ރައީސް ޑރ. މުހައްމަދު މުއިއްޒުގެ ސަރުކާރުން ދުނިޔެއާ ގާތްވުމުން ރާއްޖެއަށް އެކަމުން ލިބުނު މަންފާއަކާ މެދު ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ސުވާލު އުފައްދަވައިފިއެވެ.

‏މަލީހު މިފަދަ ސުވާލެއް އުފެއްދެވީ އެކްސްގައި ކުރެއްވި ޕޯސްޓެއްގައެވެ.

އެގޮތުން އެންވަޔަރަމަންތު މިނިސްޓަރު ތޯރިޤު އިބްރާހިމު، ރައީސް އަބްދުﷲ ޔާމީނަށް އަމާޒު ކުރައްވާ ވިދާޅުވި ބަސްފުޅުތަކަކާ ގުޅިގެން މަލީހު ވަނީ ރައްދު ދެއްވާފައެވެ.

ރައީސް ޔާމީން އެމަނިކުފާނުގެ ޒައާމަތުގައި ރާއްޖެ ދުނިޔެއާ އެކަހެރި ކުރި ކަމަށް ވަޒީރު ތޯރިޤު ވިދާޅުވެފައިވާ ވުމަށް ރައްދު ދެއްވާ މަލީހު ވިދާޅުވީ ރައީސް މުއިއްޒަށް ހުޝާމަދު އެހާވަރަށް ނުކުރިޔަސް ވަޒީފާގައި ބަހައްޓަފާނެ ކަމަށެވެ.

މީގެ އިތުރުން ދުނިޔެއާއި ކައިރިވެގެން ކިހާ ފައިސާއެއް މުއިއްޒު ސަރުކާރަށް ލިބިއްޖެ ތޯ އައްސަވާ މަލީހު ވަނީ ވަޒީރަށް ސުވާލެއް އަމާޒުކުރައްވާފައެވެ.

ހަމައެހެންމެ މިނިސްޓަރު ތޯރިޤް ރައީސް ޔާމީނާ މިއަދު ދިމާކުރަން ލަދު ގަންނަން ޖެހޭނެ ކަމަށާ މިއީ ޑިމޮކްރަސީގައި ހަޑި ކަންކަން ކަމަށް ވެސް މަލީހު ވަނީ ވިދާޅުވެފައެވެ.

ރައީސް ޔާމީން ދުނިޔެއާ ރާއްޖެ އެކަހެރި ކުރިކަމަށް ވަޒީރު ތޯރިގު ތުހުމަތު ކުރެއްވާއިރު ރައީސް ޔާމީން ވަނީ އެމަނިކުފާނުގެ ޒައާމަތުގައި ދިވެހީންގެ ކަންކަން ދިވެހީން ނިންމަން ފުރުސަތު ދެއްވާފައެވެ. އަދި ރާއްޖެއަށް އެކި ގޮތް ގޮތުން އަތްގަދަ ކުރަން މަސައްކަތްކުރި ގައުމުތަކާ އެމަނިކުފާނު ރާއްޖެ އެކަހެރިކުރެއްވިއެވެ. އަދި އެފަދަ ކަންކަމުން ދުރުހެލިވާން ކޮމަންވެލްތުންވެސް ރާއްޖެ ބޭރުވިއެވެ.