މިދިޔަ އަހަރުގެ އޮކްޓޯބަރު މަހުގެ 07 ވަނަ ދުވަހު ފަލަސްތީނާއި ދެކޮޅަށް ސަހްޔޫނީން ހިންގަމުންދާ ގަތުލުއާންމުއަށް އަހަރެއް ވުމާ ގުޅިގެން ބޮޑު އެއްވުމަކާ އެކު އިތުރު ހަރަކާތްތަކެއް ކުރިއަށް ގެންދަން ނިންމައިފިއެވެ.

ދިވެހި ޒުވާނުންތަކެއް ގުޅިގެން ކުރިއަށް ގެންދާ ޔޫތް ފޯ ޔުނިޓީ އިން އިސްނަގައިގެން ކުރިއަށް ގެންދާ ހަރަކާތުގައި، އާއިލީ ހަވީރަކާ ބޮޑު ހިނގާލުމެއްގެ އިތުރުން ބޮޑު އެއްވުމެއް ވެސް ބޭއްވުމަށް ވަނީ ނިންމާފައެވެ.

އެގޮތުން އާއިލީ ހަވީރު ބޭއްވުމަށް ހަމަޖެހުފައިވަނީ މާދަމާ 4:15 އިން 6:00 އަށެވެ. ބޮޑު ހިނގާލުން ބޭއްވުމަށް ހަމަޖެހިފައިވަނީ ހުކުރު ދުވަހުގެރޭ 8:00 ގައެވެ. ހިނގާލުން، ސޯޝަލް ސެންޓަރުން ފަށާއިރު ނިންމާ ގޮތަށް ހަމަޖެހިފައުވަނީ އާޓިފިޝަލް ބީޗުންނެވެ.  އަދި ބޮޑު އެއްވުން އޮންނާނީ ހިނގާލުން ނިންމާލުމަށްފަހު އާޓިފިޝަލް ބީޗު ސަރަހައްދުގައި މާދަމާރޭ 9:00 ގައެވެ.

އާއިލީ ހަވީރާއި ބޮޑު އެއްވުމުގައި ފަންޑު ފޮށި ބެހެއްޓުމަށް ވަނީ ހަމަޖެހުފައެވެ. އަދި ހަރަކާތްތަކުން ލިބޭ ފައިސާ ފަލަސްތީނަށް ހަދިޔާ ކުރުމަށް ވަނީ ނިންމާފައެވެ.

މި ހަރަކާތްތަކުގެ މަޤްޞަދަކީ ދުނިޔޭގެ އެހެނިހެން ޤައުމުތަކުގަ ހިންގޭ ހަރަކާތްތައް ފަދައިން، ދިވެހީންގެ ހިތްތައް ފަލަސްޠީނާއެކު ދެމިއޮންނާނެކަމާއި، ދިވެހިންގެ އެއްބައިވަންތަކަން ނުގުޑާކަން ދެއްކުމަށެވެ.

މި ހަރަކާތުގައި ޔޫތް ފޯ ޔުނިޓީ އާ އެކު ރައިޓް މޫވްމަންޓް، ބްލަޑް ޑޯނާސް، ކޭކު ޑޯނާސް، ޝީލަޑް ހުޅުމާލޭ ސްޕޯޓްސް ކްލަބު އަދި ދުވާފަރު އިސްލާމިކް މޫވްމަންޓް ވެސް ބައިވެރިވާނެއެވެ.

މި ހަރަކާތުގައި ގިނަ އަދަދެއްގެ މީހުން ފަަލަސްތީނުގެ ހައްގުގައި ބައިވެރިވުމަށް އެ ޖަމްއިއްޔާގެ މެންބަރުން އެދިފައިވެއެވެ.