ރައްޔިތުން ކައިރީ ފޮނި ވާހަކަތަކެއް ދައްކަންވެއްޖާ އަދުގެ ސަރުކާރުގެ ވެރިން ނިކަން ފޯރިހުރެއެވެ. މިކަން އެންމެ ބޮޑަށް ފާހަގަވެގެން ގޮސްފައި މިވަނީ 2023 ވަނައަހަރުގެ ރިޔާސީ އިންތިޚާބްގެ ކެމްޕެއިން ދުވަސްވަރުއެވެ. ރިޔާސީ އިންތިހާބުގެ ކެމްޕޭނުގައި ރައީސް މުއިއްޒު ވިދާޅުވީ ޒުވާނުން އުފައްދާ ތަކެތި އިންޓަނޭޝަނަލް މާކެޓުގައި ވިއްކުމުގެ ފުރުސަތު ދިނުމަށްޓަކައި ކްރިއޭޓާ އިކޮނޮމީ ގާއިމްކޮށްދ،ީ ޕޭޕަލްގެ އިތުރުން އެހެނިހެން ޕޭމެންޓު ގޭޓްވޭތައް ގެނެސް، ސެލާ އެކައުންޓްސްތައް ހުޅުވަން ޖާގަ ދީ އަދި ކޮންމެ މީހަކަށް ސިޓިޒަންސް ވޮލެޓެއް ދޭނެ ކަމަށެވެ. މިހެން އަޅުގަނޑު ބުނީމާ އޮޅުން އަރާފާނެއެވެ. ސާފު، ސީދާކޮށް ދަންނަވާނަމަ ރައީސް މުއިއްޒު ވައުދުވެޑައިގަތީ ޕޭޕަލް މެދުވެރިކޮށް ފައިސާ ގެންނަން، ޕޭޕަލް އިން ރާއްޖޭގައި ފައިސާ ދެއްކޭގޮތް ހެދުމަކަށް ނޫން، ޕޭޕަލް އިން އަބަދުވެސް ފައިސާ ދެއްކޭކަން ފާހަގަކޮށްލެވެއެވެ.

އެގޮތައް އެ ވައުދުވުމަށްފަހު އީވޮލެޓް ތައާރަފްކޮށްފައި ޕޭޕަލްއަށް އެކްސެސް ހޯދަން ސަރުކާރުން މަސައްކަތް ފަށާފައިވާކަމަށް ޖެނުއަރީ 7 ވަނަ ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީގެ މަގާމުގައި އޭރު ހުންނެވި އަދުގެ ހެލްތް މިނިސްޓާރ ޢަބްދުﷲ ނާޒިމް އިބްރާހީމް ވިދާޅުވިއެވެ.

ޖެނުއަރީ 15 ވަނަ ދުވަހު، އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ދިވެހި ސަރުކާރުގެ ޓްރޭޑް ވަފުދެއް އެމެރިކާ އަށް ވަޑައިގަތުމުގެ ފުރުސަތު ލިބިފައިވާކަމަށާއި އެހެންކަމުން އެމެރިކާގެ ޓްރޭޑް ރިޕްރެޒެންޓޭޓިވްއާ އޭނާ ބައްދަލު ކުރައްވާފައިވާ ކަމަށެވެ. ރާއްޖެއަށް ޕޭޕަލްގެ ހިދުމަތް ދިނުމާ ގުޅޭ ގޮތުން އެ ބައްދަލުވުމުގައި ވާހަކަ ދެއްކެވި ކަމަށް ވެސް ސައީދު ވިދާޅުވިއެވެ. އާދެ، މި ދައްކަނީ ޖެނުއަރީ މަހުގެ ވާހަކައެވެ. އޭރުވެސް ތައާރަފް ކުރަން އުޅުނު އެއްޗެއްގެ ވާހަކައެވެ.

މާރްޗް 21 ވަަނަ ދުވަހު އަނެއްކާވެސް މެއި މަހުގެ ތެރޭގައި އީ-ވޮލެޓް ތައާރަފް ކުރެވޭ ވަރު ވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވިއެވެ. "ރައީސްގެ ޖަވާބު" ޕްރޮގްރާމްގެ ސެގްމަންޓުގައި ޒުވާނަކު ކުރި ސުވާލަށް ޖަވާބު ދެއްވަމުން އެމަނިކުފާނު ވިދާޅުވީ އެންމެ ލަސްވެގެން މެއި މަހުގެ ތެރޭގައި އެކަން ކުރެވިގެން ދާނެކަމަށެވެ.

އޭގެފަހުން ޕޭޕަލްއާ ގުޅުވާ ބޮޑެތި ދޮގުތަކެެއް ވެސް ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވަނީ ހަދާފައެވެ. 31 މާރްޗް ވަނަ ދުވަހު ބޭންކް އޮފް މޯލްޑިވްސް (ބީއެމްއެލް) އިން ނެރުނު ބަޔާނަކާއި ގުޅިގެން ހަލީލް ވިދާޅުވީ ބޭންކުން ފާހަގަކޮށްފައިވާ ބޭނުންކުރެވޭ ޑިޖިޓަލް ޕްލެޓްފޯމުތަކުގެ ތެރޭގައި ސްކްރިލް އާއި ޕޭޕަލް ވެސް ހިމެނޭ ކަމަށެވެ. މިއީ ހަލީލް ކަނޑައެޅިގެން ހެދި ބޮޑު ދޮގެކެވެ.

ޖުލައި މަހުގެ 20 ވަނަ ދުވަހު މޯލްޑިވިއަން އާޓިސްޓް ކޮމިއުނިޓީން އިންތިޒާމުކޮށްގެން އާޓް ގެލަރީގައި ކުރިއަށް ގެންދިޔަ "އަންވެއިލިން ވިޒަންސް 2024" މައުރަޒު ބައްލަވައިލެއްވުމަށް ފަހު، ރައީސް މުއިއްޒު ވިދާޅުވީ ޕޭޕަލް އާއި އޮންލައިން އެހެން ގޭޓުވޭތައް ގެނައުމުގެ ނަތީޖާއަކާ ހަމައަށް އަދިވެސް ނުދެވޭކަމަށެވެ. ބަހަނާއަކަށް އެމަނިކުފާނު ދެއްކެވީ "ކުރަން ޖެހޭ މަސައްކަތްތައް" ގިނަވުމެވެ.

ބަހަނާއަކަށްފަހު ބަހަނާދައްކަމުން ގޮސް އޮގަސްޓް މަހުގެ 22 ވަނަ ދުވަހު އިކޮނޮމިކް މިނިސްޓަރ ސައީދު ވިދާޅުވީ ޕޭޕަލްގެ ޕްރެޒިޑެންޓް ފޮރ ގްލޯބަލް މާކެޓިންއާ އެކު މުހިންމު މަޝްވަރާއެއް ކުރެވުނު ކަމަށެވެ.

އޭގެފަހުން އޮގަސްޓް 31 ވަނަ ދުވަހު ދައުލަތުގެ މީޑިޔާ "ޕީއެސްއެމް" ގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މިނިސްޓަރ ސައީދު ވިދާޅުވީ ޕޭޕަލްގެ ޙިދުމަތް ރާއްޖޭގައި ތައާރަފްކުރުމަށް ކަމާއިގުޅުން ހުރި މާހިރުންނާއި މަޝްވަރާތައް ކުރުމަށްފަހު ޕޭޕަލް ކުންފުންޏަށް ރާއްޖޭގެ ފުލް ޕްރޮޕޯސަލް ހުށައަޅާފައިވާނެ ކަމަށެވެ. ޕްރޮޕޯސަލް ހުށަހެޅުއްވީ 28 އޮގްސްޓްގައި ކަމަށް ފާހަގަކޮށް ވިދާޅުވީ ޕޭޕަލްގެ ހިދުމަތް ފެށޭނެ ދުވަހެއް ސީދާބުނެދެން ނޭނގޭކަމަށެވެ. އެ ވާހަކަތަކުން ހީވީ ރައްޔިތުންގެ މޫނުމައްޗައް ހޫނު އެތިފަހަރެއް ޖެހިގެންދިޔަހެނެވެ.

މިނިސްޓަރ ސައީދު މި ކުރައްވަނީ ކީއް ކަމެއްް އަޅުގަނޑަކަށް ނޭނގުނެވެ. އުންމީދުތަކެއް ދެއްވާފައި މާޔޫސްވެސް އެބަކުރެއެވެ. އަނެއްކާ އެދުވަހު އެހެން ވިދާޅުވެފައި ސެޕްޓެމްބަރު މަހުގެ 17 ވަނަ ދުވަހު ވިދާޅުވީ ޕޭޕަލްގެ ހިދުމަތް ވަރަށް އަވަހަށް ރާއްޖޭގައި ފެށިގެންދާނެ ކަމަށެވެ. އަވަހަށް ފެށޭނެއޭ ކިޔާތާ އަހަރެއް ވަނީއެވެ. ފެށޭކަށް ނޫޅެއެވެ. ސަރުކާރުން ކުރާ މަސައްކަތެއް ނުފެނެެއެވެ.

ޕޭޕަލް ގެންނަނީ ގެންނަނީ ކިޔާފައި މިފަހުން ރައީސް ޑރ މުހައްމަދު މުއިއްޒު އިންޑިޔާއަށް ވަޑައިގެން ރާއްޖޭގައި ރުޕޭ ކާޑް ބޭނުން ކުރެވޭ ގޮތް ހެއްދެވިއެވެ. އެގޮތުން ރުޕޭ ކާޑުގެ ފުރަތަމަ ޓްރާންސެކްޝަން މާލޭގެ ފިހާރައެއްގައި ހެދި މަންޒަރު ލައިވްކޮށް ވެސް ވަނީ ދައްކާލާފައެވެ. ޖެނުއަރީ އިން ފެށިގެން ހޭވައްޓާފައި މަސައްކަތް ކުރީ ޕޭޕަލް ހޯދަން އެހެން ނަމަވެސް މި ލިބުނީ ރުޕޭއެވެ.

ފެންވަރު ނެތަސް މޮޅެތި ވާހަކަތައް ދައްކާފައި ރައްޔިތުންނަށް އޮޅުވާލީމާ މިހާރު ސަރުކާރަށް މި ރައްދުވަނީ މަލާމަތާ ފުރައްސާރައެވެ. ޕޭޕަލް ގެންނަން އުޅެނިކޮށް މި ލިބުނީ ޕޭޕަލްގެ އަލީ އެކްސްޕްރެސް ވާޝަންއެވެ. 5 އަހަރު ނިމޭނީ ޕޭޕަލް އަންނަނީ އަންނަނީގައި ކަމަށް ވަރަށް ބެލެވެއެވެ.

މިނިސްޓާރ ސައީދެވެ. ދެން ވެސް ފިނިފެންމަލުގެ ބަގީޗާއިން ނިކުމެވަޑައިގެން ޕޭޕަލް ގެނެވޭތޯ ބަލާށެވެ. އެހެން ނޫނީ ފެންނާނީ ރައްޔިތުން، ހާއްސަކޮށް ޒުވާނުންގެ ނަފްރަތު މަނިކުފާނަށް އަމާޒުވަމުންދާ މަންޒަރު ނޫންކަމެއް ވެސް ނޭނގެއެވެ.