ރައީސް އަބްދުﷲ ޔާމީން އަބްދުލްގައްޔޫމްގެ މައްޗައް ކުރީ ސަަރުކާރުން ކުރިޔަށް ގެންގޮސްފައި ވަނީ "ސިޔާސީ ދައުވާ" އެއް ކަމަށް އަދުގެ ރައީސް ޑރ މުހައްމަދު މުއިއްޒު ކުރިން ވިދާޅުވި ނަމަވެސް މިހާރު އެމަނިކުފާނުގެ ސިޔާސަތު ބަދަލުވީމާ ކުރިން ބުނި އެތި ކެންސަލްކޮށްލައިފި ކަމަަށް ކާނަލް ރިޓަޔާޑް އަހުމަދު ފަޔާޒް (ޕާޕާ) ވިދާޅުވެއްޖެ އެވެ.
ފަޔާޒް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.
ވ.އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިންގެ ކުށް ސާބިތުވާކަމަށް ކަނޑައަޅާ, ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ކޮށްފައިވާ ހުކުމް ބާތިލުކޮށް، ކްރިމިނަލް ކޯޓުން އަލުން ބަލަން ފެށި މައްސަލައިގެ ޝަރީއަތުގެ އަޑުއެހުމެއް އެ ކޯޓުގައި މިއަދު ކުރިޔަށްދާއިރު މިއަދަކީ ރައީސް މުއިއްޒު ދޮގުހެދިކަން ހާމަވެގެންދާ ދުވަސް ކަމަަށް ފަޔާޒް ވަނީ ޕޯސްޓްގައި ފާހަގަކުރައްވާފައެވެ.
ވެރިކަމަށް އައުމުގެ ކުރިން ރައީސް ޔާމީނަށް އިއްވާފައި ވަނީ ހަރާން ހުކުމެއް ކަަމަށް ބުނި ވެރިންގެ ވެރިކަމުގައި ވެސް ފެނިގެންދަނީ އެ ހުކުމް ދަންމަމުން ގެންދާ މަންޒަރެވެ.
