ޖަޒީރާ ރާއްޖެއަކުން ދިވެހީންގެ ރާއްޖެއަކަށް އަލިވިލުނީ އެތައް ދިވެހީން ނެތްގެ ބުރަ މަސައްކަތުންނެވެ. އެތައް ބަޔަކު ވީ ގުރުބާނީއާ ތަހައްމަލުކުރި އަނިޔާވެރިކަމަށް ނިމުމަށް ގެނައުމަށް ކުރި ބިޔަ ބޮޑު މަސައްކަތުންނެވެ.

ނަމަވެސް ދިވެހީންގެ ރާއްޖެއަށް މަރުހަބާކީތާ ދިހަ މަސް ފާއިތުވެގެންދާއިރު ފެނިގެން ދަނީ ކުރިން ހީކުރި ފަދަ ރާއްޖެއެއް ނޫން ކަމަށް ގިނަ ދިވެހީން ދަނީ ބުނަމުންނެވެ. އެގޮތުން ރައްޔިތުން މިހާރު އޮތް ވެރިކަން މަތިން އެންމެ ދިހަ މަހުގެ ކުރު މުއްދަތެއްގެ ތެރޭގައި ފޫހިވެ ނިމިއްޖެއެވެ. ސިޔާސީ މީހުން މަތިން ފޫހިވަނީ ފޫހިވާން ޖެހިގެން ކަމާ އެއީ ބަހާ އަމަލާ ދިމާ ނުވާތީކަން ނިކަން ރަގަޅަށް ހާމަވެގެން ހިނގައްޖެއެވެ.

އެގޮތުން ދިވެހީންގެ ރާއްޖެއެއް ހޯދުމަށް ކުރި މަސައްކަތުގެ ތެރެއިން ރައީސް ޑރ. މުހައްމަދު މުއިއްޒުއާ ބައިވެރިން ދިވެހީންނަށް ވީ ވައުދު ކަދުރު ރުކަށް އެރި މީހާގެ ނަދުރަށްވެ ފެން ނެތް ބޮޑެތި ކާށިތައް ބިނުމަށް ވެެގެން ހިނގައްޖެއެވެ.

އިންޑިއާ ސިފައިން ބޭލުމާ އިންޑިއާއެކު ވެފައިވާ އެއްބަސްވުންތައް ހާމަކުރުމާ ޗާގޯސް ވިއްކާލުމަށް ސިއްރު ޑީލެއް ދަށުން ފޮނުވި ސިޓިއާ މިފަދަ އެތައްކަމެއްގެ ވާހަަކަ މިއަދު އޮބިއްޖެއެވެ. ނޫނީ ކުރިން ބުނި އެއްޗެހި ކެންސަލްކޮށްފިއެވެ.

10 މަސް ދުވަސް ވެރިކަމަށް ވެގެން ދިޔައިރު ފެންނަނީ ވެރިމިހާ ބަހާ އަމަލާ ދިމާ ނުވާ މަންޒަރެވެ. އަޅުގަޑުގެ ބަހާ އަމަލާ ދިމާވާނެއޭ ވިދާޅުވި ރައީސްގެ ބަސް ދުވަނީ މަގު މެދުންނެވެ. އަމަލު ހިނގަނީ ދުވާރު މަތިން ނެވެ. އެހާވެސް ބަހާ އަމަލާ ދިމާނުވެއެވެ.

އަތް ފޯރާ ފަށަށް އަގުތައް ތިރި ކޮށްދޭނެކަމުގެ ވައުދު ދިޔައީ އަޑިންކަމެއް މަތިންކަމެއް ނޭނގެއެވެ. ޑޮލަރުގެ އަގު ހުރީ ހިފެހެއްޓިފައިކަމަށް ވިދާޅުވި ވިދާޅުމަކީ ހަމައެކަނި ރައީސް މީހާގެ އަނގަފުޅުން ހިފެހެއްޓެވި ހިފަހެއްޓެވުމެއްކަން ހާމަވެއްޖެއެވެ. އިގްތިސޯދު ރަގަޅުކޮށް ދަރަނި ދެއްކުމުގެ ފެހި ސިގްނަލް ރަތަށް ބަދަލުވެ އަވައްތެރިގައުމުތަކުގެ އަސްކަރީ މަތިންދާ ބޯތުތަކުގައި ދިވެހީންގެ ރައީސް އެ ގައުމުތަކަށް ހާޒިރުކުރަނީއެވެ.

ބަލިމަޑުކަމުގެ އެތައް ރޯގާއެއް ގައުމަށް ދިމާވެފައިވާއިރު މިހަރު އެންމެ ހަލުވިކޮށް ދައުރުވަނީ ދޮގު ވައުދުތަކުގެ ރޯގާއެވެ. މުޅި ރާއްޖެ މި ބަލި ތަހައްމަލުކުރަމުންދާއިރު މުޅި ގައުމު މިއޮތީ ބަލި އަތަށް އަޅާފައެވެ.

މީގެ ހައްލަކީ ކޮބައިތޯއެވެ؟ ތެދުވެރިކަމާ އިޚްލާސްތެރި ވެރިންތަކެކެވެ. ނަމަވެސް މިކަން ކަން ރަގަޅުކުރުމަށް މިފަދަ ވެރިންތަކެއް މިއަދު މިގައުމުގައި މަތިފަޑީގައި އެބަތިބިތޯ މިއީ އުފެދޭ ސުވާލެކެވެ. އެހެނީ ރައްޔިތުންނަށް ފައިދާވާ އެއްވެސް ކަމެއް ކުރުމުގެ ހެޔޮ ނިޔަތް މި ސަރުކާރުގައި އޮތްކަމަށް ނުފެނުމެވެ.

ގައުމު އިގްތިސޯދީ ބޮޑު ކާރިސާއެއްގެ ތެރޭގައި އޮއްވާ 10 މިލިއަނަށް ވުރެ ގިނަ ދިވެހި ފައިސާ ޚަރަދުކުރައްވާ ނިއު ޔޯކަށް ކުރެއްވި ދަތުރުފުޅުން ރައީސް މީހާގެ ޕީއާރު ޖެއްސެވުން ނޫންކަމެއް ހާސިލުނުކެރެވެއެވެ. ދެން މިއަދު އިންޑިއާއަށް ހާޒިރުކުރި ކުރުމުގައި ދިވެހި 50 ބޭފުޅުންގެ ވަފްދެއް ވަޑައިގެންފިއެވެ. މިކަމުން ދިވެހީންނަށް ކުރާނެ ރާހަތެއް އޮތްކަމަށް ނުބެލެވެއެވެ.

އެހެންކަމުން މިއަދު ގައުމުގައި ރައްޔިތުންގެ އިތުބާރު އޮތް ވެރިންތަކެއް ނެތެވެ. 10 މަސް ދިވެހީންގެ ރާއްޖެއަށް ވެގެން ދިޔައިރު "ހަފްތާ 14" ގެ ނަމުގައި ބޮޑު ފޮތެއް ނެރެވީ ވައުދުތައް ވެސް ހަމަ ހުރީ ހުރިތަނުގައެވެ. ވެރިކަމާއި ހަވާލުވެ ފުރަތަމަ ދެ ހަފްތާގެ ތެރޭގައި އެތައް މަޝްރޫއެއް ހިންގައި އެކަން ނިންމާނެކަމަށްވީ ވައުދުވެސް އަތްވެސް ނުލައެވެ.

ނިމިދިޔަ ސަރުކާރުން ސިއްރު ސިޓީއަކުން ވިއްކާލި ދިވެހި މަސްވެރިންގެ މަސްކަނޑު އަބުރާ ހޯދުމުގެ މަސައްކަތް ފައްޓަވާނެ ވާހަކަ ރައީސް މުއިއްޒު ފާހަގަކޮށްފައިވެއެވެ. ނަމަވެސް އަދި މިހާތަނަށް އޭގެ ވާހަކައެއްވެސް ދެކެވުނު އަޑެއް ނާހަމެވެ.

ކެމްޕެއިން ތެރެއިން ވެސް ރައްޔިތުންނަށް އޮޅުވާލީ މިފަދަ މަސައްކަތްތައް ވެރިކަން ލިބުމާއެކު ކުރާނެ ކަމުގެ ވައުދުވެ ވަޑައިގެންނެވެ. ނަމަވެސް އަދި އޭގެ ތެރެއިން ރައްޔިތުން އެންމެ ބޭނުންވާ މަސައްކަތްތައް ހުރީ ނުފެށިއެވެ. ފާޑުކިޔަސް ވަރިހަމަތާއެވެ.

މި ސަރުކާރުގެ މައިގަނޑު މައްސަލައަކީ، ނުވާވަރުން ވައުދުވާތީއެވެ. ބަހާއި އަމަލު ދިމާނުވާތީއެވެ.

ދިވެހީންގެ ރާއްޖެ ދޮގު ރާއްޖެއަކަށް ވެ ނިމިއްޖެއެވެ.