އިންޑިއާ އަސްކަރިއްޔާ ބޭރުކުރަން ވޯޓު ހޯދައިގެން އައި މީހުން ތިބީ އިންޑިއާ އުނގަށް ވެއްޓިގެން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

އުމަރު މިފަދައިން ވިދާޅުވީ، ރާއްޖެ ޓީވީގެ "ސުވާލަކީ" ޕްރޮގްރާމުގައި ވާހަކަދައްކަވަމުންނެވެ.

އުމަރު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރު ވެރިކަމަށް އައީ އިންޑިއާގެ އަސްކަރިއްޔާ ބާލަން ކަމަށާއި، މަގުތަކުގައި ޖަހާފައި ހުރި ހޮޅިދަނޑީގައި އަދިވެސް ހަރުކުރި ޕޯސްޓަރުތައް އެބަހުރިކަމަށެވެ.

އުމަރު ވިދާޅުވީ އެ ޕޯސްޓަރުތަކުގައި އޮތީ އިންޑިއާ ސިފައިން ބާލާ ވާހަކައެއް ނޫން ކަމަށާއި، އޭގައި އޮތީ އިންޑިއާގެ އަސްކަރިއްޔާ ބާލާ ވާހަކަ ކަމަށެވެ.

އުމަރު އިތުރަށް ވިދާޅުވީ، އިންޑިއާގެ އަސްކަރިއްޔާ ބޭރުކުރާނެ ކަމަށް ބުނެ ވޯޓު ހޯދައިގެން އައި ނަމަވެސް އަދިވެސް އެ އޮތް ގޮތަށް އިންޑިއާ އަސްކަރިއްޔާ ރާއްޖޭގައި އެބައޮތް ކަމަށާއި، އިންޑިއާގެ ދެ ހެލިކޮޕްޓަރާއި މަތިންދާބޯޓަކާއި ރާޑަ ސްޓޭޝަންތައް އޮޕަރޭޓްކުރަން ތިބީ އިންޑިއާގެ މިނިސްޓްރީ އޮފް ޑިފެންސްގެ މުވައްޒަފުން ކަމަށެވެ. އަދި އެއީ އިންޑިއާގެ އަސްކަރިއްޔާގެ މީހެއްކަމުގައި ވިޔަސް އެމީހުންނަނީ އިންޑިއާގެ އަސްކަރިއްޔާގެ ހަތިޔާރު އޮަޕަރޭޓްކުރާ މީހުން ކަމަށެވެ.

އުމަރު ވިދާޅުވީ، މިހާރު ފެންނަމުން ދަނި ކުރީ ސަރުކާރުން އިންޑިއާ އާ ބޭއްވި ގުޅުމަށްވުރެ ވެސް ގާތް ގުޅުމެއް މި ސަރުކާރުން ބާއްވަމުން ގެންދާ މަންޒަރުކަމަށާ އެގޮތުން މި ސަރުކާރުން އިންޑިއާ އާ ގާތްވީނުން ގޮސް އިންޑިއާގެ އުނގަށް ވެއްޓިފައިވާ ކަމަށް އުމަރު ވިދާޅުވިއެވެ.

އުމަރު ވިދާޅުވީ މި ސަރުކާރު ގެންނަށް ވޯޓު ދިން މީހުންނަށް މި ސަރުކާރުން ހިޔާނާތްވެއްޖެ ކަމަށެވެ. ޕީއެންސީގެ ވަރަށް ގާތް ބޭފުޅުން ތިބޭނެ ކަމަށާއި، އެ ބޭފުޅުންނަށް ދަންނަވަން ބޭނުންވަނީ އެއީ ވަރަށް ބޮޑު ހިޔާނާތެއް ކަމަށް އުމަރު ވިދާޅުވިއެވެ.