އދ. ގެ 79 ވަނަ އާންމު މަޖިލީހުގައި ރައީސް މުހައްމަދު މުއިއްޒު ދޮގު ހެދިކަން ހާމަވެއްޖެއެވެ.

މިހާރު އެމެރިކާގެ ނިއުޔޯކުގައި ކުރިއަށްދާ އދ. ގެ 79 ވަނަ އާންމު މަޖިލީހުގެ ޖަލްސާގެ ބަހުސްގައި، ރޭ ތަގްރީރު ކުރައްވަމުން ރައީސް ޑރ. މުހައްމަދު މުއިއްޒު ވަނީ ހަތަރު ދޮގެއް ހަދާފައެވެ.

އެގޮތުން އދ. ގެ އާންމު މަޖިލީހުގައި ބައިވެރިވެވަޑައިގެންނެވި ފުރަތަމަ ފަހަރު ވެސް ރައީސް މުއިއްޒު ވަނި ދިވެހިރާއްޖެއާ ގުޅުވާ ހަތަރު ދޮގެއް ހަދާފައެވެ.

18 މިނުޓުގެ ދިގުމިނުގެ އެ ތަގްރީރުގައި ރައީސް މުއިއްޒު ހެދި ހަތަރު ދޮގަކީ، ސިއްހީ ހިދުމަތް ދިނުމަށާއި ތައުލީމު ފޯރުކޮށްދިނުމާއި އިޖުތިމާއީ ކަންކަމުގައި އާޓިފިޝަލް އިންޓެލިޖެންސް ބޭނުންކުރާ ކަމަށް ބުނުމާ، ޑްރޯން ބޭނުންކޮށްގެން ބޭސް ޑެލިވާ ކުރާ ކަމަށް ބުނުމާ، ސްމާޓް ރޯޑު ސިސްޓަމް ރާއްޖޭގައި އިމްޕްލިމެންޓު ކުރި ކަމަށް ބުނުމުގެ އިތުރުން ޑިވެލޮޕްމަންޓު ބޭންކު ސެޓް އަޕް ކޮށްފި ކަމަށް ބުނި ބުނުމެވެ.

އެގޮތުން ސިއްހީ ހިދުމަތް ދިނުމަށާއި ތައުލީމު ފޯރުކޮށްދިނުމާއި އިޖުތިމާއީ ކަންކަމުގައި އާޓިފިޝަލް އިންޓެލިޖެންސް ބޭނުންކުރާކަމަށް ރައީސް މުއިއްޒު ބުނި ނަމަވެސް މި ދާއިރާތަކުގެ ކަންކަން ދުވަހުން ދުވަހަށް ބައްޓަން ކުރުމުގައި އޭއައި ބޭނުން ނުކުރާ ކަން ތޭރަ އޮންލައިނަށް ކަށަވަރު ކުރެވިފައިވެއެވެ.

ހަމަ އެހެންމެ ޑްރޯން ބޭނުންކޮށްގެން ބޭސް ޑެލިވާ ކުރާ ކަމަށް ބުނެ މެޑަލް ޖެހި އިރު، މިދިޔަ ސަރުކާރުން އެކަމަށް "މޯލްޑިވްސް ހެލްތު ލައިން" ގެ ނަމުގައި 2023 ވަނަ އަހަރު މަޝްރޫއެއް އިފްތިތާހު ކުރި ނަމަވެސް މިއަދާ ހަމައަށްވެސް އެ ހިދުމަތް ފަށާފައި ނުވެއެވެ. އެގޮތުން މި ސަރުކާރު އައިސް މި އަހަރު ފެބްރުއަރީ މަހުގެ ތެރޭގައި، ހަ މަސް ދުވަހުގެ ތެރޭ އެ ހިދުމަތް ފަށާނެ ކަމަށް ބުނެފައިވީ ނަމަވެސް އެ ޚިދުމަތް އަދި އަދަށް ވެސް ވަނީ ޕާކްކޮށްފައެވެ.

ރައީސް މުއިއްޒުގެ ތިން ވަނަ ދޮގަކީ ސްމާޓް ރޯޑު ސިސްޓަމް އިމްޕްލިމެންޓު ކުރި ކަމަށް ބުނި ބުނުން ކަމަށްވާއިރު، ރާއްޖޭގައި މިހާތަނަށް މިފަދަ ސްމާޓް ރޯޑު ސިސްޓަމެއް ގާއިމުކޮށްފައި ނުވެއެވެ.

އދ. ގައި ދިވެހީންގެ ރައީސް ދިވެހީންގެ ރާއްޖެއާ ގުޅުވާ ހެދި ހަތަރު ވަނަ ދޮގަކީ ޑިވެލޮޕްމަންޓު ބޭންކު ސެޓް އަޕް ކުރި ކަމަށް ބުނި ބުނުނ ކަމަށްވާއިރު ރާއްޖޭގައި ފުރަތަމަ ފަހަރަށް ޑިވެލޮޕްމަންޓު ބޭންކް މި ވެރިކަމުގައި އުފެއްދި ނަމަވެސް އެ ބޭންކު އެކުލަވާލުމުގެ މަސައްކަތް އަދި ނިމިފައި ނުވާކަން މިއީ އެންމެންނަށް ވެސް އެނގޭ ހަގީގަތެކެވެ. އެ ބޭންކުން ހިދުމަތް ދޭން މި އަހަރުގެ ޖުލައި މަހު ފަށާނެ ކަމަށް ބުނި ނަމަވެސް އެކަން އަދި އޮތީ ނުނިމިއެވެ.

އެހެންކަމުން ޑރ. ކައްޒާބު ކަމަށް ގިނަ ބަޔަކު ތުހުމަތު ކުރައްވާ ރައީސް މުއިއްޒު މިވަނީ އދ ގައި ވެސް އޮޅުވާލުންތަކެއް އޮޅުވާލާފައެވެ.