ރައްޔިތުންގެ މަޖިލީހުގެ ރައީސް އަދި ލ.ފޮނަދޫ ދާއިރާގެ މެންބަރު އަބްދުއްރަހީމް އުޅުއްވަނީ 2028 ވަނަ އަހަރުގެ ރިޔާސީ އިންތިޚާބަށް ޕީއެންސީގެ ޓިކެޓް ހޯއްދަވަން ކަމަށް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް އެކްސްގައި ކުރެއްވި ޕޯސްޓެއްގައި އިތުރަށް ވިދާޅުވީ ސިނަމާލެ ބްރިޖްގެ ލޭންތައް އޭރުގެ ހައުސިންގ މިނިސްޓަ އަދި މިހާރުގެ ރައީސް ޑރ މުހައްމަދު މުއިއްޒު މަދުކޮށްފައިވާ ކަމަށް މީޑިޔާތަކަށް އިންޓަވިއުދެއްވީ ރިޔާސީ ޓިކެޓުގެ ބޭނުމުގައި ކަމަށެވެ.
މީގެ އިތުރުން، ސަރުކާރުގެ ތެރޭގައި މިހާރުވެސް މައްސަލަތައް އުފެދިފައިވާ ކަމަށް ސިފަކޮށް މަލީހް ވިދާޅުވީ އަދުރޭ ގެންދަވަނީ މުއިއްޒުގެ ގޯސް ވާހަކަ ދައްކާ މުއިއްޒުއާއި ދެކޮޅަށް ސަރުކާރުގެ ތެރެއިން މީހުން ބަދަލުކުރުމަށް މަސައްކަތް ކުރަމުން ކަމަށް މަލީހް ފާހަގަކޮށްފައިވެއެވެ.
މިއާއި އެކު މަދުވި ލޭންތަކަށް ވީގޮތް ފުރިހަމައަށް ރައްޔިތުންނަށް އެންގުމަށް މަލީހް ވަނީ ގޮވާލާފައެވެ.
