މި ސަރުކާރުން ކަންކަން ކުރަނީ ކުރީ ސަރުކާރަށް ވުރެވެސް ގޯސްކޮށް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ބުރާސްފަތި ދުވަހުގެ ރޭ ޕީއެންއެފް އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ޑރ. ޖަމީލު ވިދާޅުވީ ގައުމީ ސަލާމަތަށް ނުރައްކާވާ ގޮތަށް މި ސަރުކާރުން ކަންކަން ނުކުރައްވާނެ ކަމަށް ދިފާއީ ވަޒީރު ވިދާލުވި ނަމަވެސް ފެންނަމުން ދަނި މުޅިން އެހެން މަންޒަރެއް ކަމަށެވެ. އެގޮތުން ނިމިދިޔަ ސަރުކާރުގައި އިންޑިއާއާ އެކު އެއްބަސްވުންތައް ވުމުން އެންމެ ބޮޑަށް ފާޑުކީ ބޭފުޅަކަށް އަދުގެ ދިފާއީ ވަޒީރުވެވަޑައިގަންނަވާއިރު އިންޑިއާއަށް އެންމެ ފަހުން ރައީސުލްޖުމްހޫރިއްޔާ ކުރެއްވި ދަތުރުގައި ދިވެހި ސަރުކާރުން ވަނީ ގޮތް ނޭނގޭ، އަޑި ނޭނގޭ އެތައް އެއްބަސްވުންތަކެއް ސޮއިކޮށްފައި ނަމަވެސް އެއިން ކަމެއްގެ ހަގީގަތް ރައްޔިތުންނަށް ހާމަކޮށްދެއްވާފައި ނުވާކަމަށާ ކުރިން މި ބޭފުޅުން ވިދާޅުވަމުން ގެންދިޔަ ހުރިހާ ކަންކަމަށް ވުރެ ގޯސްކޮށް މި ބޭފުޅުންގެ ސަރުކާރުގައި ކަންކުރަމުން ގެންދާއިރު އޭރު އިންޑިއާއާ ދެކޮޅަށް އެންމެ ގިނަ މަސައްކަތްކުރެއްވި، އަދުގެ ދާޚިލީ ވަޒީރާ އާ ދިފާއީ ވަޒީރުވެސް ހަނު ތިއްބަވާކަން ފާހަގަކުރައްވާ ޑރ. ޖަމީލު ވިދާޅުވި، ލަދުގެ ކަންފުޅެއް ހުރި ނަމަވެސް އެ ބޭފުޅުން މިއަދު އިސްތިއުފާ ދޭން ޖެހޭ ކަމަށެވެ.

ރައީސް މުއިއްޒު އިންޑިއާއަށް ވެރިކަމުގެ ކުރީކޮޅު ފާޑުކިޔުމަށް ފަހު މިހާރު އިންޑިއާއާ ގާތް ގުޅުމެއް ބާއްވަން މަސައްކަތްކުރަމުންދާ ދިއުމަށް އިޝާރާތްކުރައްވާ ޑރ. ޖަމީލު ވިދާޅުވީ، ރައީސް މުއިއްޒު ހާ ޗަސްބެއް އަދި ހިތްވަރެއް ނެތް ވެރިއަކު ގައުމު ދެކެފައި ނުވާ ކަމަށެވެ.

އެގޮތުން އިންޑިއާ ކުރިމަތީ ގަދަ ބަސް ބުނުމަށް ފަހު އޭގެ ފަހުން އިންޑިއާ ދަރަނީގެ ވާ ފަށަށް ދަމާލުމާ އެކު ރައީސް މުއިއްޒު ކުޑަކަކޫ މައްޗަށް ތިރިވެ ސައިޒްވެއްޖެ ކަމަށް ވެސް ޑރ. ޖަމީލު ވިދާޅުވިއެވެ.