ރާއްޖޭގައި ދެވަނައަށް އެންމެ ބޮޑު ސިޔާސީ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލަން، އަސާސީ ގަވާއިދަށް އިސްލާހު ގެނެސް މަގު ކޮށާ ނިންމައިފިކަން ހާމަވެއްޖެއެވެ.

އިއްޔެ ބޭއްވި ސެނެޓު ބައްދަލުވުމަކީ ސީދާ ޕާޓީ އުވާލަން ހުށަހަޅަން ބޭއްވި ބައްދަލުވުމެއް ނަމަވެސް ބައްދަލުވުމުގެ ކުރިން މިކަން މީޑީޔާއަށް ތިލަވެ ޕީޕިއެމްގެ އާންމު މެމްބަރުންގެ ސަމާލުކަމަށް މިކަން އައުމާ އެކު ޕާޓީއިން ވަނީ ބައްދަލުވުމުގެ އެޖެންޑާ ބަދަލުކޮށްފައެވެ.

އެގޮތުން ބައްދަލުވުމުގައި ވާހަކަ ދައްކަވަމުން ޕާޓީގެ ނައިބު މުހައްމަދު ޣައްސާން ވިދާޅުވެފައިވަނީ ޕާޓީގެ މަގާމުތަކަށް ބޭފުޅުން ހަމަކޮށް ނިންމަން ޖެހޭ ކަމަށާ އެހެން ކަމުން ޕާޓީގެ ހުސްވެފައިވާ މަގާމުތަކަށް ބޭފުޅުން އައއްޔަންކުރަން ހުށަހެޅިއެވެ.

އެގޮތުން ޕީޕީއެމްގެ ނައިބު ރައީސަކަށް އަދުގެ ފޮރިން މިނިސްޓަރު ޑރ. އަބްދުﷲ ޚަލީލު އަދި ޕީޕީއެމްގެ ސެކެރެޓަރީ ޖެނެރަލްއަކަށް އައިޖީއެމްއެޗްގެ ސީއީއޯ އިބްރާހިމު އަބްދުއްރައްޒާގު ހަލީމު އައްޔަންކޮށްފައިވެއެވެ.

އެއަށް ފަހު ދެން އިއްޔެގެ ބައްދަލުވުމުގައި ވަނީ ޕީޕީއެމްގެ އަސާސީ ގަވާއިދުގެ 61 މާއްދާގެ (ނ) އަށް އިސްލާހު ގެނައުމަށް ހުށަހަޅާފައެވެ. އެގޮތުން ޕާޓީގެ އަސާސީ ގަވާއިދުގެ 61 ވަނަ މާއްދާގައި، ޕާޓީގެ ލީޑަރޝިޕުން ޕާޓީ އުވާލަން ބޭނުންވެގެން ސެނެޓަށް ހުށަހަޅަިފިނަމަ އެ މައްސަލަ ސިރާސާކޮށް ސެނެޓަށް ފެންނަގޮތަކަށް ނިންމަން އޮތް އޮތުން ބަދަލުކޮށް އިސްލާހުކޮށްފައިވެއެވެ. އެގޮތުން ގެނައި އިސްލާހުގައި ވަނީ ޕާޓީގެ ލީޑަރޝިޕުން ބޭނުންވެގެން ޕާޓީ އުވާލަން ހުށަހަޅަިއިފި ނަމަ ސެނެޓުގެ ވޯޓުން އެކަން ނިންމާ ގޮތަށެވެ. އަދި ޕާޓީ އުވާލެވޭނީ ސެނެޓުގެ 3/4 ވޯޓުންކަމަށް އޮތް އޮތުމަށް ވެސް އިސްލާހު ގެނެސް އެ އަދަދު ވަނީ މަދު ކޮށްފައެވެ. އެގޮތުން މިހާރު ސެނެޓުގެ 2/3 ވޯޓުން ޕާޓީ އުވާލެވޭނެއެވެ.

"ތޭރަ އޮންލައިން"އަށް މައުލޫމާތު ދިން ޕީޕީއެމްގެ ސެނެޓަރުން ހާމަކޮށްފައިވާ ގޮތުގައި ޕާޓީ އުވާލަން އިއްޔެގެ ބައްދަލުވުމުގައި މަޝްވަރާނުކުރާކަމަށް ޕާޓީއިން ހާމަކުރި ނަމަވެސް އިއްޔެގެ ބައްދަލުވުމުގައި ފަހުން ވަނީ އެޖެންޑާ ބަދަލުކޮށް، ޕާޓީ އުވާލަން ފަހި ކުރަން ޖެހޭ ހުރިހާ މަގެއް ފަހިކޮށްފައި ކަމަށެވެ. އަދި ޕާޓީ އުވާލަން ނޫޅޭ ކަމަށް ޕީޕީއެމުން ހާމަކުރި ނަމަވެސް އިއްޔެ ބައްދަލުވުމަކީ ސީދާ ހަމަ އެކަމަށް ބޭއްވި ބައްދަލުވުމެއް ކަމަށާ ނަމަވެސް މީޑިޔާއިން އެކަން މާ ކުރިން ހާމަކުރުމުންނާ އަދި ޕާޓީ އުވާލަން ހަމަ ކުރަން ޖެހޭ އަދަދު ހަމަވެދާނެކަމުގެ ޝައްކު އޮތުމުން އިއްޔެ އެކަމަށް ވޯޓަށް ނޭހީއެވެ.

އިއްޔެ ސެނެޓު ބައްދަލުވުމުގައި ބައްދަލުވުމަށް ހާޒިރުވެގެންނާ އަދި އޮންލައިންކޮށްވެސް ސެނެޓަރުން ބައިވެރިވެފައިވެއެވެ.

އިއްޔެ ޕީޕީއެމްގެ އަސާސީ ގަވާއިދާށް ބަދަލު ގެނެސްފައިވާއިރު، އެ ޕާޓީގެ އަސާސީ ގަވާއިދަށް ކުރިން ބަދަލު ގެނެވޭ ގޮތަށް އޮންނަނީ ޕާޓީގެ ސުޕަރ ލައުންސިލް ބައްދަލުވުމެއް ބާއްވައިގެންނެވެ. ނަމަވެސް ރައީސް އަބްދުﷲ ޔާމީން ޖަލު ހުކުމުގައި ހުންނަވަނިކޮށް ޕީޕީއެމްގެ އިސްވެރިން ބޭނުންވާ ގޮތަށް އަސާސީ ގަވާއިދަށް އިސްލާހު ގެނެސްފައިވަނީ، ޕާޓީގެ ސެނެޓަށް އެ އިޚުތިޔާރު ދެވޭ ގޮތަށެވެ.