ރައީސް ޑރ. މުހައްމަދު މުއިއްޒުގެ ސަރުކާރަށް މާ ހެޔޮ އެދިގެން ވަޒީރުންނަށް ރުހުން ނުދީގެން އަޑު ހަރުކޮށް ވަކާލާތުކުރި މަހުޖަނު، މާމިގިލީ ދާއިރާގެ މެމްބަރު ގާސިމް އިބްރާހިމު، އެ ވަޒީރުންނަށް ރުހުން ދޭން ނުދާކަން ހާމަވެއްޖެއެވެ.

ވަޒީރުންގެ ތެރެއިން ބައެއް ވަޒީރުންނަށް ރުހުން ނުދިނުމަށް އެމްޑީޕިއާ ޑިމޮކްރެޓްސް އިން ނިންމުމާ ގުޅިގެން ޕީއެންސީގެ މެމްބަރުން ވަނީ އާދިއްތަ ދުވަހު ބޭއްވި ދައުރުން ބޭރު ޖަލްސާގައި ވަޒީރުންނަށް ރުހުން ހޮދަން ވޯޓަށް އެހުނަ ނުދީ ރިޔާސަތަށް ހުރަސް އަޅާފައެވެ. އެއާއެކު މަޖިލިސް ތަޅުމުން ނުކުމެވަޑައިގެން ޖޭޕީގެ ލީޑަރުކަން ވެސް ކުރައްވާ ގާސިމް ވިދާޅުވީ އެއީ ރައްޔިތުންގެ ބޮޑު އަޣްލަބިއްޔަތަކުން ގެނައި ސަރުކާރަކާ ދެކޮޅުވެރިވުން ކަމަށާ އެއީ އެމްޑީޕީއިން ރައްޔިތުންގެ ނިންމުން ބަލައި ނުގަންނަކަން ހާމަވެގެން ދާ ކަމެއް ކަމަށެވެ.

މީގެ އިތުރުން ގާސިމް ވަނި އެއީ ސަރުކާރު ހިންގަން ހުރަސް އަޅާ ވަޒީރުންނަށް ޒިންމާ އަދާކުރަން ހުރަސް އެޅުން ކަމަށް ވެސް ވިދާޅުވެފައެވެ.

ނަމަވެސް އެހާ ވަރަށް އެކަމަށް ވަކާލާތު ކުރުމަށް ފަހު އެ ވަޒީރުންނަށް ވޯޓަށް އަހަން ބޭއްވި ޖަލްސާގައި ގާސިމް ބައިވެރިވެވަޑައިނުގަންނަވައެވެ. ސަބަބެއް ހާމަވެފައިނުވާއިރު، ރައީސް މުހައްމަދު މުއިއްޒުގެ ސަރުކާރުން ވަނީ ގާސިމްއަށް ދެން އަންނަ މަޖިޅީހަކަށް ވެސް މާމިގިލީ ދާއިރާގެ ގޮނޑި ދޫކޮށްލާފައެވެ. އެގޮތުން ގާސިމް ކުރިމަތި ލައްވާތީ ޕީއެންސީއިން މާމިގިލީ ދާއިރާއަށް ކުރިމަތި ނުލާނެކަން ވަނީ އިއުލާންކޮށްފައެވެ. އެއާ އެކު ގިނަ ބަޔަކުވަނީ ގާސިމް މި ސަރުކާރު ގެންނަން ކުރީ ކޮން މަސައްކަތެއްތޯ ސުވާލު އުފައްދާފައެވެ. އަދި މިހާރުވެސް ސަރުކާރުގެ ދިފާއުގައި ތެދުވަން ވީ ވަގުތު ގާސިމް ގެއްލުނީ ކަމަސްބުނެ ގިނަ ބަޔަކު ދަނީ ފާޑުކިޔަމުންކަން ފާހަގަކޮށްލެވެއެވެ.