ނިމި ދިޔަ ސަރުކާރުން ދިވެހި ރައްޔިތުންނަށް ދޫކުރި ގޯއްޗާ ފްލެޓު ނުދީ މި ސަރުކާރުން ލަސްކުރަމުން ގެންދާތީ އެކަމާ ދެކޮޅަށް އަޑު އުފުލުމަށް މިރޭ އެއްވުމެއް ބާއްވަން ނިންމައިފިއެވެ.

ބިންެވެރިޔާ ސްކީމުން ބިން ލިބުނު ފަރާތްތަކަށާ ގެދޮރުވެރިޔާ ސްކީމުގެ ދަށުން ފްލެޓު ލިބުނު ފަރާތްތަކުން ނުހަނު ފޮނި އުއްމީދުގައި ތިއްބާ މި ސަރުކާރު އައިސް 10 މަސްވެގެެން ދިޔައިރުވެސް ހައްގުވެރިންނަށް އެތަންތަން ނުލިބުމަކީ ގިނަ ބަޔަކު ކަންބޮޑުވާ ކަމަކެވެ.

އެގޮތުން ގޯއްޗާ ފްލެޓު ލިބުން ލަސްވާތީ ސިލްސިލާ މުޒާހަރާތައް ގުޅިފަޅު އެސޯސިއޭޝަންއާ ގިރާވަރުފަޅު އެސޯސިއޭޝަންއިން އިންތިޒާމުކޮށްގެންވެސް މީގެ ކުރިން ކުރިއަށް ގެންގޮސްފައިވާއިރު މިރޭ 09:00 ގައި ރަސްފަންނުގައި "ގޯތި އެއްވުން" ބާއްވާނެކަން ވަނީ އިއުލާންކޮށްފައެވެ. އަދި މިކަމުގެ މަސްލަހަތު ހިމެނޭ ވީހާ ވެސް ގިނަ ބަޔަކު މި އެއްވުމުުގައި ބައިވެރިވުމަށް ވަނީ ދައުވަތު އަރުވާފައެވެ.

ސުލްހަވެރި އިހުތިޖާޖުގައި މީގެކުރިން ބައިވެރިން ވަނީ ބޯހިޔާވަހިކަމަށް ހައްލު ގެނެސްދިނުމަށް ގޮވާލާފައެވެ. އަދި ފްލެޓްތަކުގެ މައްސަލަ ދިގުލައިގެން ދިއުމާއި، ގުޅީފަޅު މަޝްރޫޢުގެ އިތުރުން ހުޅުމާލެ ފޭސް 3 ގެ މަޝްރޫޢުތައް ހުއްޓާލުމަކީ ރައީސް މުޢިއްޒުގެ ސިޔާސީ އެޖެންޑާތަކާ ގުޅިފައިވާ ކަންކަން ކަމަށް ރައްޔިތުން ތުހުމަތުކޮށްފައިވެއެވެ.

ހަމައެހެންމެ ހައްގުތައް ކަށަވަރުކުރަން ރައްޔިތުން ދެން އިހުތިޖާޖުކޮށް މަގުމަތީ އަޑުގަދަ ކުރަން ނުޖެހޭނެކަމަށް ވިދާޅުވި ނަމަވެސް އަދިވެސް އެކަން އޮތީ އެހެންކަމަށް ވެސް އިހުތިޖާޖުގެ ބައިވެރިން ބުނެފައިވެއެވެ.

ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުން މާލޭގެ ރައްޔިތުންނަށް ގޯތި ދޫކުރުމަށް ކުރިއަށް ގެންދިޔަ "ބިންވެރިޔާ" ސްކީމުގެ ތެރެއިން 9،000 އަށް ވުރެ ގިނަ ގޯތި ދޫކޮށްފައިވެ އެވެ. މި ގޯތި ދޫކޮށްފައިވަނީ ހުޅުމާލޭގެ އިތުރުން ގުޅީފަޅާއި ގިރާވަރުފަޅުންނެވެ.