ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާ މެދު ދަނީ ވަރަށް އިހުމާލުވަމުން ކަމަށާ އަދި ޕާޓީގެ ސެނެޓަރުންނަށް ޕާޓީ ފުނޑާލަން ދަނީ މަޖްބޫރުކުރަމުން ކަމަށް އެ ޕާޓީގެ ބައެއް ސެނެޓަރުން ހާމަކޮށްފިއެވެ.

ނަން ހާމަނުކުރުމަށް އެދި "ތޭރަ އޮންލައިން"އާ އެ ވާހަކަތައް ހިއްސާކުރި ބައެއް ސެނެޓަރުން ބުނެފައިވަނީ، ޕީޕީއެމްގެ ލީޑަރޝިޕުން ބޭނުންވަނީ ރައީސް މުހައްމަދު މުއިއްޒުގެ އެންގުމަށް ތާއީދުކޮށް ޕީޕީއެމް އުވާލަން ކަމަށެވެ. އަދި ލީޑަރޝިޕުގައި މިވަގުތު ތިއްބެވި ހުރިހާ ބޭފުޅުންނަކީ ވެސް ދައުލަތުގެ ބޮޑެތި މަގާމުތަކުގައި ތިއްބެވި ބޭފުޅުންނަށް ވުމުން ލީޑަރޝިޕުންވެސް ރައީސް މުއިއްޒަށް ކިޔަމަން ގަތުމަށް ޖެހޭ ކަމަށް ލީޑަރޝިޕުން ބުނެފައިވާ ކަމަށެވެ.

ޕާޓީއާ މެދު އިހުމާލުވާކަމަށް ބުނެ އެ ސެނެޓަރުން ވަނީ އިއްްޔެ ބޭއްވި ޕީޕީއެމްގެ ސެނެޓު ބައްދަލުވުން ޕީއެންސީ އޮފީހުގައި ބޭއްވުމުން ނުރުހުން ފާޅުކޮށްފައެވެ. އެގޮތުން "ތޭރަ އޮންލައިން"އާ ވާހަކަ ދެއްކި ބައެއް ސެނެޓަރުން ބުނެފައިވަނީ ޕާޓީގެ ސެނެޓުގެ ރަސްމީ ބައްދަލުވުމެއް އެހެން ޕާޓީއެއްގެ އޮފީހުގައި ބޭއްވުމަކީ ބަލައިގަނެވޭނެ ކަމެއް ނޫން ކަމަށާ އަދި ޕީޕީއެމްގެ އޮފީހެއް ވެސް ނެތުމަކީ ކަންބޮޑުވުމެއް ކަމަށެވެ.

ޕީޕީއެމްއާ މެދު ލީޑަޝިޕުން ކަންކަން ކުރަމުންދާ ގޮތުން ސެނެޓަރުންގެ ހިތުގެ ޝުއޫރު "ތޭރަ އޮންލައިން" އާ ހިއްސާކުރި ބައެއް ސެނެޓަރުން ބުނެފައިވާ ގޮތުގައި ބޮޑު ޕާޓީއެއްގެ ސިޔާސީ ހަރަކާތް އެއްކޮށް ހުއްޓުވާފައު ބޭއްވުމަށް ފަހު މެމްބަރުންގެ ހިތާ ރޫހު މަރާލަމުން ރައީސް މުއިއްޒު ގެންދަވާ ކަމަށެވެ. އަދި ޕާޓީ ޕެރެލައިޒްކޮށްލުމަށް ފަހު މިހާރު ޕާޓީ އުވާލުމުގެ މަގުތައް ކޮށަމުން ދާ ކަމަށާ އެކަން ކުރިޔަސް ހަގީގީ ޕީޕީއެމް މެމްބަރުން ޕީއެންސީއަށް ސޮއި ނުކުރާނެކަން ޔަގީންވާ ކަމަށެވެ.

ޕީޕީއެމް އުވާލަން އުޅޭ ކަމުގެ އަޑުތައް ގަދަވެފައިވާއިރު، ޕީޕީއެމްގެ ހިންގާ ގަވާއިދުގައި ކުރިން ބުނެފައިވާ ގޮތުން އެ ޕާޓީ ހިންގުމަށް ދަތިވާ ވަރަށް ޕާޓީ ގެ މާލީ ހާލަތު ދަށްވެ، ޕާޓީގެ ލީޑާޝިޕުން، ސެނެޓަށް ހުށަހަޅައި އެކަން ދިރާސާ ކުރުމަށް ފަހު ޕާޓީ އުވާލަން ޖެހޭ ކަމަށް ސެނެޓުގެ ހަތަރު ބައިކުޅަ ތިންބައިގެ އަގުލަބިއްޔަތުން ފާސްކޮށްފި ނަމަ ޕާޓީ އުވާލެވިދާނެއެވެ. މި ގަވާއިދަށް އިއްޔެ ބޭއްވި ސެނެޓު ބައްދަލުވުމުގައި ވަނީ އިސްލާހު ގެނެސް ފާސްވެސް ކޮށްފައެވެ.

އެގޮތުން އެ ޕާޓީ ހިންގުމަށް ދަތިވާ ވަރަށް ޕާޓީ ގެ މާލީ ހާލަތު ދަށްވެ، ޕާޓީގެ ލީޑާޝިޕުން، ސެނެޓަށް ހުށަހަޅައި އެކަން ދިރާސާ ކުރުމަށް ފަހު ޕާޓީ އުވާލަން ޖެހޭ ސެނެޓުގެ ހަތަރު ބައިކުޅަ ތިންބައިގެ އަގުލަބިއްޔަތުން ފާސްކޮށްފި ނަމަ ޕާޓީ އުވާލެވިދާނެ ކަމަށް އޮތް އޮތުމުގެ ބަދަލުގައި ޕާޓީ ހިންގުމަށް ދަތިވާ ވަރަށް ޕާޓީ ގެ މާލީ ހާލަތު ދަށްވެ، ޕާޓީގެ ލީޑާޝިޕުން، ސެނެޓަށް ހުށަހެޅުމުން ދިރާސާ ކުރުމަކާ ނުލާ ސެނެޓުގެ ތިން ބައިކުޅަ ދެބައިގެ އަގުލަބިއްޔަތުން އެކަން ފާސްކޮށްފި ނަމަ ޕާޓީ އުވާލެވޭ ގޮތަށް ވަނީ އިސްލާހު ފާސްކޮށްފައެވެ.

ޕާޓީ އުވާލެވޭ ހާލަތެއްގައި ޕާޓީގެ ފައިސާ އާއި މުދާ ބޭނުންކޮށްގެން ދަރަނި އަދާކުރުމަށް ފަހު ބާކީ ހުރި އެއްޗެއް ހަދިޔާ ކުރަންވާނީ، ރާއްޖޭގައި ރަޖިސްޓަރީ ކޮށްފައިވާ ސެނެޓުން ކަނޑައަޅާ ހައިރާތު ފަންޑަކަށެވެ.