އިންޑިއާ ސިފައިން ތިބި އަދަދު ހޯދަން މިހާރު ޖެހޭނީ ރަމަލު ޖަހާ މީހެއް ކައިރިން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ބުރާސްފަތި ދުވަހުގެރޭ ޕީއެންއެފް އޮފީހުގައި އޮތް ޖަލްސާގައި އޯޑިއަންސްގައި އިންނަވާ ރައީސް ޔާމީން ވަނީ އިންޑިއާ މެދު މިސަރުކާރުން ގާތް ގުޅުން އުފައްދަން މަސައްކަތްކުރާއިރު މީގެ ކުރިން މި ސަރުކާރުގެ ވެރިން އިދިކޮޅުގައި ތިއްބަވާ ދައްކަވާފައިވާ ބައެއް ވާހަކަތަކަށް ނަޒަރު ހިންގަވާލައްވާފައެވެ.

އެގޮތުން ރައީސް ޔާމީން ވިދާޅުވީ، ހަނިމާދު އެއާޕޯޓުވެސް އިންޑިއާގެ ބާރުގެ ދަށުގައި އޮތުމުން ކުރިން ފާޑުކިޔުމަށް ފަހު ވެރިކަމަށް ވަޑައިގެން އަނެއްކާވެސް އިންޑިއާއަށް ހަނިމާދު އެއާޕޯޓު ދީފިކަމަށާ ބަންކަރިންގެ ހިދުމަތް ދިނުމަށް އިންޑިއާގެ އެހީ ހޯދިކަމާ ރުޕޭކާޑު ބޭނުން ކުރަން ފެށުންވެސް ރައީސް ޔާމީން ފާހަގަކުރެއްވިއެވެ.

މީގެ އިތުރުން އިންޑިއާ ސިފައިންގެ އަދަދާ މެދު މިހާރު ސުވާލު އުފެދިފައިވާ ކަމަށާ އެ އަދަދު ކަށަވަރުކުރަން މިއަދު ރަމަލު ޖަހާ މީހެއްގެ އެހީ ހޯދަން ޖެހިފައިވާ ކަމަށް ވިދާޅުވ ރައީސް ޔާމީން ވަނި މަޖާޒީ ގޮތަކަށް ސަރުކާރަށް ފާދުވިދާޅުވެފައެވެ.

ރައީސް ޔާމީން ވިދާޅުވީ، ނިމިދިޔަ ސަރުކާރުން ގޮތް ނޭނގޭ އެއްބަސްވުންތައް އިންޑިއާއެކު ވެފައިވާ ކަމަށް އަޑުގަދަކޮށް އެ އެގްރިމަންޓުތައް ހާމަކުރުމަށް ގޮވާލި މީހުން މިއަދު ވެރިކަމުގައި ތިބެ އިންޑިއާއާ އެކު، ފާޅުގައި ރާއްޖޭގެ މިނިވަންކަމާ ސިޔާދަތު އަޅުވެތިކުރުމަށް ފަހު އެގްރިމަންޓުތައް އެކުލަވާލައިފި ކަމަށެވެ. އެގޮތުން އެމަނިކުފާނު ވަނީ އުތުރުތިލަފަޅުގެ އެއްބަސްވުންވެސް ކުރިން އޮތް ގޮތަށްވުރެ ވަރުގަދަކޮށް މި ސަރުކާރުން އިންޑިއާއެކު ގާއިމުކޮށްފިކަން ފާހަގަކުރައްވާފައެވެ.

ނަމަވެސް އޭގެ އެއްވެސް ތަފްސީލެއް ސަރުކާރުން ރައްޔިތުންނަށް ހާމަނުކުރާކަން ފާހަގަކުރައްވާ ރައީސް ޔާމީން ވިދާޅުވީ، މިއަދު ހުރިހާ ވެރިން ތިބީ ހަނުކަމަށެވެ.