އޭރުވެސް މަގުމައްޗައް ނިކުމެ ރައީސް އަބްދުﷲ ޔާމީން އަބްދުލްގައްޔޫމްގެ ހައްގުގައި މަސައްކަތް ކުރެއްވި މީހުން މިއަދުވެސް އެބަތިބި ކަމަށާއި ތަފާތަކީ ކުރިން ތިބި އަމިއްލަ އެދުމުގެ މީހުން މިއަދު ނެތްކަން ކަމަށް ޕީޕަލްސް ނެޝަނަލް ފްރޮންޓް (ޕީއެންއެފް) ގައި އިސްކޮށް ހަރަކާތްތެރިވާ ޑރ،އަބްދުﷲ އިބްރާހިމް ވިދާޅުވެއްޖެ އެވެ.
ޑރ އަބްދުﷲ އެކްސްގައި މިފަދައިން ވިދާޅުވެފައި ވަނީ ހޯމަ ދުވަހު ދިވެހި ރާއްޖޭގެ ކްރިމިނަލް ކޯޓުގައި ރައީސް ޔާމީންގެ ޝަރީއަތުގެ އަޑުއެހުމެއް ކުރިޔަށްދިޔަ ވަގުތު ކޯޓުގެ ބޭރުގައި އެމަނިކުފާނަށް ތާއިދުކުރައްްވާ ފަރާތްތަކުން، ދެމުންގެންދާ އަނިޔާ ހުއްޓާލުމަށް ގޮވާލާ އިހުތިޖާޖް ކުރުމުން އެކަމާ ގުޅިގެންނެވެ.
އެގޮތުން މިއަދުގެ ސަރުކާރުގައި ތިބި ފަރާތްތަކުން ކުރިން ރައީސް ޔާމީނަށް ކޮށްފައި ވަނީ ސިޔާސީ ދައުވާއެއްކަމަށް ބުނެ އަޑު އުފުލާފައި ވަނީ އަމިއްލަ އެދުމެއް އޭގައި އޮތުމުން ކަމަށް ޑރ އަބްދުﷲގެ ޕޯސްޓްގައި ވަނީ ބުނެފައެވެ.
ޑރ އަބްދުﷲ މިފަދައިން ވިދާޅުވެފައިވާއިރު މިއަދުގެ ސަރުކާރުގައި ތިބި ފަރާތްތަކަކީ ރައީސް ޔާމީނަށް ކުރީ ސަރުކާރުން ކޮށްފައިވާ ސިޔާސީ ދައުވާ އަށް ނިމުމެއް ގެނެސްދިނުމަށް ގޮވާ އިހުތިޖާޖް ކުރި ފަރާތްތަކެކެވެ. އެހެން ނަމަވެސް ރައީސް ޔާމީންގެ ހުސް ގޮނޑި ދައްކައިގެން ވެރިކަމަށް އައުމަށްފަހު ރައީސް ޔާމީނާ ދޭތެރޭ ކަންތައް ކުރައްވަމުން ގެންދަވަނީ ނިމިދިޔަ ސަރުކާރެކޭ އެއްފަދައިންކަން ފާހަގަކޮށްލެވެއެވެ.
