ރައީސް ޑރ މުހައްމަދު މުއިއްޒަށް ތާއީދު ކުރެވުނީތީ މިއަދު ވިޔަފާރިވެރިން ހިތާމަ ކުރާ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
ޓެކްސް ބޮޑު ނުކުރާނެ ކަމުގެ ވައުދާ އެކު ވަޑައިގެން ރައީސް މުއިއްޒު އެ ވައުދާ ޚިލާފުވެވަޑައިގެންނެވުމުން ގިނަ ބަޔަކު ގެންދަނީ އެކަމަށް ފާޑުކިޔަމުންނެވެ.
ތިން ޓެކްސްއެއް ބޮޑު ކުރަން ސަރުކާރުން ނިންމާފައިވާތީ އެކަމުގެ ނުރުހުން އާންމުންނާ ވިޔަފާރިވެރިންވެސް ފާޅުކުރަމުން ގެންދަވާތީ އެކަމަށް އިޝާރާތްކުރައްވާ ޑރ. ޖަމީލު ވިދާޅުވީ ދެން ރައީސް މުއިއްޒުގެ ބަހަކަށް ރައްޔިތުން އިތުބާރު ނުކުރާނެ ކަމަށާ އެއީ އަދި އިންތިހާބާ ދިމާކޮށް ވެވަޑައިގަންނަވާ ވައުދަކަށްވީ ނަމަވެސް ކަމަށެވެ.
ޓެކްސްއާ ގުޅުވާ ރައްޔިތުންނަށް ރައީސް މުއިއްޒު އޮޅުވާލައްވައިގެން ވާހަކަ ދެއްކެވި ވީޑިއޯއެއް ވެސް ހިއްސާ ކުރައްވާ ޑރ. ޖަމީލު އެކްސްގައި އިތުރަށް ވިދާޅުވީ، ރައީސް މުއިއްޒުގެ ސަރުކާރުގެ ސިޔާސީ ނާޒަރަންގީ އޮތީ ކުރިއަށް ކަމަށާ އެކަމަށް ގުރުބާން ކުރާނީ ރައްޔިތުންނާ ވިޔަފާރިވެރިން ކަމަށެވެ.
މީގެ އިތުރުން މުއިއްޒަށް ތާއީދު ކުރެވުނީތީ މިއަދު ވިޔަފާރިވެރިންވެސް ހިތާމަކުރާ ކަމަށް ޑރ. ޖަމީލު ވަނީ ވިދާޅުވެފައެވެ.
ޑރ ޖަމީލު މިފަދައިން ވިދާޅުވެފައިވާއިރު، ޓީޖީއެސްޓީ %12 އިން %17 އަށް ބޮޑު ކުރަން ނިންމި ނިންމުމާ ގްރީން ޓެކްސް 6 ޑޮލަރުން 12 ޑޮލަރަށް ބޮޑުކުރަން ނިންމި ނިންމުމާ އަދި ގެސްޓު ހައުސް ވިޔަފާރިތަކުގެ ޓެކްސް ތިން ޑޮލަރުން 6 ޑޮލަރަށް ބޮޑު ކުރަން ނިންމި ނިންމުމާ ގުޅިގެން ގިނަ ބަޔަކު ގެންދަނީ ފާޑުކިޔަމުންނެވެ. އަދި ރައްޔިތުންގެ މަޖިލިިހުގައި ވެސް މިކަމާ މެދު މެމްބަރުން ކަންބޮޑުވުން ފާޅުކޮށްފައިވެއެވެ.
