ރައީސް ޑރ މުހައްމަދު މުއިއްޒުގެ ސަރުކާރު އައިފަހުން "ދިވެހީންގެރާއްޖެ" ވެގެންމިދިޔައީ "މިނިކާރާއްޖެ" އަކަށްކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

މި ސަރުކާރުގައި 7،000އަށްވުރެ ގިނަ ސިޔާސީ މުވައްޒަފުން އެބަތިބިކަމަށް "އަދަދު" ނޫހުން ޝާއިއުކޮށްފައިވާ ޚަބަރުގެ ލިންކް އެކްސްގައި ހިއްސާކުރެއްވުމަށްފަހު ޑރ. ޖަމީލް ވިދާޅުވީ ދެން ގައުމުގެ މާލީ ޙާލަތު ރަނގަޅުވާނީ ކިހިނެއްކަމެއް ނޭނގޭކަމަށެވެ.

ސަރުކާރަށް އަހަރެއްވާން ކައިރިވިއިރު މި އިސްރާފު މިހާ ދުވަސްވަންދެން މިކުރީ ކޮންބޭނުމަކުތޯ އައްސަވާ ޑރ ޖަމީލް ވަނީ ސުވާލެއް ވެސް ކުރައްވާފައެވެ. އާންމު މީހާ މަގުމަތި ވެއްޖެކަމަށާއި ފިހާރަތައް ބަންދުވެ،ސޭލްތައް ދަށްވެ ސޭވިންގ ކޮޅު ހުސްވެއްޖެކަމަށް ވެސް ޑރ ޖަމީލް ވަނީ ވިދާޅުވެފައެވެ

ވެރިކަމަށް އައުމަށްފަހު ރައީސް މުއިއްޒު ދިން އިތުރު ޚިދުމަތެއް ނެތްކަމަށާއި އެމަނިކުފާނު އަލަށް އުފެއްދި ވުޒާރާތަކާއި އެމްބަސީތައް އެބަހުރި ނަމަވެސް އޭގެންވީ އެެއްވެސް ފައިދާއެއް ވެސް ނެތްކަމަށް ޑރ ޖަމީލް ވަނީ ވިދާޅުވެފައެވެ.

ސަރުކާރަށް އެއް އަހަރު ފާއިތުވާން ކައިރިވެފައިވާއިރު، ސަރުކާރުން މި ކުޅެނީ ބަތް ކައްކާ ކަމަށާއި ރައީސް މުއިއްޒުގެ ޖާހަތައް ދަރަންޏަށް ފައިސާ ނަގައިގެން ސިޔާސީ މުވައްޒަފުންނަށް މުސާރަދީ ޖެހި ސަކަރާތަކީ ބޮޑު ޚިޔާނާތެއް ކަމަަށް ވެސް ޑރ ޖަމީލް ވަނީ އެކްސްގައި ފާހަގަކުރައްވާފައެވެ.

ރައީސް މުއިއްޒު ވެރިކަމާ ހަވާލުވެ މުލިއާގެ މަރާމާތު ކުރަން ދައުލަތުން ކުރި ހަރަދާއި ހުވާކުރުމުގެ ރަސްމިއްޔާތައް ކުރެއްވި ޚަރަދާއި ތުރުކީން ގެނައި ޑްރޯންތަކަކީ ފައިސާ ނަގަން ހިންގެވި ސްކޭމެއްކަމަށް ވެސް ޑރ ޖަމީލް ވަނީ ވިދާޅުވެފައެވެ.

ސިޔާސީ މަގާމުތައް ގިނަކޮށް ދައުލަތުގެ ފައިސާއިން އެ ފަރާތްތަކަށް މުސާރަ ހިންގާފައިވާތީ ގިނަ ބަޔަކު އަންނަނީ ސަރުކާރަށް ފާޑުކިޔަމުންނެވެ.