިއެއްގެ ހަގީގީ ސިފައެވެ. އެ އަމަލުން ހާމަވަނީ ހުދުމުހުތާރުކަމުގެ ސިފައެކެވެ.

އެއްކޮލުން މި ސަރުކާރު ހިނގަނީ އަނދިރި ދައުލަތަކާ އެއް ގޮތަށެވެ. މައުލޫމާތު ހާމަކުރުން ވަނީ ހުއްޓާލާފައެވެ. ރައްޔިތުންނަށް ގައުމުގެ ކަންކަން ވެސް ގެންދަނީ ސިއްރު ކުރަމުންނެވެ. ގައުމުގައި ހިނގާ ބޮޑެތި ހާދިސާތަކުގެ އަދާހަމަތައް ދަނި ސިއްރު ކުރަމުންނެވެ.

މީގެ އިތުރުން ވެރިކަމަށް އައުމަށް އެންމެ ބޮޑު ބުރަ މަސައްކަތެއް ކޮށްދިން އެއް ބަޔަކީ ނޫސްވެރިން ކަމަށްވާއިރު މިއަދު އާރާ ބާރާ ލިބުމުން އެ ނޫސްވެރިންގެ ކަރުގައި ހިފަން ދިމާކުރުމަކީ ބަޑި ބޭހޭ ކުޅުން ފަދަ ކަމެކެވެ.

ކުރިން ވެސް ދެންނެވި ފަދައިން ޑިމޮކްރެސީއެއްގައި ރައްޔިތުން ބާރުތަކަށް ފާރަވެރިވެ ކަން ހިނގާ ނުހިނގާ ގޮތް ބަލަން ޖެހޭނެއެވެ.

ހުރިހާ ރައްޔިތުންގެ ފަރާތުން މިކަން ރާއްޖޭގައި ކުރަމުން އަންނަނީ ނޫސްވެރިން ކަމަށް ވީ ހިނދު އެ ނޫސްވެރިން ރައްޔިތުންނާ ހަމައަށް ސަރުކާރުން ކުރަމުން ގެންދާ ނޭދެވޭ ކަންކަމުގެ ވާހަކަ ގެނެސްދިނުމުން އެ ނޫސްވެރިޔަކަށް ނުވަތަ އެ ނޫހަކަށް ފިޔަވަޅު އެލުމަކީ ޒަމާނީ ޑިމޮކްރެސީއަށްވެސް ހުތުރެކެވެ. ލަދުވެތި އަދި ހުދުމުހުތާރު ސިފައެކެވެ.

މިފަދަ ކަންކަމުން މި ފެންނަނީ ވަރަށް ހުދުމުހުތާރު ސިފަތަކެކެވެ. މިއީ ބުޅާ ގޯނިން ބޭރުވުން ކަހަލަ ކަމެކެވެ. ޑިކްޓޭޓާޝިޕްގެ ރަހަ އަނެއްކާވެސް ގައުމުން ލާން ފަށައިފިއެވެ. ޑިމޮކްރެސީއަށް ރާއްޖެ ކުރަމުން އައި ދަތުރުގައި މި އަޅަނީ ފަހަތަށް ފިޔަވަޅެވެ. މިޖަހަނީ އުނބަށެވެ.

މިނިވަން ޤައުމެއްގެ ގޮތުގައި ދެމިއޮތުމުގެ ތަޅުދަނޑިއަކީ، ޒަމާނީ ޑިމޮކްރެސީކަމަށް ވާއިރު، ޚިޔާލު ފާޅުކުރުމާއި ނޫސްވެރިކަމުގެ މިނިވަންކަމަކީ، ޒަމާނީ ޑިމޮކްރެސީގެ އެންމެ އަސާސީ ރުކުންކަން އަދުގެ ވެރިން ހަނދާން ނެތުނީ ބާއެވެ؟