ބީއެމްއެލްގެ ޑެބިޓް ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާ ނަމަ ރާއްޖެއިން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭ ގޮތަށް ބަދަލު ގެނައީ މިދިޔަ އޮގަސްޓް މަހުގެ ފަހުކޮޅެވެ.

ބީއެމްއެލް އިން އެކަން އިއުލާންކުރިތާ އަށް ގަޑިއިރު ވެސް ނުވަނީސް، އެ ބޭންކުން ވަނީ އެ ނިންމުން ބަދަލުކޮށް، ކުރިން އޮތް ގޮތަށް ހަމަޖައްސައިފިއެވެ. ބީއެމްއެލް އިން ނެރުނު ނޫސްބަޔާނުގައި ބުނީ އެ ނިންމުން އަނބުރާ ގެންދިޔައީ މަރުކަޒީ ބޭންކް އެމްއެމްއޭގެ ލަފާގެ މަތިން ކަމަށެވެ.

އެ ވަގުތާ ދިމާކޮށް އިދިކޮޅު އެމްޑީޕީއިން ނޫސްވެރިންގެ ބައްދަލުވުމެއް ބޭއްވިއެވެ.

ބީއެމްއެލް އާއި އެމްޑީޕީ ގުޅިގެން އޯގަސްޓު 25 ގައި ބަގާވާތަކުން ސަރުކާރު ވައްޓާލަން އުޅުނު ކަމަށް ތުހުމަތުކޮށް އެ މައްސަލަ ތަހުގީގުކުރާކަމަށް ބުނެ ފުލުހުން ބަޔާން ނެރުނެވެ. މިކަމަކީ ގާނޫނީ ސަރުކާރެއް ޣައިރު ގާނޫނީކޮށް ބަދަލުކޮށްލުމަށް ކުރެވިގެން ދިޔަ ކަމެއް ކަމަށް ބެލުމުގެ ޖާގަ އޮތުމުން ކަމަށް ބުނެއެވެ.

އޭގެ ފަހުން ބީއެމްއެލްގެ މެނޭޖިން ޑިރެކްޓަރު އަދި ސީއީއޯ ކާލް ސްޓުމަކް ރާއްޖޭން ބޭރުގައި ހުންނަވައި އިސްތިއުފާދެއްވާފައެވެ.

ސަރުކާރު ވައްޓާލަން އެ ބޭންކުގެ ތެރެއިން ހިންގަން އުޅުނު ސީދާ ބަޣާވާތެއް ކަމަށް ރައީސް ޑރ. މުއިއްޒު ވެސް ވިދާޅުވެފައިވަނިކޮށް ފުލުހުން ބަޔާން ނެރެ ތަހުގީގުކުރަން ފެށި މައްސަލައިގައި ތިން ހަފްތާވީއިރުވެސް އެއްވެސް މިހަކާ ސުވާލުނުކުރުމަކީ ކަމުގެ ބާވަތން ބަލާނަމަ އޮޅުވާލުންތަކެއް ހުރި ކަމެއްގެ ގޮތުގައި ބެލުމުގެ ފުރުސަތު އެބައޮތެވެ.

އެގޮތުން މިކަމަށް ތުހުމަތު ކުރެވޭ އެންމެ ބޮޑު ސަބަބަކީ މާލީ ބަގާވާތެއް ކުރަން އުޅުނު ކަމަށް ބުނެ ފުލުހުން ބަޔާން ނެރުނު ފަހުން ވެސް ތިން ހަފްތާ ވެގެން ދިޔައިރުވެސް އެއްވެސް މީހަކާ ސުވާލުކޮށް އެއްވެސް މީހެއްގެ ބަޔާނެއް ނަގާފައިނުވުމެވެ.

ކަމުގެ އަދާހަމަ ދެމުން އެންމެ ފަހުން ވެސް ފުލުހުން ހާމަކޮށްފައިވަނީ، އެ މައްސަލައިގައި އެއްވެސް މީހަކާ ސުވާލުކޮށް ބަޔާން ނަގާފައި ނުވާނެ ކަމަށާއި މިވަގުތު ކުރަމުންދަނީ މައުލޫމާތު އެއްކުރުމުގެ މަސައްކަތް ކަމަށެވެ. އެގޮތުން ޖިނާއީ ތަހުގީގެއް ކުރރެވޭ ވަރަށް ހެކި ހުރިތޯ ނުވަތަ ހެކި އެއްތަން ކުރެވޭ މަސައްކަތްކުރަމުންދާއިރު މިހާ ހިސާބުން ސުވާލުއުފެދޭ ކަންކަން ފެންމަތިވެއެވެ.

ހެކި ނެތި ގައުމީ ބޭންކަށް އެވަރުގެ ތުހުމަތެއް ރައީސުލްޖުމްހޫރިއްޔާ އަދި ފުލުހުން ވެސް ކުރީ ކީއްވެބާއެވެ؟ ބޮޓު އެކައުންޓުތަކަކުން މަގުމައްޗަށް ނުކުމެ ސަރުކާރު ޖަވާބުދާރީ ކުރުވަން ގޮވާލިކަމަށް ބުނާއިރު އޭގެން ވެސް ހެއްކެއް ފުލުހުންނަށް ނުލިބުނީ ބާއެވެ؟

ބީއެމްއެލްގެ ނިންމުމަކީ މާ ކުރިން ވެސް ނިންމަން ޖެހިފައި އޮތް މަޖުބޫރީ ކަމެކެވެ. ނެތް ޑޮލަރެއް ބޭންކަށް ވެސް ނުދެވޭނެ އެވެ. އޮގަސްޓު 21، ގައި ޑިރެކްޓަރުން ނިންމި ނިންމުމަކީ ބޭންކިން ގާނޫނުގެ 15 ވަނަ މާއްދާއާ އެއްގޮތަށް ނިންމާފައިވާ ނިންމުމުން އެއީ ސަރުކާރުގެ މެޖޮރިޓިީ އޮތްތަނެއް ނޫން ކަމަށް ދައްކާ އެތަނުގެ ސީއީއޯ ރައީސް އޮފީހަށް ހާޒިރުކޮށް، ރައީސުލްޖުމްހޫރިއްޔާ ހިންގީ ގާނޫނާ ހިލާފު އަމަލެކެވެ.

ނަމަވެސް ބީއެމްއެލް ކުށްވެރިވެ ބަޣާވާތެއްގެ ޓެގު އެޅުވިގެން ދިޔައީ ސަރުކާރުން އެކަމުގެ ނާޖާއިޒު ފައިދާ ނަގަމުން ދިޔަ ވަގުތެއްގައެވެ. އެގޮތުން ސަރުކާރަކީ ރައްޔިތުންގެ އަޑު ނުހަނު ގާތުން އަހާ ސަރުކާރެއްކަން ދެއްކުމަށްޓަކައި ބީއެމްއެލް ކަންބަޅި ބަކައްޓަކަށް ހަދާ ގުރުބާން ކުރީއެވެ.

ސިޔާސީ ޖަލްސާއެއްގައި ބޭންކުގެ ޑިރެކްޓަރުންނާއި މުވައްޒަފުންނާއި މުޅި ބޭންކުގެ ބޮލުގައި ބަގާވާތުގެ ސީރިއަސް ތުހުމަތު އަޅުވައި ބޭންކުގެ އަގު ވައްޓައިލުމެވެ. ދުލަށް ކިތަންމެ ފަސޭހަ ބަހަކަށް ބަގާވާތަކީ ވަރަށް ސީރިއަސް، ހަރުކަށި އަދަބުތަކެއް މުޅި ދުނިޔޭގައި ވެސް ދޭ ކުށަކަށްވާއިރު އެވަރުކަމެއް ކުރި ބަޔަކު ހޯދާ އެންމެ ކުޑަ މިނުން ތަހުގީގުވެސް ތިން ހަފްތާ ވެގެން ދިޔައިރު ނުފެށުމުން ހަގީގަތުގައި އެއީ ބަޣާވާތެއް ތޯ ނޫނި އެއީ ސަރުކާރުން ކަންކަން އޮޅުވާލާ ރައްޔިތުންގެ ލޮލުގައި އަނދުން އަޅުވަން ޖެއްސި ޕީއާރު ސްޓަންޓެއްތޯ ސުވާލު އުފެއްދުމުގެ ޖާގަ މިއަދު އެބަ އޮތެވެ.

ބޭންކުތަކުގެ ބޯޑަށް ސިޔާސީ މުވައްޒަފުން އައްޔަނުކުރެވޭ ގޮތަށް ބަދަލުތަކެއް ގެނެސްފި އެވެ. ބޭންކް އޮފް މޯލްޑިވްސްއަކީ ހިޔާލީ ބަގާވާތެއްގެ ބައިވެރިޔަކަށްވެއްޖެ އެވެ. މާލީ ނިޒާމުގެ އަގު ދުނިޔޭގެ ކުރިމަތީގައި ވައްޓާލައިފި އެވެ. ބޭންކިން ނިޒާމަށް އޮތް އިތުބާރު ގެއްލުވާލައިފި އެވެ. މިއީ ފޫނުބެއްދޭ ވަރުގެ ގެއްލުމެއްކަން އަހަރުތަކެއް ފަހުން ހާމާވާނެ އެވެ.