ކުރީގެ ރައީސް، އިބްރާޙިމު މުހައްމަދު ޞާލިޙުގެ ސަރުކާރުގައި ހިންގާފައިވާ ކޮރަޕްޝަންގެ މައްސަލަތަކުގެ ފަތްފުއްތައް ހުޅުވާ ބަލާ ތަހުގީގުކުރަން ރައީސް، ޑރ. މުހައްމަދު މުއިއްޒުގެ ސަރުކާރަށް ކެރޭނެތޯ އައްސަވާ ރައީސް އަބްދުﷲ ޔާމީންގެ ޗެލެންޖެއް ސުވާލެއްގެ ގޮތުގައި އަމާޒުކުރައްވައިފިއެވެ.

ރައީސް ޔާމީން މިފަދަ ސުވާލެއް އަމާޒުކުރެއްވީ އެމަނިކުފާނު އަލަށް އުފައްވަދާ ޕާޓީ، ޕީޕަލްސް ނެޝަނަލް ފްރޮންޓު(ޕީއެންއެފް) އިން މަޖިލީހަށް ކުރިމަތިލުމަށް ޝައުގުވެރިކަން ފާޅުކޮށްފައިވާ ކެންޑިޑޭޓުން ތައާރަފްކުރުމަށް ބާއްވަމުން ގެންދާ ސިލްސިލާ ޖަލްސާތަކުގެ ތެރެއިން އާދިއްތަ ދުވަހުގެ ރޭ ބޭއްވި ޖަލްސާގައި ކެންޑިޑޭޓަކަށް އަމާޒުކުރެއްވި ސުވާލުތަކުގެ ތެރެއިންނެވެ.

އެގޮތުން މައްޗަން ގޯޅީ އުތުރު ދާއިރާއަށް ޕީއެންއެފް ޓިކެޓުގައި ވާދަކުރުމުގެ ޝައުގުވެރިކަން ފާޅުކޮށްފައިވާ އައްސަދު ޝަރީފަށް އަމާޒުކުރެއްވި ސުވާލުތަކުގެ ތެރެއިން ރައީސް ޔާމީން ވަނީ ކުރިން ޕީޕީއެމްއަކީ ކޮރަޕްޝަންގެ ވާހަކަތައް ދެއްކޭނެ ފަޚްރުވެރިކަން ހުރި ޕޯޑިއަމްއެއް ނަމަވެސް އެ ފަޚްރުވެރިކަން ގެއްލިގެން ދިއުމުން އެތަނުން ނުކުންނަން ޖެހުނުކަން ހިތާމަޔާ އެކު ފާހަގަކުރައްވާފައެވެ.

ރައީސް ޔާމީން ވިދާޅުވީ ސަރުކާރު ހިންގާ ޕާޓީއަށް މަޖިލީހުގެ މެޖޯރިޓީ ލިބުމުން ބައެއް ފަހަރު ފެނިގެން ދަނީ ޓްރޮފީއެއްގެ ގޮތުގައި އޭގެ ބޭނުންކޮށް ވަކި ބަޔަކަށް ވަކި ގޮތެއް ގެންގުޅޭ މަންޒަރު ކަމަށެވެ. އެމަނިކުފާނު އެ އިޝާރާތްކުރެއްވީ ނިމި ދިޔަ ފަސް އަހަރު އެމްޑީޕީގެ ސުޕަރ މެޖޯރިޓީ އޮވެ މަޖިލީހުގެ ތެރެއިން ކަންކަން ކުރަމުްނ ދިޔަ އުސޫލަށް ކަމަށް ބެލެވެއެވެ.