ގއ. ދެއްވަދޫ މަސްވެރިންނާއި އޮޑިވެރިން މުޒާހަރާއަށް ތައްޔާރުވެ ތިބުމުން އެ ރަށަށް ނުގޮސް މިޝަރީޒް މިނިސްޓްރީގެ ވަފްދު ފިލައިފިއެވެ.

ތޭރަ އޮންލައިނަށް މައުލޫމާތު ލިބުނުގޮތުގައި ފިޝަރީޒްގެ ވަފުދު އެރަށަށް ދާން އޮތީ ހުކުރު ދުވަހުގެ މެންދުރުފަހު 3:00 ގައި ކަމަށެވެ. ނަމަވެސް ދެއްވަދޫއަށް ދާން އޮތް ދަތުރު ކެންސަލް ކުރިކަން ކައުންސިލުން މިހާރު އަންގާފައިވާ ކަމަށް ވެސް ވަނީ މައުލޫމާތު ލިބިފައެވެ.

މަސް ދޯނި ފަހަރުގައި ލޮނު ފެނުން މަސް ފިނިކުރާ ނިޒާމު ގާއިމު ކުރުމުގެ މަޝްރޫއާ ބެހޭ މައުލޫމާތު ދިނުމަށް ފިޝަރީޒް މިނިސްޓަރީގެ ޑެޕިއުޓީ މިނިސްޓަރުން ހިމެނޭ ވަފުދަކުން މިހާރު ދަނީ ދެކުނުގެ ބައެއް ރަށްރަށަށް ދަތުރެއް ކުރަމުންނެވެ. އެ ދަތުރުގެ ތެރެއިން އިއްޔެ އެ ވަފުދު ދިޔައީ ގއ. ދާންދޫ އަށެވެ.

ނަމަވެސް އެ ރަށު މަސްވެރިން ވަނީ ސަރުކާރުން މަސްވެރިންނަށް ދޭންޖެހޭ ފައިސާ ނުދީ އެ ރަށަށް ނޭރޭނެ ކަމަށް ބުނެ އެ ވަފުދު އެ ރަށުން ފޮނުވާލާފަ އެވެ. ފިޝަރީޒްގެ ވަފުދު ދެއްވަދޫއަށް ދާން އޮތްކަން އެނގުމާއެކު، އެ ރަށު ބަނދަރު މަތީގައި ވުސް ބެނާތައް ދަމައި މަސްވެރިންނާއި އޮޑިވެރިން ތިބީ މުޒާހަރާއަށް ތައްޔާރުވެގެންކަން ވަނީ ހާމަވެފައެވެ.

މި ސަރުކާރުން ވެރިކަމަށް އައީ މަސްކިރާތާ 48 ގަޑިއިރު ތެރޭ މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.ނަމަވެސް މަސްވެރިންނަށް ފައިސާ ދިނުމުގައި އިހުމާލުވަމުންދާތީ މަސްވެރިން އަންނަނީ ސަރުކާރާ ދެކޮޅަށް މުޒާހަރާ ކުރަމުންނެވެ.