އިގްތިޞާދީ ގޮތުން އަނދަވަޅެއްގައި އޮއްވާ އދ.ގެ 79 ވަނަ އާންމު މަޖިލީހުގައި ތަގުރީރުކުރެއްވުމަށް ރައީސް ޑރ. މުޙައްމަދު މުއިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅަށް 2.4 މިލިއަން ރުފިޔާ ހޭދަކޮށްފައިވާކަން ހާމަވެއްޖެއެވެ.

ރައީސް އޮފީހުން ވަނީ ރައީސް މުއިއްޒު އެމެރިކާއަށް ކުރެއްވި ދަތުރުފުޅުގެ ތަފްސީލް އާންމުކޮށްފައެވެ. އެ މައުލޫމާތަށް ބަލާއިރު ރައީސް މުއިއްޒު ކުރެއްވި ދަތުރުފުޅުގައި ހޭދަކޮށްފައިވަނީ 2،455،583.01 (ދެ މިލިއަން، ހަތަރު ލައްކަ ފަންސާސް ފަސްހާސް ފަސްސަތޭކަ އަށްޑިހަ ތިން ރުފިޔާ އެއް ލާރި) އެވެ.

ރައީސް އޮފީހުން އާންމުކޮށްފައިވާ މައުލޫމާތުގައި ކުރީގެ ރައީސް އިބްރާހިމް މުހައްމަދު ޞާލިހް ނިމިދިޔަ ރިޔާސީ ދައުރުގައި އދ. ގެ އެންމެ އިސްވެރިންގެ ބައްދަލުވުމުގައި ބައިވެރިވެވަޑައިގަތުމަށް ނިއުޔޯކަށް ދެ ފަހަރުގެ މަތިން ވަޑައިގެންފައިވެއެވެ. އެއީ 2019 ވަނަ އަހަރާއި 2021 ވަނަ އަހަރުގައެވެ.

ރައީސް އޮފީހުން އާންމުކޮށްފައިވާ މައުލޫމާތަށް ބަލާއިރު 2019 ވަނަ އަހަރު ކުރެއްވި އެ ދަތުރުފުޅަށް ހޭދަކުރެއްވީ 4،171،832.42 ރުފިޔާއެވެ. އަދި 2021 ވަނަ އަހަރުގެ ދަތުރަށް ކުރައްވާފައިވަނީ 5،349،505.88 ރުފިޔާއެެވެ.