ސަރުކާރު ތެރެއިން ވައްކަން ގިނަވެފައިވާތީ ފާޑުކިޔުން އަމާޒުކުރި ވެމްކޯގެ މުވައްޒަފަކު ސަސްޕެންޑްކޮށްފިކަން ހާމަވެއްޖެއެވެ.

މިކަން ހާމަވެފައިވަނި އެ މުވައްޒަފު ޓިކުޓޮކުގައި ޕޯސްޓުކުރި ވީޑިއޯއަކުންނެވެ.

އެގޮތުން ވެމްކޯގެ މުވައްޒަފެއް ކަމަށްވާ ޒުބެއިރު ނަމަކަށް ކިޔާ އެ މީހާވަނީ މީގެ ދެތިން ދުވަސް ކުރިން، އޭނާ ސަރުކާރަށް ފާޑުކިޔާތީ ވަޒީފާއިން އެކަހެރިކޮށްފައިވާ ކަމަށްބުނެފައެވެ. އެގޮތުން ސަރުކާރުގެ ތެރެއިން ބޮޑެތި ވައްކަންތައް ކުރަމުންދާއިރު ވެރިން އެކަންކަން ބަލަން ތިބޭތީއާ އަދި އެކަމާ މެދު ފިޔަވަޅު ނާޅާތީ އެ މިހާވަނީ ފާޑުކިޔާފައެވެ.

މީގެ އިތުރުން އޭނާ ވަނީ އިތުރު މިނިސްޓްރީއެއް ހަދަން ވެސް ގޮވާލާފައެވެ.

އެގޮތުން "މިނިސްޓްރީ އޮފް އާރމްސް ކަޓު"ގެ ނަމުގައި މިނިސްޓްރީއެއް ގާއިމުކޮށް ވައްކަން ކުރާ ވެރިންގެ އަތް ބުރިކުރަން ޖެހޭ ކަމަށް އޭނާ ވަނީ ބުނެފައެވެ.

މިއާއެކު އޭނާއަށް އިންޒާރު ދީ އޭނާ ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށާ ނަމަވެސް ހައްގު ބަސް ބުނުމުގައި ފަހަތަށް ނުޖެހޭނެ ކަމަށް އެމީހާ ވަނީ ބުނެފައެވެ.

މިކަމާ ގުޅިގެން ވެމްކޯގެ ބަހެއް ހޯދާލަން ކުރި މަސައްކަތް ވަނީ އަދި ކާމިޔާބު ވާ ގޮތް ނުވެފައެވެ.