މަސްވެރިންނަށް އަނެއްކާވެސް ފައިސާ ލިބުން ލަސްވެ އެކަމުގެ ހިތްހަމަ ނުޖެހުމާ އެކު އޮޑިތައް 1 ނަމްބަރު ޖެޓީގައި އަޅާނެކަމުގެ އިޝާރާތެއް ކޮށްފިއެވެ.

މަސްވެރިން ކިރާ މަހަށް ވަގުތުން ފައިސާ ނުލިބުމަކީ އަބަދުވެސް ކުރިމަތިވާ މައްސަލައެކެވެ. ކޮންމެ ސަރުކާރެއްވެސް ވެރިކަމަށް އަންނަނީ މަސްވެރިންނަށް އެތައް ވައުދެއް ވެގެން ނަމަވެސް ވެރިކަމަށް އައިސް މަސްވެރިން މަތިން ސަރުކާރުތަކުން ހަނދާން ނެތޭ ކަމަށް އެ މަސްވެރިން ބުނަމުން ދެއެވެ.

އެގޮތުން މި ސަރުކާރުގައިވެސް ވަނީ މަސްވެރިންނާ މެދު އިހުމާލުވެފައިކަމަށާ ކުރިން ހުރި ފައިސާ ވެސް ލިބުނީ އެތައް ދުވަހަކު އިހުތިޖާޖުކޮށް ހަނގުރާމަކުރާ ހިސާބަށް ދިއުމުން ކަމަށް މަސްވެރިން ބުނެފައިވެއެވެ.

އަނެއްކާވެސް މަސްވެރިންގެ ފައިސާކޮޅު ނުލިބި ދުވަސްތައް ފާއިތުވާން ފަށައިފިކަމަށް ވަނީ މައުލޫމާތު ލިބިފައެވެ.

އެގޮތުން ޒުވާން މަސްވެރިއަކު އެކްސްގައި ކުރި ޕޯސްޓެއްގައި ބުނެފައިވަނީ، ބިލުތަކަށް ފައިސާލިބުން ލަސްވުމުން އޮޑިއަށް ތެޔޮ އަޅާ، ފަޅުވެރިންގެ ކޮއްތު ހޯދާނެ ގޮތެއް ނެތް ކަމަށެވެ.

މީގެ އިތުރުން އޮޑިތައް އޮތީ ދަރާފައި ކަމަށާ މިހާރު ކަންކަން ވަމުން ދާ ގޮތުން ކަނޑަށް ނުކުމެ މަސްވެރިކަމާ އުޅުމަށް ވުރެ ފަޅުވެރިން ތިބީ މާޔޫސްވެފައި ކަމަށް ވެސް އެ ޕޯސްޓުގައި ބުނެފައިވެއެވެ. އަދި އޮޑި ފަހަރުތައް އަނެއްކާ ވެސް މަހަށް ނުނިކުމެ ފަޅުގައި އަޅަންވީތޯ ސުވާލުކޮށް ބުނެފައިވަނީ މިފަހަރު އޮޑިތައް އަޅާނީ ސީދާ އެއް ނަމްބަރު ޖެޓީގައި ކަމަށެވެ.