ރައީސް އަބްދުﷲ ޔާމީނަށް ނިމިދިޔަ ރިޔާސީ އިންތިހާބުގައި ވާދަކުރުމުގެ ދޮރު ބަންދުކުރުމަށް، ހައިކޯޓަށް އަތް ބޭނި އެކަކީ، އަދުގެ ރީޖަނަލް އެއާޕޯޓުސް ކޮމްޕެނީގެ މެނޭޖިން ޑިރެކްޓަރ އަހުމަދު މުބީން ކަމަށް، ޕީއެންއެފްގެ އިސް ސަފުގައި މަސައްކަތްކުރައްވާ ކުރީގެ ކޮމިޝަނަރ އޮފް ޕޮލިސް ޕީހުސެއިން ވަހީދު ވިދާޅުވެއްޖެއެވެ.

ހުސެއިން މިފަދައިން ވިދާޅުވީ ހޯމަ ދުވަހުގެރޭ އޮތް ޕީއެންއެފްގެ ޖަލްސާގައި ވާހަަކަ ދައްކަވަމުންނެވެ.

ހުސެއިން ވަނީ މުބީން ރައީސް ޔާމީނަށް ނިސްބަތްކޮށް ދެއްކި ވާހަކަތަކަށް އަލި އަޅުވާލައްވާފައެވެ. އެގޮތުން ހުސެއިން ވިދާޅުވީ މިއަދު ރައީސް ޔާމީން އިށީެވަޑައިގެން އިންނަވާ ގޮނޑިއާ ޖެހިގެން އިންނަ ގޮނޑީގައި އިނުމަކީ ވެސް ލިބޭ ފަޚުރެއް ކަމަށާ، އެއީ އެވަރުގެ ކެރޭ ވެރިއަކު ގައުމު ދެކެފައި ނުވާތީ ކަމަށެވެ.

ހުސެއިން ވިދާޅުވީ އިންޑިއާ އައުޓު މޭމަތީ ޖައްސަވައިގެން ގައުމުގެ އެކި ދިމަދިމާއަށް ދަތުރުކުރެއްވުމަކީ ކޮންމެ ކޮންމެ ވެރިއަކަށް ކުރަން ކެރިވަޑައިގަންނަވާނެ ކަމެއް ނޫން ކަމަށާ ނަމަވެސް ރައީސް ޔާމީންގެ އެ ހިތްވަރުފުޅު ހުންނާނެ ކަމަށެވެ.

ހުސެއިން އިތުރަށް ވިދާޅުވީ. މުބީންއަކީ ރައީސް ޔާމީންގެ މައްސަލައަށް އެންމެ ބޮޑަށް ނުފޫޒު ފޯރުވި އެކަކު ކަމަށާ އޭގެ ބަދަލުގައި އިނާމެއްގެ ގޮތުގައި ދިނިީ މިއަދު އޭނާ އެހުރި މަގާމު ކަމަށެވެ.

ހުސެއިން އިތުރަށް ވިދާޅުވީ، އިންޑިއާ އައުޓަކީ ރައީސް ޔާމީންގެ ފިލޯސަފީކަމަށް މުބީން ބުނާއިރު، ޗައިނާއަށް ރައީސް މުހައްމަދު މުއިއްޒު ކުރެއްވި ދަތުރުފުޅަށް ފަހު ވަޑައިގެން ދެއްކެވި ވާހަކަތަކަކީ ގައިމުވެސް ރައީސް ޔާމީންއަކާ ގުޅުން އޮތް ކަމެއް ނޫން ކަމަށާ އެހެންކަމުން އެދުވަހު އެ ވާހަކަ އެހެން ރައީސް މުއިއްޒު ދެއްކެވީ ކާކު މަޖްބޫރުކޮށްގެންތޯ ކަމަށް ވިދާޅުވެ ހުސެއިން ވަނީ ސުވާލެއް ސަރުކާރު ތަމްސީލުކުރާ ބޭފުޅުންނަށް އަމާޒުކުރައްވާފައެވެ.