ރައީސް ޑރ. މުހައްމަދު މުއިއްޒު މިހާރު ހުންނެވީ ރައްޔިތުންނަށް އެންމެ ފުރަތަމަ ވެވަޑައިގެންނެވި އަހުދާ ކިލާފުވެ ގައުމަށް ގައްދާރުވެފައި ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ޕީއެންއެފުން ދަ ފްރޮންޓް އޮފީހުގައި ބުރާސްފަތި ދުވަހުގެރޭ "މިނިވަންކަން"، މި މައުޟޫއަށް ކުރިއަށް ގެންދިޔަ ޖަލްސާގައި އޯޑިއަންސްގައި އިންނަވާ ދެއްކެވި ވާހަަކަފުޅުގައެވެ.

ރައީސް ޔާމީން ވިދާޅުވީ، މޯލްޑިވިއަން ޑިމޮކްރެޓިކް ޕާޓީ (އެމްޑިޕީ)ގެ ވެރިކަމުގައި ގައުމުގެ މިނިވަންކަމާ އިސްތިގުލާލު ކޮމްޕްރޮމައިޒްވާ ގޮތަށް ފަޅުތަކާ ބިންތަކާ އަދިވެސް ގައުމުގެ އެހެނިހެން ހަރުމުދާ އިންޑިއާއާ ދެމުން ގެންދިޔަ ވާހަކަ ދެއްކުމަށް ފަހު ވެރިކަމަށް ވަޑައިގެން ރައިީސް މުއިއްޒު ވެސް ކަންކަން ކުރައްވަމުން އެގެންދަވަނީ އެ އުސޫލުން ކަމަށާ ރާއްޖޭގެ މިނިވަންކަން އަނބުރާ ހޯދަން ލިބުނު ފުރުސަތު ރައީސް މުއިއްޒު ގެއްލުވާލައިފި ކަމަށެވެ.

ރައީސް ޔާމީން ވިދާޅުވީ މިނިވަންކަން، ސިޔާދަތީ ބާރު ނެތިއްޔާ ކަށަވަރު ނުވާ ކަމަށެވެ. އަދި މިއަދު އދ ގައި ރާއްޖޭގެ ދިދަ ފަޚްރުވެރިކަމާ އެކު ވިހުރުވުނަސް މިއަދު ދިވެހިން ތިބި ލަދުވެތި ކަމާ އެކު ކަމަށާ އެކަމުގެ ޒިންމާ އުފުލަން ޖެހެނީ ރައީސް މުއިއްޒުއާ އެމަނިކުފާނުގެ އައުވާނުން ކަމަށެވެ.

މީގެ އިތުރުން ރައީސް ޔާމީން ވަނި މިއަދު ރައީސް މުއިއްޒުގެ އަމަލުތައް ބައްޓަން ކުރައްވަމުން ގެންދާ އުސޫލަށް ސިޔާސީ ނަޒަރިއްޔާތުން އެއްޗެއް ވިދާޅުވާނަމަ ވިދާޅުވެވޭނީ އެއީ އެންމެ މަތީ ދަރަަޖައިގައި ގައުމަށް ގައްދާރުވުމުގެ ގޮތުގައި ކަމަށެވެ.

ރައީސް ޔާމީން ވިދާޅުވީ ރައްޔިތުންނާ ވެރިންނަށް ހޮވާ މީހުންނާ ދެމެދު އޮންނަނީ ވަރަށް މަތިވެރި އިތުބާރެއް ކަމަށާއި، އެ އިތުބާރަކީ ގައުމަށް ގެއްލުންވާ ގޮތައް ކަންކަން ނުކުރާނެ ކަމުގެ އިތުބާރު ކަމުގައެވެ. އެހެން ނަމަވެސް މި ސަރުކާރުން އެއްބަސްވުންތައް ސިއްރުކުރުމާއެކު ރާއްޖޭގެ އެންމެ މަތީ މަސްލަހަތު ހިމެނޭ ރާއްޖޭގެ ސިޔާދަތު ރައްކައުތެރި ކުރުމާ ގުޅޭ ކަންކަމުގައި ސަރުކާރުގެ އިތުބާރު ގެއްލިއްޖެ ކަމަށެވެ.