ދައުލަތްތައް ހިންގުމުގައި ކޮރަޕްޝަން އަށަގެންފައިވާ ކަމަށް ގަބޫލުކުރެވޭ މިންގަނޑު ވަޒަންކޮށް، ޓްރާންސްޕޭރެންސީ އިންޓަނޭޝަނަލް އިން އެކުލަވައިލާ "ކޮރަޕްޝަން ޕާސެޕްޝަން އިންޑެކްސް" (ސީޕީއައި) ގައި ރާއްޖެ އެއް ދަރަޖަ ދަށަށް ޖެހިއްޖެއެވެ.

ޓްރާންސްޕޭރެންސީން އާންމުކުރި މައުލޫމާތުގައިވާ ގޮތުން ކޮރަޕްޝަން އިންޑެކްސްގައި މިދިޔަ އަހަރު ރާއްޖެއަށް ލިބުނީ 39 ޕޮއިންޓެވެ.

އެއީ އޭގެ ކުރީ ދެ އަހަރަށް ވުރެ އެއް ޕޮއިންޓް ދަށް މިންވަރެއް ކަންފާހަގަކޮށްލެވެއެވެ. ސީޕީއައިގައި ރާއްޖެއަށް އެންމެ މަތިން ޕޮއިންޓް ލިބުނީ 2020 ވަނަ އަހަރު އެވެ. އެ އަހަރު 43 ޕޮއިންޓް ލިބިފައިވާއިރު އޭގެ ފަހުން 2021 އާދި 2022 ގައި ލިބުނީ 40 ޕޮއިންޓްކަން ފާހަގަކޮށްލެވެއެވެ.

ސީޕީއައިގައި ރާއްޖެއަށް މިދިޔަ އަހަރު ލިބުނު 39 ޕޮއިންޓާ އެކު ރާއްޖެ ހިމެނުނީ 50 ޕޮއިންޓަށް ވުރެ މަދުން ޕޮއިންޓް ލިބުނު ތިންބައިކުޅަ ދެބައި ގައުމުގެ ތެރޭގަ އެވެ.

ސީޕީއައި ސްކޯ މިންކުރަނީ ކޮރަޕްޝަން އަށަގެންފައިވާ ކަމަށް އާންމުންނަށް ގަބޫލުކުރެވޭ މިންވަރު ބަލަން ހަދާ ސާވޭތަކާއި ފަންނީ މާހިރުންގެ ހޯދުންތަކުގެ އަލީގައެވެ. މިދިޔަ އަހަރުގެ ސީޕީއައި އެކުލަވައިލުމުގައި ރިއާޔަތް ކޮށްފައި ވަނީ ބައިނަލް އަގުވާމީ ތިން މަސްދަރަކަށެވެ.

އެއީ

• ގްލޯބަލް އިންސައިޓް ކަންޓްރީ ރިސްކް ރޭޓިންސް

• ވެރައިޓީސް އޮފް ޑިމޮކްރަސީ ޕްރޮޖެކްޓް

• ވޯލްޑް ބޭންކް ކަންޓްރީ ޕޮލިސީ އެންޑް އިންސްޓްޓިއުޝަނަލް އެސެސްމެންޓް އަށެވެ.

ސީޕީއައި ގައި 180 ގައުމެއް ވަޒަންކޮޮށްފައިވެއެވެ. ރާއްޖޭގެ ސްކޯ އަކީ 39 ކަމަށް ވާއިރު ރާއްޖެ އޮތީ 180 ގައުމުގެ ތެރެއިން 93 ވަނައިގައެވެ.

އެއިންޑެކްސްގައި 93 ވަނައިގައި ރާއްޖެއާ އެކު ދެން ހިމެނެނީ އަވަށްޓެރި އިންޑިއާއާއި އިރުމަތީ މެދުތެރޭ އޭޝިއާގެ ގައުމެއް ކަމަށްވާ ކަޒަކިސްތާން އަދި ލެސޯތޯއެވެ.