އދ ގެ ސަލާމަތީ މަޖިލީހުގައި ރައީސް މުހައްމަދު މުއިއްޒު ތަގްރީރުކުރެއްވުމުގެ ނަމުގައި ކުޅުއްވީ ޑްރާމާ އެއް ކަމަށާ އެކަމުން ރާއްޖެއަށާ ދިވެހި ރައްޔިތުންނަށް ވީ ފައިދާއެއް ނެތް ކަމަށް ކުރީގެ ކޮމިޝަނަރަ އޮފް ޕޮލިސް ހުސެއިން ވަހީދު ވިދާޅުވެއްޖެއެވެ.

ހުސެއިން މިފަދައިން ވިދާޅުވީ ބުރާސްފަތި ދުވަހުގެރޭ ދަ ފްރޮންޓް އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ހުސެއިން ވަނީ ރާއްޖޭގައި ގިނަ ކަންބޮޑުވުންތައް ހުރި އިރު އެއިން ކަމަކަށް އަލިއަޅުވާލައްވާ ރައީސް މުއިއްޒު ތަގްރީރު ބައްޓަން ނުކުރެއްވުން ނުރުހުން ފާޅުކުރައްވާފައެވެ. އެގޮތުން ރާއްޖޭގެ ކަނޑުން ބައެއް ގެއްލިފައިވާއިރު އެކަމާ ގުޅިގެން އެއްވެސް ބަސްފުޅެއް ވިދާޅުވެފައި ނުވާކަމަށާ ސްމޯލް އައިލެންޑް ސެކިއުރިޓީއާ ގުޅުން ހުރި ކަންކަމަށް ވެސް އަލިއަޅުވާ ލައްވާފައި ނުވާތީ ހުސެއިން ވަނީ ކަންބޮޑުވުން ފާޅުކުރައްވާފައެވެ.

ހުސެއިން ވިދާޅުވީ، ރައީސް މުއިއްޒު އދ ގައި ކުޅުއްވީ ޑްރާމާ އެއް ކަމަށާ އެކަމުން ދިވެހި ރައްޔިތުންނަށް ވީ ފައިދާއެއް ނެތް ކަމަށެވެ.

ދިވެހިންގެ ރާއްޖެއެއް ހޯދައިދޭން ވެރިކަމަށް އައި ދިވެހީންގެ ސަރުކާރުން ރައްޔިތުންނަށް ހެޔޮވާނެ އެއްވެސް ކަމެއް ކުރުމުގެ ވިސްނުމެއް ނުގެންގުޅުއްވާ ކަމަށް ވެސް ހުސެއިން ިވދާޅުވިއެވެ.