މާލޭގަައި މަހެއްހައި ދުވަހު ރަހީނުކޮށްގެން ގެންގުޅުނު މީހާއަށް ބޮޑެތި ޖިސްމާނީ އަނިޔާކޮށް އިނގިއްޔެ ބުރިކޮށްލި މައްސަލާގައި ހައްޔަރުކުރި މީހުންގެ ތެރޭގައި ސިފައިންގެ ދެ މީހަކު ބައިވެރިވާކަން ފުލުހުން ހާމަކޮށްފިއެވެ.

ފުލުހުންގެ ކްރައިމް އިންވެސްޓިގޭޝަން ޑިޕާޓުމަންޓުން މިއަދު ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިޑެންޓް އޮފް ޕޮލިސް، ހަސަން ޝިފާއު ވިދާޅުވީ، މީހަކު ރަހީނުކޮށް އަނިޔާކުރިކަން ފުލުހުންނަށް އެނގުނީ ޖޫން 25 ވަނަ ދުވަހު އެމީހާ ހުޅުމާލެ ހޮސްޕިޓަލަށް ގެންދިއުމުން، އެތަނުގައި އެވަގުތު ޑިއުޓީ ކުރަމުން ދިޔަ ފުލުހުންގެ ސަމާލުކަމަށް އެކަން އައުމުން ކަމަށެވެ.

އެގޮތުން ގެއެއްގެ ތެރޭގައި މީހަކު ރަހީނުކޮށް އޭނާއަށް ބޮޑެތި ޖިސްމާނީ އަނިޔާތަކެއް ކޮށް އިނގިލި ބުރިކޮށްލައި، އޭނާ ލައްވައި މަސްތުވާތަކެތީގެ ވިޔަފާރިކުރުވި މި މައްސަލާގައި ފުލުހުން ފަސް މީހަކު ހައްޔަރުކުރިކަމާއި، ރަހީނުކުރި މީހާއަށް ދީފައިވާ އަނިޔާތަކުގެ ބައެއް ތަފުސީލުތައް ވެސް ހިއްސާކުރިއެވެ.

ޝިފާއު ވިދާޅުވީ، މިހާދިސާގައި އަނިޔާ ލިބިފައިވަނީ 30 އަހަރުގެ ދިވެހި ފިރިހެނަކަށް ކަމަށާއި އެގޮތުން އޭނާގެ ވައަތު ލޯމަތީގައި ޖަހައި މާރާމާރީ ހިންގުމުގެ ސަބަބުން ވައަތު ލޮލަށް ލޭއަރައި، ލޯކައިރި ވަރަށް ބޮޑަށް ދުޅަވެ، ނޫފައި ގަނެފަ ހުރިކަން ފާހަގަ ކުރެވޭކަމަށް ވެސް ހާމަކޮށްފައިވެއެވެ.

އެމީހާ ރަހީނުކޮށްފައިވަނީ، މި އަހަރުގެ މޭ މަހުގެ 25 ވަނަ ދުވަހުން ފެށިގެން ޖޫން މަހުގެ 25 ވަނަ ދުވަހާ ހަމައަށެވެ. އޭނާއަށް ބިރުދައްކައި، ގަދަކަމުން މަސްތުވާތަކެތީގެ ވިޔަފާރި ކުރުވާފައިވެސްވެއެވެ.

މި މައްސަލައާ ގުޅިގެން ފުލުހުންވަނީ ފަސް މީހަކު ހައްޔަރުކޮށްފަ އެވެ. އެ ފަސް މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އެކި މުއްދަތަށް އެ ފަސް މީހުންވެސް ބަންދުކޮށްފައިވެއެވެ.

އެ ފަސް މީހުންނަކީ:

•  އަލީ ސާމީ، ރ.ކަނދުޅުދޫ، 24 އަހަރު

•  އަހްމަދު ސާއިފު ވަހީދު، ގދ.ގައްދޫ، 18 އަހަރު

•  މުހައްމަދު ނައުޝާން ހުސައިން، ތ.ތިމަރަފުށި، 21 އަހަރު

•  މުހައްމަދު ނަފާހު، ކ.މާފުށި، 23 އަހަރު

•  އަހްމަދު ޒަޔާން، ލ.ގަން، 24 އަހަރު

މި ފަސް މީހުންގެ ތެރެއިން ހަތަރު މީހަކު ޝަރީއަތް ނިމެންދެން ބަންދުކުރަން ކޯޓުން އަމުރުކޮށްފައިވެ އެވެ. ނަފާހު ތަހުގީގު ނިމެންދެން ބަންދުގައި ބަހައްޓަން ކޯޓުން އަމުރުކޮށްފައިވެ އެވެ. ނަފާހުއާއި ޒަަޔާނަކީ އެމްއެންޑީއެފްގައި މަސައްކަތްކުރަމުންދާ ދެ މީހުންކަން ފުލުހުން ފާހަގަކުރި އެވެ. އަދި އެމްއެންޑީއެފްއިން އެމީހުންނާމެދު ފިޔަވަޅު އަޅަމުންދާކަމަށްވެސް އެ ހިދުމަތުން ބުންޏެވެ.

އެ ފަސް މީހުންގެ އިތުރަށް މި މައްސަލާގައި ތިން ކުޑަކުއްޖަކު ޝާމިލުވާކަން ތަހުގީގަށް ދެނެގަނެވިފައިވާ ކަމަށާއި، އެ ކަމުގައި އަޅަނަްޖެހޭ ފިޔަަވަޅުތައް ބަލަމުންދާ ކަމަށް ފުލުހުން ބުންޏެވެ.