2023 އަހަރުގެ އޮކޮޓޯބަރު މަހުގެ 7 ދުވަހަކީ ފަލަސްތީނުގެ ތާރީޚުގައި ހަނދާން ކުރަން ޖެހޭ އެންމެ ހިތާމަވެރި އެއް ދުވަސްކަމީ އެއްވެސް ޝައްކެއް އޮތްކަމެއް ނޫނެވެ. އެއީ މެދުކެނޑުމަކަށް ފަހު، ސަހްޔޫނީން ފަލަސްތީނާ ދެކޮޅަށް އެންމެ ބޮޑު އަދި އަނިޔާވެރި ގަތުލުއާންމެއް ފެށި ދުވަހެވެ.

އެތައް ހާސް ބަޔަކު ޝަހީދުވެ މިލިއަނެއްހާ މީހުންގެ ގެދޮރު ގެއްލި، އެތައް ކުދިންނެއް ޔަތީމްވެ، އަންހެނުން ހުވަފަތްވެ، މައިންނާއި ދަރިން ގެއްލި، އެތައް ބައެއްގެ ހަޔާތް އަނދިރިވެގެން ދިޔައީ ހަމަ އިއްޔެގެ ވަގުތެއްގައެވެ.

ދިވެހިރާއްޖެއަކީ އަބަދުވެސް ފަލަސްތީނުގެ ހައްގުގައި އަޑުއުފުލަމުން އަންނަ ގައުމެކެވެ. ފަލަސްތީނުގެ ރައްޔިތުންގެ އިހުސާސްތައް އެންމެ ފަސޭހައިން ދަނެގަނެވޭނީ ވެސް ދިވެހިރައްޔިތުންނަކަމަށް ބުނެއެވެ. އެއީ މުސްލިމުންނަށްވީތީއެވެ.

2023 ވަނަ އަހަރުގެ ރިޔާސީ އިންތިޚާބް ކާމިޔާބުކުރެެއްވި އަދުގެ ރައީސް ޑރ މުހައްމަދު މުއިއްޒަކީ ވެސް ހަމަ އެހެން ފަރާތްތަކެކޭ އެއްފަދައިން ފަލަސްތީނުގެ މިނިވަންކަމަށް ވަކާލާތު ކުރެއްވި ބޭފުޅެކެވެ. ރައްޔިތުން ހީކުރީ އެފަދައިން އަމަލުތައް ބެހެއްޓެވީމަ ދެން ސަހްޔޫނީން ރާއްޖެ އެތެރެވުން ވެސް މަނާކުރައްވާނެކަމަށެވެ. މީގެ އެންމެ ހައިރާންވަނީ ސަހްޔޫނީގެ ޕާސްޕޯޓް މަނާކުރާނެކަމަށް ވައުދުވެސް ވަޑައިތީމައެވެ.

ރައީސުލްޖުމްހޫރިއްޔާގެ އެންމެ ގަރާރަކުން ވެސް އެކަން ކުރެވެން އޮއްވާ އެކަން މަޖިލާހާ ޖާމިނު ކޮށް ނިންމާލިއެވެ. މިހާރު މަޖިލީހުގައި އެ މައްސަލަ ނުނިމި އޮންނަތާ ވެސް 100 އެތައް ދުވަސްވީއެވެ. އެމަނިކުފާނު މިކަމުގައި އަމަލު ބެހެއްޓެވި ގޮތުން ސާބިތު ވެގެންދިޔައީ ފަލަސްތީނުގެ ބޭނުން އެމަނިކުފާނު ކުރައްވަނީ ސިޔާސީ ބޭނުމެއްގައިކަމެވެ.

ޕާސްޕޯޓް މަނާނުކުރެވިގެން އުޅެނީ މަޖިލިސް ޗުއްޓީގައި އޮވެގެންކަމަށް ބުނިއިރު މަޖިލިސް ޗުއްޓީގައި އޮއްވާ ދައުރުން ބޭރު ޖަލްސާ ބާއްވާފައި ޕީޖީ އަކު ހޮވާ އަނެެއްކޮޅުން ކުންފުނި ގަނޫނޫ ވެސް އިސްލާހު ކުރިއެވެ. މިކަމުން ދޭހަވީ މި ވެރިން ކުރަން ބޭނުން ކަމެއް ކުރާނެކަމެވެ.

ދެން ކަން މިހެން ހުރި އިރު، ދާދި ފަހުން އދ ގެ 79 ވަނަ ސަލާމަތީ އަދި އާންމު މަޖިލީހުގައި ބައިވެރިވެވަޑައިގަތުމަށް އެމެރިކާއަށް ކުރެއްވި ދަތުރުފުޅުގައި ދުބާއީގައި ޓްރާންސިޓް ކުރެއްވި އިރު، ސަހްޔޫނީންނަށް ވާގިވެރިވާ ކުންފުންޏެއްގެ އުފެެއްދުމެއްކަމަށްވާ "ކޮސްޓަރ" ބްރޭންޑްގެ ކޮފީއެއް ބޯ މަންޒަރު ރައީސް އޮފީހުގެ ރަސްމީ އެކައުންޓްތަކުން ވަނީ އިޝްތިހާރުކޮށްފައެވެ. މިކަމާ އާންމުން ފާޑުކިޔަމުންދިޔައިރު ސަލާމަތީ ޖަލްސާގައި ބައިވެރިވެ ދުނިޔޭގެ އެހެން ގައުމުތަކަށް ވަނީ "ފިނޑި" އަށް ގޮވާފައެެވެ.

އެހެން ގައުމުތަކަށް ފިނޑިއަށް ގޮވިއިރު މިއުޅެނީ އަމިއްލަމީހާއަށް ސަހްޔޫނީންގެ ޕާސްޕޯޓް މަނާނުކޮށްލެވިގެންނެވެ. މިއީ ހާލަތެވެ.

ފަލަސްތީނުގެ ހާލު އެފަދައިން އޮންނަތާ އަހަރެއް ފުރުނުއިރު ފަލަސްތީނުގެ ނަމުގައި މި ސަރުކާރުން ކުޅުނީ ޑްރާމާއެވެ. އެހެން މުސްލިމް ގައުމުތަކުގެ ކުރިމަތީ މިއަދު ދިވެހިރާއްޖެ ލަދުގަނެއެވެ. އެވަރުން ވެސް ޕާސްޕޯޓް މަނާކޮށް އެމީހުންނަށް ވާގިވެރިވާ ކުންފުނިތަކުގެ އުފެއްދުން ރާއްޖެ އެތެރެކުރުން މަނާކުރަން ވިސްނާވެސް ނުލަނީއެވެ.

ލިބޭ އެންމެ ދެ ޑޮލަރަކަށްޓަކައި މިހާ ދަށުދަރަޖައަށް ރާއްޖެ ވެއްޓުނީމަ ދެރައެވެ.