ސިނގިރޭޓް އެތެރެކުރުމާއި، ބުއިން މަނާނުކޮށް އަންނަ މަހުން ފެށިގެން ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރެ ކުރުން މަނާ ކުރަން ރައީސް ޑރ. މުހައްމަދު މުއިއްޒު ނިންމެވުމާއި ގުޅިގެން ގިނަ ބަޔަކު އަންނަނީ ފާޑުކިޔަމުންނެވެ.
ރައީސް މުއިއްޒު އެކްސްގަައި ކުރެއްވި ޕޯސްޓެއްގައި ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އެމަނިކުފާނު އަންގަވާފައިވާ ކަމަށެވެ.
އެމަނިކުފާނު މިފަދައިން ނިންމެވުމާއެކު މި ނިންމެވުމަކީ ރަނގަޅު ނިންމެވުމެއްކަމަށް އެއް ބަޔަކު ބުނަމުން އަންނައިރު ގިނަ ބަޔަކު ދެކޭގޮތުގައި ވޭޕް މަނާކުރިއިރު އެންމެ ފުރަތަމަ މަނާކުރަންޖެހޭނީ ސިނގިރޭޓެވެ. ދުންފަތުގެ ސަބަބުން ލިބޭ ގެއްލުމުން ސަލާމަތް ކުރަން ސަރުކާރުން އެދޭ ނަމަ، ދުންފަތުގެ އެންމެ ނުރައްކާތެރި ބާވަތް ކަމުގައިވާ ސިނގެރެޓު ވެއްދުން މަނާ ކުރަން ސަރުކާރުން މަސައްކަތް ކުރާނެކަމަށް އެ ފަރާތްތަކުން އަންނަނީ ބުނަމުންނެވެ.
ރާއްޖޭގައި ސިނގިރޭޓް މަނާނުކުރާކަމުގައި ވާނަމަ ވޭޕް ބޯ ފަރާތްތައް ދެން ފަށާނީ ސިނގިރޭޓް ބޯންށެވެ. އެއީ ނުރައްކާތެރި ހާލަތަކަށް ރާއްޖެ ގޮސްދާނެކަމެއްކަމަށް ވެސް ގިނަ ބަޔަކު ދެކެއެވެ.
ވޭޕް ބޭންކުރި ފަދައިން ސިނގިރޭޓް ވެސް ބޭން ކުރުމަށް ގިނަ ބަޔަކު އަންނަނީ ރައީސް މުއިއްޒަށް ގޮވާލަމުންނެވެ.
