އދގެ 79 ވަނަ އާންމު މަޖިލީހުގައި ބައިވެރިވެވަޑައިގަތުމަށް ފުރާވަޑައިގަތުމުގެ ކުރިން، ވެލާނާ އިންޓަނޭޝަނަލް އެއާޕޯޓުގައި ހުންނަވައި މީޑިއާއަށް ދެއްވި ހާއްސަ ބަސްދީގަތުމެއް ގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ ދިވެހިރާއްޖެއަށް ކުރިއެރުން ލިބެން އޮތީ ގައުމުތަކާ ގުޅިގެން ކަމަށެވެ. އާދެ! އެމަނިކުފާނުގެ މި ވާހަކަފުޅާ އަޅުގަނޑު ދެބަހެއް ނުވަމެވެ. ނުވެސް ވާނަމެވެ.

އެއީ ބޭރުގެ ބޮޑެތި ގައުމުތަކާ ގުޅުން ބަދަހި ކުރި ވަރަކަށް މާލީ ގޮތުންނާއި އެހެނިހެން ގޮތްގޮތުން އަޅުގަނޑުމެންގެ މި ކުޑަ ކުޑަ ޖަޒީރާއަށް އޭގެ ފައިދާ ކުރާނެތީއެވެ. އެމަނިކުފާނު އެފަދައިން ވިދާޅުވުމުން ހިތާހިތުން ތައުރީފްކުރެވުނެވެ. ނަމަވެސް އެއްކަލަ ބަހާއި އަމަލާ ދިމާނުވީއެވެ. މީޑިޔާގެ ކުރިމަތީ ހަރު އަޑުން ތިމަން މަނިކުފާނު މި ވަޑައިގަންނަވަނީ ގުޅުން ބަދަހިކުރަންށޭ ވިދާޅުވެ ގޮސް ދުބާއީގެ އެއާޕޯޓްގައި ޓްރާންސިޓް ކުރެއްވި އިރު ދެން ފެނިގެންމިދިޔައީ، އިންތިހާ ދަށު ދަރަޖައިގެ ކަމެއް ކުރައްވަން އިންނެވި މަންޒަރު ސީދާ ރައީސުލްޖުމްހޫރިއްޔާގެ އޮފީހުން އާންމުރިތަނެވެ.

ފަލަސްތީނުގެ ހައްގުގައި ދުނިޔޭގެ ހުރިހާ މުސްލިމުން ބޭން ކޮށްފައިވާ ސަހްޔޫނީންނަށް ވާގިވެރިވާ ކޮސްޓަރ ބްރޭންޑްގެ ކޮފީއެއް ރައީސް މުއިއްޒު ބޯ މަންޒަރު އިސްތިހާރެއްހެން އެމަނިކުފާނުގެ އޮފީހުން ދައްކާލުމުން އެކަމާމެދު ބައިވަރު ސުވާލުތަކެއް އުފެދިގެން ދިޔައެވެ. އެގޮތުން ފުރަތަމަ ސުވާލަކީ، ބައިނަލްއަގްވާމީ ގުޅުން ބަދަހި ކުރަންށޭ އެމަނިކުފާނު ވިދާޅުވުމުން މިއުޅެނީ އަނެއްކާ ސަހްޔޫނީންނާއެކު ގުޅުން ބަދަހިކުރަންތޯއެވެ. ދެން އަނެއްކާ އެމެރިކާއަކީ ސަހްޔޫނީންނަށް ހަތިޔާރާއި އެހެނިހެންތަކެތި ފޯރުކޮށްދިނުމުގައި އެންމެ އިސް ދައުރެއް އަދާ ކުރައްވާ ގައުމަކަށްވާއިރު، ސަހްޔޫނީންނަށް ވާގިވެރިވާ "ކޮސްޓަރ ބްރޭންޑްގެ" ކޮފީއެއް ބޯ މަންޒަރު އިސްތިހާރު ކުރުމުން އެމެރިކާއާއެކު ގުޅުން ބަދަހިވެގެންދާނެކަމަށް ހީކުރީ ނޫންކަމެއް ވެސް ނޭނގެއެވެ.

އެހެންނަމަވެސް އެމަނިކުފާނުގެ މި އަމަލުން މި ކުޑަ ކުޑަ ރާއްޖެ ލަދުގަންނަ ވަރުވެއްޖެއެވެ. ސައްތައިން ސައްތަ މުސްލިމް ގައުމެއްގެ ވެރިޔާގެ ފަރާތުން މިފަދަ އަމަލެއް ފެނުމުން ލަދު ނުގަންނާނީ ކޮން ދިވެއްސެއްތޯއެވެ. އަޅުގަނޑުމެންނަށް ފެނިގެން މިދަނީ ކޮންމެ ދުވަހަކުންހެން، އާންމުން ނިކުމެ ސަހްޔޫނީންގެ ޕާސްޕޯޓާއި އެމީހުންނަށް ވާގިވެރިވާ ބްރޭންޑްތަކުގެ ތަކެތި ރާއްޖެ އެތެރެ ކުރުން މަނާކުރުމަށް ސަރުކާރަށް ގޮވާލާ މަންޒަރެވެ. ރައީސް މީހާގެ މި އަމަލުން ސީދާ އެ ޖަހާލީ އެ އާންމުންގެ އުންމީދުތަކުގައި ކޮޅު ފައިންނެވެ.

މި ސަރުކާރަކީ އާންމު ރައްޔިތުންގެ އަޑު އެންމެ ގާތުން އަހާނެ ސަރުކާރެއް ކަމަށް ދައުވާ ކުރި އިރު ސަހްޔޫނީންގެ ޕާސްޕޯޓް އަދިވެސް މަނައެއް ނުކުރެވެއެވެ. މި މައްސަލަ ރައްޔިތުންގެ މަޖިލީހުގައި އޮންނަތާ 100 އެތައް ދުވަސްވީއެވެ. ތަނެއް ކަހާ ހިރުވާ ވެސް ނުލަނީއެވެ. މިކަން ނުވެގެން މިއުޅެނީ މަޖިލިސް ޗުއްޓީގައި އޮތުމުން ކަމަށް ސަރުކާރުގެ އިސްތަރުޖަމާނު ހީނާ ވަލީދު ވިދާޅުވި ނަމަވެސް މަޖިލިސް ރައީސް ވަނީ މުހިންމު ކަމެއް ކުރަން ދައުރުން ބޭރުން ޖަލްސާ ބާއްވަން ފަހެއް ނުޖެހޭނެކަމަށް ވިދާޅުވެފައެވެ. އަދި ދައުރުން ބޭރުން 2 ޖަލްސާއެއް ވެސް ބޭއްވިއެވެ. ފަސް ޖެހުނީ މަޖިލިސް ރައީސް އަދުރޭ ވެސް ސަހްޔޫނީންގެ ޕާސްޕޯޓް މަނާކުރުމަށް ދައުރުން ބޭރުން ޖަލްސާއެއް ބޭއްވުމަށެވެ.

މިއީ މި ސަރުކާރަށް ވާވަރެވެ. އެމެރިކާއަށް ބިރުން ސަހްޔޫނީންގެ ޕާސްޕޯޓް މަނާ ނުކުރެވުނުތާ، އެމެރިކާއާއި ގުޅުން ބަދަހިކުރުމަށް މި ފެށީ ސަހްޔޫނީންނަށް ވާގިވެރިވާ "ޕްރަޑަކްޓްސް" ބޭނުންކޮށް އިސްތިހާރު ކުރާށެވެ. ވެރިޔެއް ވެއްޓޭނެ އެންމެ ދަށުދަރަޖައަކަށް ވެއްޓި ހުސްވީއެވެ.